“IuteCredit” çon Kosovën në Arbitrazh Foto: Driton Paçarada / KD

“IuteCredit” çon Kosovën në Arbitrazh

29 February 2020 13:47

Kompania financiare “IuteCredit”, ka dërguar Republikën e Kosovës në Gjykatën Ndërkombëtare të Arbitrazhit, pasi Banka Qendrore (BQK) ia ka revokuar licencën muaj më parë.

BQK-ja ka mbyllur “IuteCreditin” dhe “Monegon” në fillim të dhjetorit të 2019-s, duke thënë se funksiononin me norma të interesit jashtë çdo standardi.

Në një publikim nga “globalarbitrationreview”, të premten mbrëma, thuhet se kompania estoneze tashmë ka dërguar padinë ndaj Kosovës, pasi që Banka Qendrore ia ka revokuar licencën e biznesit të degës së saj, për shkak të normave të larta të interesit. Ndërsa në një njoftim paralajmërues më 26 shkurt, “IuteCredit” ka thënë se kompania amë ka paraqitur kërkesën për arbitrazh para Gjykatës Ndërkombëtare të Arbitrazhit, meqenëse Banka Qendrore e Kosovës nuk ka dhënë shpjegim apo zgjidhje në lidhje me revokimin e papritur dhe të paligjshëm të licencës së ‘IuteCredit Kosova.

Sipas njoftimit, kryeshefi ekzekutiv i “IuteCredit Europe”, Tarmo Sild, ka thënë se “revokimi i licencës afariste në një kohë kur portfoli i kredisë së degës lokale ishte rreth 12 milionë euro të shpërndara në 25.000 kredi përbën shkelje të obligimeve të Kosovës të përcaktuara në Ligjin për Investimet e Huaja, meqenëse nuk ka pasur ndonjë arsye valide për një veprim të tillë”.

Ai kishte thënë se kjo kompani ka përjetuar humbje që duhet të kompensohen, e se shuma specifike do të përcaktohet në këtë arbitrazh.

Pos “IuteCreditit”, licenca e biznesit i ishte marrë edhe “Monegos”. Koha.net ka mësuar se ky institucion ende nuk ka dërguar Kosovën në arbitrazh, e se po insiston që t’i shterë të gjitha mjetet ligjore në kuadër të sistemit ligjor në Kosovë, para se të kërkojë kompensim me padi në Arbitrazh.

Koha.net ka tentuar të marrë një prononcim nga BQK-ja, mirëpo kjo ishte e pamundur. Por zyrtarë të BQK-së, në një përgjigje për VOA kanë thënë se janë të gatshëm të mbrojnë vendimet.

“Banka Qendrore e Kosovës vlerëson dhe është e bindur se vendimi është plotësisht në pajtueshmëri me kornizën ligjore në fuqi dhe është e gatshme të mbrojë këto vendime në cilëndo gjykatë që paraqitet nevoja”, kishte thënë zëdhënësi i BQK-së, Kushtrim Ahmeti për VOA.

Kohë më parë Koha Ditore pati shkruar për rastin: Piratët 2.0

© KOHA. Të gjitha të drejtat janë të rezervuara.

Komentet

Shto koment

Të ngjashme