Zyra në të cilën për disa javë është diskutuar për harmonizimin e programit qeverisës, këtë të hënë ishte mbushur me anëtarë të Lëvizjes Vetëvendosje.
Kësaj radhe që të gjithë ishin fokusuar në përcjelljen e seancës së Kuvendit të Kosovës, në të cilën kryetari i tyre është zgjedhur në krye të Ekzekutivit, raporton KTV.
Dhjetëra aktivistë të Vetëvendosjes, me brohoritje e duartrokitje shoqëruan secilin veprim të Kurti e të përfaqësuesve të partisë së tij në legjislaturën e shtatë.
E më emocionuesi ishte momenti i votimit të Kurtit si kryeministër i Kosovës.
Aktivistë nga kjo parti e kanë quajtur ndjenjë të papërshkrueshme votimin e Qeverisë së udhëhequr nga Kurti.
Disa nga aktivistët e Lëvizjes Vetëvendosje, të cilët gjatë ditës qëndruan në selinë e kësaj partie, janë anëtarë të saj që nga themelimi.
© KOHA. Të gjitha të drejtat janë të rezervuara.
