23:25

Lirohet aktivisti i Vetëvendosjes, hap rast penal ndaj truprojave të Thaçit

Është liruar aktivisti i Vetëvendosjes, Veron Hasani, i cili ka hapur edhe rast penal ndaj truprojave të presidentit Hashim Thaçi.

Këtë e ka bërë të ditur avokati i tij, Tomë Gashi, përmes një postimi në Facebook.

“Aktivisti i Vetëvendosjes është liruar nga ndalimi i panevojshëm nga Policia e Kosovës. Veroni ka hap rast penal kundër truprojave të presidentit Thaçi në Inspektoratin Policor të Kosovës”, ka shkruar Gashi.

Ai ka shtuar tutje se, “aktivisti i Vetëvendosjes brutalisht dhe pa asnjë arsye është sulmuar nga truprojat e Thaçit duke i shkaktuar lëndime të shumëfishta trupore, për të cilat ai ka marrë trajtim mjekësor nga ndihma e shpejtë në Klinikën Emergjente në Prishtinë”.

18:09

Vetëvendosje: Truprojat e Thaçit rrahën deri në gjakosje aktivistin tonë

Lëvizja Vetëvendosje ka akuzuar truprojat e presidentit Hashim Thaçi se e kanë rrahur aktivistin e saj, Veron Hasani, në kohën kur i pari i vendit po mbante konferencë për media në oborr të Kuvendit.

VV-ja ka thënë se “arroganca e pushtetit nuk ka të ndalur e në derë po troket diktatura”.

“Arroganca e pushtetit nuk ka të ndalur e në derë po troket diktatura. Truprojat e presidentit përçarës kanë goditur dhe e kanë rrahur deri në gjakosje aktivistin Veron Hasani vetëm pse ky i fundit ka guxuar të ngrejë zërin gjatë kohës kur Hashim Thaçi po mbante konferencë për media në shesh. Aktivisti Veron Hasani ka thirrur “o hajn!”, duke besuar se në Kosovë ende funksionon demokracia dhe liria e fjalës. Por kështu nuk mendon Thaçi dhe truprojat e tij”, ka shkruar Vetëvendosje në një reagim në rrjetet sociale.

VV-ja po ashtu ka shpërndarë një video, në të cilën thotë se shihet “sjellja çnjerëzore dhe brutale e këtyre truprojave ndaj një qytetari që nuk ka bërë asgjë, përveçse ka folur”.

“Një regjim që nuk e duron të vërtetën, kritikën, dhe drejtësinë mund të sillet vetëm në këtë mënyrë. Lëvizja Vetëvendosje aktivistët dhe asnjë qytetar nuk ua ka frikën shkelmave të fundit të Pronto-Presidentit që ka humbur toruan. Ne kërkojmë lirimin e menjëhershëm të Veronit, si dhe kërkojmë nga organet e rendit arrestimin e këtyre personave të cilët godasin qytetarët vetëm pse flasin lirshëm në sheshet e Republikës. Ftojmë edhe organizatat që merren me monitorimin e të drejtave njerëzore e politike, me demokracinë e lirinë e fjalës, të reagojnë kundër kësaj arrogance diktatoriale që po tenton të imponohet nga ana e Thaçit në Kosovë”, thuhet në reagim të VV-së.

16:39

Disa qytetarë e quajnë “hajn” Thaçin gjatë konferencës për media

Në kohën kur presidenti i Kosovës, Hashim Thaçi, po mbante konferencë pas votimit të Qeverisë Hoti, një grup qytetarësh e quante “hajn” të parin e shtetit.

Pas tentimit të tyre që të hyjnë në rrethojat e oborrit të Kuvendit, ku Thaçi po mbante konferencën për media, ka ndërhyrë Policia e Kosovës.

Ndërkohë aktivistë të Lëvizjes Vetëvendosje, sipas KosovaPressit, pretendojnë se një anëtar i tyre është goditur nga katër persona, që kishin ardhur nga oborri i Kuvendit gjatë konferencës së Thaçit.

Në fotografi shihet se një aktivist i VV-së është shoqëruar në polici.

Në këtë konferencë, Thaçi uroi Qeverinë Hoti, teksa kërkoi nga Qeveria në largim të bëjë pranim-dorëzim të lehtë të detyrave.

Sot gjatë ditës, disa qytetarë protestuan vazhdimisht në kohën kur në Kuvend u votua pro Qeverisë Hoti.