Instituti Epik përmes një komunikate për media, ka thënë se e ka mirëpritur emërimin Miroslav Lajçakut në postin e përfaqësuesit të veçantë të BE-së për dialogun Kosovë-Serbi nga Këshilli i BE-së.
Ata thonë se mirëpresin edhe vullnetin e unifikuar politik të 27 vendeve anëtare të BE-së, për ta avancuar perspektiven Evropiane të Kosovës dhe gjithë rajonit.
“Sot, Këshilli i Bashkimit Evropian emëroi, Miroslav Lajçak Përfaqësues të Veçantë të BE-së për Dialogun Prishtinë-Beograd. Emërimi i sotëm ndodh në kuadër të konfirmimit të mbështetjes së Kancelares Merkel për dialogun për normalizimin e marrëdhënieve në mes Kosovës dhe Serbisë, të udhëhequr nga Bashkimi Evropian. Ky është një momentum i ri në procesin integrues të Kosovës i cili duhet të jetë bazë për avancimin e rrugës integruese të Kosovës dhe jetësimit të vullnetit të 90% të qytetarëve”, thuhet në njoftim.
Sipas tyre, emërimi i sotëm i Lajçak përfaqëson unifikimin dhe intensifikimin e vëmendjes politike të BE-së për të përkrahur arritjen e një marrëveshje gjithëpërfshirëse, ligjërisht të obligueshëm për normalizimin e plotë të marrëdhënieve në mes Kosovës dhe Serbisë e cila do të hap rrugë për anëtarësim në BE.
“Ndërkohë, Qeveria e Kosovës ka hequr në tërësi tarifë 100% ndaj produkteve të Serbisë. Vendimi i Qeverisë për heqjen e tarifës 100% siguron që Kosova të respektoj obligimet që burojnë nga procesi integrues, avancon bashkëpunimin rajonal dhe krijon mjedis të nevojshëm politik për avancimin e perspektives Evropiane të Kosovës. Rrjedhimisht, Përfaqësuesi i Lartë i BE-së, z. Josep Borrell Fontelles ka mirëpritur heqjen e tarifës. Ndërkohë, po ashtu, Gjermania, Franca, Italia dhe Mbretëria e Bashkuar e kanë përshëndetur vendimin për heqjen e tarifës dhe kanë ofruar mbështetje për dialogun e ndërmjetësuar nga Bashkimi Evropian në mes Kosovës dhe Serbisë”, thuhet në njoftim.
EPIK thotë se “Rritja e interesit politik të vendeve kyçe anëtare të BE-së për avancimin e dialogut Kosovë-Serbi është në përputhje me angazhimin e shtuar të BE-së, dhe SHBA-ve, në Ballkanin Perëndimor pas arritjes së Marrëveshjes së Prespa-së dhe shtyrjes së reformave të pa precedenta në sistemin e drejtësisë në Shqipëri me qëllim të nisjes së negociatave të anëtarësimit në BE”.
Në këtë drejtim, Instituti EPIK ka bërë thirrje te të gjithë spektri politik i Kosovës të bashkëngjiten suksesit të vendeve të rajonit në ndërmarrjen e reformave të kërkuara nga BE-ja me qëllim të avancimit të rrugës integruese të Kosovës.
“Rrjedhimisht, dëshirojmë të nënvizojmë rendësin jetike që BE-ja ka në udhëheqjen e dialogut për normalizimin e marrëdhënieve në me Kosovës dhe Serbisë. E ardhmja e Kosovës është në Bashkimin Evropian. BE mbetet larg mbështetës më i madh financiar dhe ekonomik i Kosovës dhe rajonit. Anëtarësimi në BE është konsensus më sublim i qytetarëve të vendit, me ç’rast 90% e qytetarëve dëshirojnë anëtarësimin në BE”, thuhet tutje në njoftim.
Instituti EPIK ka ftuar gjithë spektrin politik për krijimin e unitetit të brendshëm për avancimin e dialogut për normalizimin e marrëdhënieve si kriter kyç formal për të jetësuar aspiratat e qytetareve të Kosovës për anëtarësim në BE.
“Njëkohësisht, ftojmë spektrin politik që të tregojnë pjekurinë dhe guximin politik për të ulur në tavolinë me qëllim të definimit të interesave kyç të shtetit të Kosovës në kuadër të dialogut për normalizimin e marrëdhënieve. I gjithë spektri politik duhet të tregoj unitet të plotë në kuadër të dialogut për normalizimin e marrëdhënieve, pasi që dialogu nuk do të merr fund me asnjë qeveri të vetme. Arritja e një marrëveshje për normalizimin e marrëdhënieve me Serbinë do të jetë fillimi i normalizimit të marrëdhënieve mes të dy vendeve - jo fundi i tij. Në fund, bëjmë thirrje që të mos keqpërdoret dialogu për normalizimin e marrëdhënieve të udhëhequr nga BE-ja për konfrontim me aleat të shenjtë të Kosovës: BE-në, SHBA-në dhe Mbretërinë e Bashkuar. Historia ka dëshmuar se Kosova ka fituar çdo herë kur ka qenë shtyllë unifikuese e aleatëve të shenjtë perëndimor – jo faktor përçarës”, ka thënë EPIK përmes një komunikate për media.
Për emërimin e Lajçakut ka reaguar edhe kreu i AAK-së, Ramush Haradinaj.
“Këshilli i Evropës sapo emëroi zyrtarisht përfaqësuesin për dialogun Kosovë-Serbi. Në fazën e finales së madhe të dialogut dhe rolin udhëheqës të SHBA-së, BE-ja është duke zvarritur procesin”, ka shkruar ai në Twitter.
© KOHA. Të gjitha të drejtat janë të rezervuara.
