2019-a është vlerësuar vazhdimisht si vit i cili duhet harruar sa u përket politikave të Bashkimit Evropian ndaj Kosovës.

As në këtë vit që shkoi, qytetarët nuk fituan liberalizimin e vizave, premtim shumëvjeçar i politikanëve kosovarë, por edhe i vetë BE-së, raporton KTV.

Por, dikush po pret që prej këtij muaji e deri në mes të 2020-s, kjo gjendje të ndryshojë, tani kur një shtet mik i Kosovës, Kroacia, ka marrë drejtimin e BE-së.

Mirëpo, mendim të kundërt me qytetarët kanë personat që përcjellin zhvillimet në BE.

Demush Shasha nga Instituti EPIK, thotë se në planprogramin e Kroacisë për mandatin 6-mujor, askund nuk përmendet liberalizimi i vizave për Kosovën.

Dy synimet kryesore të Kroacisë, sipas Shashës, janë organizimi i konferencës për Ballkanin në maj, për të tejkaluar bllokimin e Francës në procesin e zgjerimit dhe hapja negociatave të zgjerimit me Shqipërinë dhe Maqedoninë e Veriut.

Meqë çështja e Kosovës nuk është prioritet për Kroacinë, korrespondenti i Grupit Koha në Bruksel, Augustin Palokaj, thotë se për vizat duhet të pritet pjesa e dytë e vitit, atëherë kur Kroacia ia dorëzon kryesimin Gjermanisë.

Ndërkohë, të mërkurën edhe Shqipëria mori kryesimin e OSBE-së, Organizatës për Siguri dhe Bashkëpunim në Evropë.