1 perditesime
09:37

Bashkë me nënën shtatzënë ka vdekur edhe foshnja

Bashkë me shtatzënën që ishte infektuar me koronavirus dhe vdiq në Klinikën Infektive, ka vdekur edhe foshnja e saj.

KOHA nga burime të saja ka mësuar se edhe foshnjës i ishte përkeqësuar gjendja qysh mbrëmë dhe kësisoj ka vdekur.

Edhe ish-kryetarja e Gjakovës e ka konfirmuar duke bërë thirrje te qytetarët për kujdes të shtuar.

“Ngushëllime familjes dhe gjithë të njohurve të saj. Vdekja e dyfishtë e nënës dhe bebes së saj të palindur, shton pikëllimin dhe ngritë alarmin për pasojat e infeksionit”, ka shkruar Kusari-Lila.

MSH-ja në njoftimin për media nuk e ka sqaruar fatin e foshnjës.

08:51

Vdes shtatzëna me koronavirus në Infektivë

Pacientja shtatzënë e prekur me koronavirusin Covid-19 që ishte e shtruar në Klinikën Infektive ka vdekur mëngjesin e sotëm.

Lajmin e ka konfirmuar Klinika Infektive.

“Klinika Infektive e QKUK-së njofton se gjatë orëve të para të datës 21. 04. 2020 në Mjekimin Intensiv të kësaj klinike ka ndërruar jetë pacientja V.P. me vendbanim në Gjakovë (1980) e diagnostikuar me Covid-19. E njëjta, ishte shtatzënë dhe po trajtohej në mjekimin intensive të klinikës që prej datës 15 prill 2020”, përfundon njoftimi.

Gruaja shtatzënë kishte pasur përkeqësime prej kur ishte shtruar në Infektivë, derisa nuk është bërë e ditur për gjendjen e foshnjës.

Deri tash në Kosovë janë të infektuar 598 persona derisa 16 kanë vdekur dhe 123 janë të shëruar.

Sipas QKUK-së, kjo është vdekja e 13-të e pacientëve me Covid-19 në këtë klinikë dhe e 16-ta në nivel të shtetit.