Jo vetëm për përfaqësuesja dhe tifozë kosovarë të futbollit po qëndrojnë në Çeki, këtë të enjte.
Atje, për vizitë zyrtare po qëndron edhe Auditori i Përgjithshëm i Kosovës, Besnik Osmani i shoqëruar nga zëvendës Auditori i Përgjithshëm, Ilir Salihu.
Zyra për media e këtij institucioni ka raportuar se të dy kanë zhvilluar vizitë pune në Zyrën Supreme të Auditimit të Çekisë, në Pragë, ku u pritën në një takim të veçantë nga Presidenti i këtij institucioni, Miloslav Kala.
Sipas njoftimit, “në këtë takim u bisedua për forcimin e mëtutjeshëm të bashkëpunimit në mes të dy Institucioneve Supreme të Auditimit; për procesin e zbatimit të marrëveshjes bilaterale, si dhe për involvimin e Zyrës Kombëtare të Auditimit në institucione të rëndësishme të auditimit në nivel rajonal dhe evropian”.
Në njoftim thuhet gjithashtu se Zyra Kombëtare e Auditimit e Kosovës dhe ajo e Republikës së Çekisë, në muajin maj të këtij viti, kanë nënshkruar memorandumin për bashkëpunim në fusha të rëndësishme profesionale midis dy institucioneve dhe synon shkëmbimin e praktikave të mira audituese.
Në Pragë, Auditori dhe zëvendësi i tij nuk kanë fluturuar direkt nga Prishtina, por nga Luksemburgu, ku po ashtu, mëngjesin e të enjtes kanë pasur takim pune. Zyra e Auditorit në një njoftim tjetër tregon se Osmani e Salihu zhvilluan vizitë zyrtare në Gjykatën Evropiane të Auditorëve (ECA), ku u takuan me kryetarin e ECA-së, Klaus Hainer Lehne.
Portali Koha.net ka provuar të vë kontakt me Besnik Osmanin, për të mësuar nëse vizita e tij dhe zëvendësit të tij në Çeki lidhet edhe me ndeshjen e futbollit, apo kjo është thjeshtë rastësi. Por të enjten mbrëma, kontaktin me Osmanin përmes telefonit e ka pasur të pamundur.
Kosova luan ndeshjen e rëndësishme në kuadër të kualifikimeve për Euro 2020, ndaj Çekisë në qytetin Plzen, jo shumë larg kryeqytetit, Pragës.
-
14 nëntor 2019 20:21
-
Shpërndaje në: