23:51

Haziri mendon se duhet të shkohet drejt imunizimit publik

Lutfi Haziri, kryetari i Komunës së Gjilanit, vlerëson se ka ardhur koha që të shkohet në drejtim të një imunizimi publik sa i përket koronavirusit.

Kreu i Gjilanit, thotë se me mbyllje hermetike nuk mund të luftohet kjo pandemi, por me lirim të masave kufizuese dhe me shtim të kujdesit, duke përdorur maska dhe masa tjera mbrojtëse në publik.

“Distancimi social ka dhënë efekte, por kemi neglizhuar distancimin në familje. Kam thënë edhe më herët ‘mos shko dhe mos prano mysafirë’. Ndryshe besoj se ka ardhur koha që të fillohet me imunizim publik”, ka thënë Haziri në Interaktiv të KTV-së.

Ai shpjegon se imunizimi publik nuk nënkupton heqjen dorë nga masat dhe kujdesi i shtuar. Madje, sipas tij, masat mbrojtëse duhet të bëhen kulturë në jetën publike tash e tutje.

“Hapja e sektorëve të mëdhenj të ekonomisë e ka tregu qartë se nuk kemi raste të reja, nuk janë burim i infeksionit, pasi është punuar sipas udhëzimeve. Duke e hapur edhe sektorin e shërbimeve shkojnë drejt një imunizimi publik, nuk mundemi me luftu këtë pandemi nëse mbyllemi hermetikisht”, ka thënë Haziri.

Nënkryetari i LDK-së, tha se me përjashtim të një rasti, të gjithë të tjerët burimin e infeksionit e kanë në familje. Aty sipas tij, nuk është bërë distancomi i duhur.

“Praktikisht nëse analizohen rastet, gjitha burimet e infeksioneve janë në familje, pos një rasti në Pediatri. Apeloj të mësohemi të dalim me masa mbrojtëse, të mos marrim shërbime nga njerëzit që nuk përdorin masa mbrojtëse dhe kështu gradualisht të bëjmë një imunizim publik”, ka shtuar ai.

Një politikë e ngjashme është aplikuar edhe në Suedi. Haziri thotë se Kosova nuk ka kushtet e saj, por ka moshën e re të popullatës.

23:36

Për rastet e reja me koronavirus në Gjilan, Haziri fajëson personelin shëndetësor të një klinike në Prishtinë

Kryetari i Gjilanit, Lutfi Haziri, ka fajësuar një klinikë private shëndetësore në Prishtinë se është burim i ri i infeksioneve me koronavirus në Gjilan.

Sipas tij, rikthimi i rasteve është për shkak se një infermiere nga Gjilani ishte infektuar në vendin e saj të punës në Prishtinë dhe bashkë me një lehonë e familjet e tyre kanë rritur numrin ditëve të fundit.

Nga 24 rastet e reja me COVID-19 të martën, 14 ishin nga Gjilani.

“Ky është burimi i katërt në këto ditë të menaxhimit kundër COVID-19. Rikthimi është shkaku i një infektimi të një infermiere në një klinikë private në Prishtinë. Së bashku me një lehonë e natyrisht me kontaktet me familjarët e tyre dhe është rritur numri e nga 67 teste 14 të realizojnë të prekur pozitivë me koronavirus. Nesër do të vazhdojë vala e fundit e kontaktit për të mbyllur burimin e katërt të koronavirusit në Gjilan”, ka thënë ai në Interaktiv.

“Ky burim i katërt i virusit në Gjilan s'është si pasojë e shkeljes së masave nga qytetarët, por nga personeli mjekësor i një klinike private. Burimi del nga një spital privat. Dy rastet e fundit, burimet janë nga institucionet e kjo ka qenë frika nga fillimi që të mos preken institucionet. Kam pa një reagim të një klinike private e cila ka aluduar që burimi i infeksionit është në Gjilan, por nuk qëndron sepse personi që ka shkuar të lindë në Prishtinë ka shkuar me termin të mjekut, ka lindur natyrshëm, por më pas ka rezultuar pozitive pasi u konstatua se një infermiere nga Gjilani dhe një nga Obiliqi dolën pozitive”, ka thënë tutje Haziri.

Ai ka bërë të ditur se është rekomanduar që Pediatria në Gjilan të nisë punën pasi një pjesë e stafit kanë rezultuar negativë.

Gjilani deri sot i ka 75 të infektuar, 46 janë shëruar plotësisht, dy vdekje e i kemi raste aktive 26.