Italia thotë se po punohet për një konferencë donatorësh për Shqipërinë e goditur nga tërmeti

Italia thotë se po punohet për një konferencë donatorësh për Shqipërinë e goditur nga tërmeti

11 December 2019 17:42

Ministri i Jashtëm i Italisë, Luigi Di Maio, tha se Italia do ta ndihmojë Shqipërinë për të bërë një vlerësim paraprak të dëmeve nga tërmeti i 26 nëntorit, për të pasur kështu një situatë më të qartë edhe në Konferencën e Donatorëve ku vendet e BE-së do të solidarizohen me ndihma për vendin Shqipërinë në muajin shkurt.

Di Maio nuk la jashtë vëmendjes as situatën politike në Shqipëri kur kërkoi që të gjitha palët të angazhohen në rivendosjen e një klime dialogu që të mos komprometojë rrugëtimin e vendit tonë në Integrimin Evropian.

“Motivi kryesor për të cilën ndodhem këtu, jo vetëm për të kultivuar më tej miqësinë historike mes dy vendeve, por edhe për shprehur solidaritetin e palës italiane pas tërmetit të 26 nëntorit, gjithashtu për të shprehur edhe mbështetjen e Emergjencave Civile Italiane dhe të qeverisë për integrimin e Shqipërisë në BE. Unë vizitova një kamp të çadrave të ngritur nga departamenti i emergjencave italiane në Vorë, ku ndodhen të strehuar 300 shqiptarë, ku firmosa procesverbalin e dhurimit të materialeve nga ana e mbrojtjes civile italiane. Me këtë frymë, i theksova kryeministrit mbështetjen e Italisë në rrugëtimin evropian të Shqipërisë dhe Maqedonisë së Veriut. Italia insiston mbi nevojë e një vendimi pozitiv për të dyja vendet për të përcaktuar edhe një datë për thirrjen e konferencës së parë ndërqeveritare dhe gjithashtu për një mandat për komisionin për të përgatitur kuadrin e negociatave. Të gjithë aktorët politikë të angazhohen edhe më tej në rivendosjen e një klime politike të tillë në mënyrë që të mos komprometojë rrugëtimin e integrimit evropian dhe të bëjë të mundur të shfrytëzohen potencialet në rritje të vendit, duke favorizuar një ulje të tensioneve dhe hapjen e kanaleve të përballjeve dhe dialogut”, tha Di Maio gjatë një konference për media në Tiranë bashkë me kryeministrin Edi Rama, shkruan Lexo.al.

Më tej, ministri i Jashtëm italian tha se BE-ja mund të bëjë më shumë dhe do të bëjë më shumë për Shqipërinë.

“Ato burime që u vunë në dispozicion përbëjnë hapin e parë të ndihmave, në ditët në vijim do të kemi rastin në takime të tjera, ku kryeministri Conte do të bëjë të pranishme ndihmesën që duhet t’i jepet Shqipërisë dhe kjo duhet të bindë Komisionin Evropian që duhet t’i qëndrojë afër Shqipërisë. Ne do të punojmë fuqishëm në Konferencën e Donatorëve, dhe do të vëmë në dispozicion teknikët tanë që të bëjnë vlerësimin paraprak të dëmeve të shkaktuara nga tërmeti në mënyrë që konferenca e donatorëve të ketë një kuadër të qartë situatës. Urojmë që Konferenca e Donatorëve të mund të bëhet në Tiranë, por ende më e rëndësishme është niveli i afërsisë që do të tregojnë të gjitha shtetet anëtare ndaj Shqipërisë. Është një rast dramatik, dhe shpreh ngushëllimet e mia. Kjo tragjedi përbën një rast që institucionet evropiane të shprehin afërsinë ndaj Shqipërisë, një vend mik për Italinë dhe BE-në. Puna që mund të bëjmë së bashku në luftën ndaj fenomeneve të paligjshme që në një farë mënyrë prekën gjithë zonën e Mesdheut. Sepse sikundër e thashë, ne luftojmë nëpërmjet implementimit të ligjeve të reja. Kemi ligj të ri për evazionin fiskal, korrupsionin, por puna e përbashkët mund të bëjë të mundur edhe rritjen investimeve nga sipërmarrësit italianë”, u shpreh ai.

Ai përshëndeti ambasadorin italian në Shqipëri i cili tha se ka punuar ngushtësisht me të gjitha institucionet shqiptare, dhe tha se ministria e jashtme italiane ka nevojë për praninë e tij.

Komentet

Shto koment

Të ngjashme