1 perditesime
16:28

Thaçi kërkon nga Kurti të lirojë zyrën “e uzurpuar”

Presidenti i Kosovës, Hashim Thaçi, ka kërkuar nga Albin Kurti të lirojë zyrën “e uzurpuar” të kryeministrit për të sapozgjedhurin kryeministër, Avdullah Hoti.

Në një konferencë për media, Thaçi ka thënë se “barrikadimi nuk i bën nder askujt”.

“Nga Kurti kërkohet pranim-dorëzim sa më i lehtë i detyrës te Qeveria Hoti. Kërkohet të heqë dorë nga barrikadimi në zyrën e uzurpuar. Barrikadimi i tij nuk i bën nder as atij, as partisë së tij, as shtetit të Kosovës e as demokracisë. Pas shkarkimit ai po bëhet edhe më qesharak. Kërkoj të punojmë të gjithë bashkë për të ardhmen evropiane, partneritetin me SHBA-në, për zhvillim ekonomik, rritje të mirëqenies sociale e një të mirë të gjithmbarshme në vend”, ka thënë ai.

Thaçi ka thënë se është i hapur t’i japë këshilla e rekomandime çdo kujt që i kërkon, kur është pyetur për deklaratën e deputetit Haxhi Shala që tha se është bindur nga presidenti dhe kreu i AAK-së, Ramush Haradinaj, për të votuar për Qeverinë Hoti.

“Jam president dhe e kam obligim të takohem me të gjithë bartësit e institucioneve. Me të gjithë përfaqësuesit legjitimë dhe çdo deputet ka legjitimitetin e vet dhe nuk refuzoj së diskutuari për çështjet madhore me ata që pajtohen, por edhe ata që s’pajtohen. Në eksperiencën time, jo rrallë jap rekomandime e këshilla secilit që kërkon se çka i bën mirë vendit e zhvillimit. Jo vetëm deputeti në fjalë, por kushdo që do të kërkonte këshillë nga unë do ta këshilloja të votojë për demokracinë e zhvillimin ekonomik”, ka shtuar Thaçi.

Thaçi në fund ka thënë se është jetike që “ndërmarrja kriminale e Kurtit, përmes përfaqësuesve legjitimë mori përgjigjen e duhur, adekuate, të drejtpërdrejtë e natyrisht për të shkuar në shtëpi”.

13:36

Thaçi uron Qeverinë Hoti, i ofron bashkëpunim

Presidenti i vendit Hashim Thaçi, ka përgëzuar deputetët për votimin e Qeverisë së re në krye me Avdullah Hotin.

Ai e ka uruar atë dhe i ka ofruar bashkëpunim.

“Kjo është një ditë e rëndësishme për demokracinë tonë dhe për qytetarët e vendit. Qeverisë së re i uroj sukses në përmbushjen e programit qeverisës dhe i ofroj bashkëpunim të plotë në jetësimin e agjendës kombëtare dhe ndërkombëtare. Me bashkëpunim dhe koordinim ndërinstitucional mund ta rimëkëmbim ekonominë tonë dhe të lëvizim me hapa më të shpejtë drejt integrimit euroatlantik, duke e fuqizuar partneritetin me SHBA-në dhe me të gjitha shtetet mike”, ka shkruar Thaçi.

Me 61 vota për, 24 kundër e 1 abstenim, sot është votuar Qeveria Hoti.