Deputetët e Listës Serbe kanë mbërritur në seancën ku pritet të votohet kabineti i Qeverisë Kurti.
Këta deputetë janë deputetët e fundit që kanë mbërritur në seancë.
11:41
Kurti e Konjufca hyjnë në seancë
Lideri i Lëvizjes Vetëvendosjes, Albin Kurti dhe nënkryetari i Kuvendit i cili pritet ta lëshojë sot këtë pozitë, Glauk Konjufca, kanë mbërritur në seancë.
Konjufca është propozuar për ministër të Punëve të Jashtme.
11:41
Edhe deputetë të minoriteteve arrijnë në Kuvend
Deputetë të komuniteteve kanë arritur në sallën e Kuvendit të Kosovës.
Minoriteteve u takojnë tri nga 15 ministritë në Qeverinë Kurti.
11:38
Mbërrijnë në seancë deputetët e PDK-së
Në seancën ku pritet të votohet kabineti i Qeverisë Kurti, kanë mbërritur edhe deputetët e partisë më të madhe opozitare, asaj të PDK-së.
Seanca e cila pritej të fillonte në orën 11:00, nuk ka nisur ende, për shkak të mungesës së deputetëve.
Kujtojmë se PDK-ja ka deklaruar se nuk do ta votojë këtë qeveri.
11:23
Në Kuvend mbërrin edhe Kosnett
Ambsadori amerikan Philip Kosnett do të jetë i pranishëm në seancën ku pritet të zgjidhet qeveria e re e Kosovës.
Ai është parë duke hyrë në ambientet e Kuvendit të Kosovës.
Para tij, kanë mbërritur në Kuvend edhe shefja e Zyrës së Bashkimit Evropian në Kosovë, Nataliya Apostolova dhe ambasadori britanik Nicholas Abbott./ksp/
11:13
Në Kuvend arrin edhe Agim Veliu i propozuar për ministër të Brendshëm
Kryetari i Podujevës, Agim Veliu, ka arritur në sallën e Kuvendit të Kosovës, pasi ai është propozuar për t’u bërë ministër i Punëve të Brendshme në Qeverinë Kurti.
Siç raporton KTV, Veliu fillimisht s’dinte as ku të ulej për shkak se nuk është deputet.
Me zgjedhjen e tij si ministër, Podujeva do të shkojë në zgjedhje të jashtëzakonshme.
10:53
Deputetë të LDK-së hyjnë në sallën e Kuvendit
Deputetë të Lidhjes Demokratike të Kosovës kanë hyrë në sallën për mbajtjen e seancës në të cilën pritet votimi i qeverisë së re të Kosovës, nga koalicioni VV-LDK.
Kjo parti pritet të ketë gjashtë ministri nga 15 sa do t’i ketë Qeveria Kurti.
10:39
Deputetët e Listës Serbe hyjnë në Kuvend
Edhe deputetët e Listës Serbe kanë arritur në Kuvendin e Kosovës. Ata kanë thënë dje se kanë vendosur të mos e përkrahin qeverinë e re.
Lista Serbe do të marrë pjesë në institucionet e Kosovës, pavarësisht se nuk do ta mbështesë qeverinë.
10:18
Vjosa Osmani arrin në Kuvendin e Kosovës
Deputetja e LDK-së, Vjosa Osmani, ka arritur në hapësirën e Kuvendit të Kosovës, pak para nisjes së seancës plenare për votimin e Qeverisë Kurti.
Osmani pritet të marrë postin e kryeparlamentares, si pjesë e marrëveshjes për bashkëqeverisje VV-LDK.
10:03
Në Kuvend arrijnë deputetët e parë
Kanë mbetur pak më shumë se një orë deri në fillimin e seancës ku pritet të zgjidhet qeveria e re e Kosovës.
Në ambientet e Kuvendit tashmë kanë arritur deputetët e parë.
Aty është parë deputetja e Partisë Demokratike të Kosovës, Blerta Deliu. Po ashtu, ka mbërritur edhe deputetja e komunitetit boshnjak Dude Balja. Në Kuvendin e Kosovës është parë duke hyrë edhe kandidati për ministër të Financave, Besnik Bislimi. Po ashtu, në Kuvend ka hyrë edhe Rrezarta Krasniqi deputete e Lidhjes Demokratike të Kosovës, raporton KP.
