Letra plot zemërim e njerëzi e të refuzuarës për asistente në Fakultetin e Mjekësisë në Prishtinë

Letra plot zemërim e njerëzi e të refuzuarës për asistente në Fakultetin e Mjekësisë në Prishtinë

19 September 2019 10:56

Studentja e Fakultetit të Mjekësisë, Shqipdona Lahu përmes një statusi në Facebook ka reaguar në lidhje me vendimin e Këshillit të Fakultetit të Mjekësisë për angazhimin e personelit akademik, e ku Lahu ishte një nga kandidatet që i plotësonte të gjitha kushtet dhe ishte e vetmja me notën maksimale 10.0, por kjo nuk i ndihmoi të marrë detyrën që e pretendoi, përcjell KultPlus.

Më poshtë po ju sjellim reagimin e plotë të Shqipdona Lahut:

Vendim i turpshëm i Këshillit të Fakultetit të Mjekësisë!!

Se është kriminalizuar gjithçka në Kosovë u vërtetua edhe me vendimin e këshillit të FM për angazhimin e personelit akademik, me ç ‘rast unë si studentja me suksesin më të lartë në studime, prej ekzistimit të këtij fakulteti, nuk zgjedhem asistente në asnjërën prej tri lëndëve ku kam konkurruar, edhe pse isha e vetmja me notën maksimale (10.0).

Për shembull, në lëndën e Anatomisë angazhohen dy kandidatë, ku asnjëri nga ta, në dy provimet e kësaj katedre (Anatomi 1 dhe Anatomi 2) nuk ka notë më të lartë se nota 8. Vallë si do ia dalin këta me studentët?!

Është turp të anashkalohen kandidatët që në këto dy provime kanë nota maksimale!

Kjo tregon se edhe këtu ka nevojë për një task-forcë për luftimin e korrupsionit, klientelizmit, krimit të organizuar dhe anomalive tjera.

Për më tepër, kjo tregon më së miri nivelin në të cilin është katandisur arsimi në tërësi, e veçanërisht ai universitar, andaj nuk ishte e rastësishme gjetja e ORCA- s në të cilën potencohet se 72% e profesorëve të UP-së, nuk i arsyetojnë thirrjet e tyre akademike, e 45% prej tyre s’kanë asnjë punim shkencor të publikuar në revista të mirëfillta shkencore.

Deklarimi i Albin Kurtit se për të rregulluar gjendjen në arsim duhen dy mandate është më tepër se i saktë, është profetik.

Nuk dua ta kuptoni këtë brengë si problem timin, ngase ai më së paku është imi.

Kjo ishte mundësia e fundit dhe fjala që i kisha dhënë babait dhe familjes për qëndrim në Kosovë, ngase Universiteti Teknik i Mynihut më ka akorduar doktoraturën, me të përfunduar studimet.

Unë jam fitimtare, ju vuani që nuk jeni si unë!

Të gjithë ju, që në mënyrë direkte keni gisht në këto përzgjedhje, turpi u mbuloftë!

Po nuk gjetët ilaç në Kosovë kur të sëmureni, sepse vetë po i largoni kuadrot, mua do më gjeni në Mynih; e unë do kujdesem për ju aq mirë, sa ndërgjegjja t’u mundojë tërë jetën.

P.S. Nga ky shkrim imi nuk duhet të ndihen të prekur profesorët e vërtetë!

Komentet

vjollca23/09/2019 09:48

Ti qe pos inteligjences, njerzillekut dhe modestise paske lind me fat. Ke prindet jasht dhe mundesine te avancosh ne Europe gjegjesisht ne Gjermani. Po une me qindra e mija te tjera qe fati na denoi te mbetemi ne Kosoven e banditeve dhe injoranteve.

Ylber19/09/2019 13:46

E nderuara Shqipdonë, popullorqe thuhet "e paq shnetën e nafakën e m'arë". Shpresoj (dhe gjithsesi besoj) t'u plotesofshin deshirat dhe te deshiroj fat, sukses dhe perparim ne te gjitha fushat e jetes dhe na te tjeret te mund te krenohemi me ty dhe me te gjithe ata si ti. Ne fund, ishalla....ISHALLA (megjithate) kurrë s'ke me pase nevoje më me u marrë me ata njerez, qoftë as per ti mjekuar (qe eshte njeri nga qellimet e profesionit tend) per t'i turperuar; ata tashme jane te turperuar dhe gjithsesi nuk do te mjekohen ne kete vend. Mbetem unë e mijera qytetareve tjereve ne meshiren e "burdushave" me diplome fakulteti. Per fat te keq, jo vetem ne mjekesi. Ty rasti yt le të të sherbeje si shtytje per arritje maksimale, kurrsesi per zmbrapsje.

Teni19/09/2019 13:46

Te lumte Zonjushe e Nderuar! Filimisht te pergezoj dhe uroj per suksesin qe ke treguar gjate studimeve dhe per fjalet e perzgjedhura qe pershkruajne aq thelle indinjaten tende, ne keto momente te veshtira per ty! Eshte me te vertete per keqardhje qe populli yne ende nuk gjen force dhe vullnet per te luftuar keto dukuri negative jo vetem ne arsim, por ne te gjitha sferat e perditshmerise sone kosovare. Kjo apati dhe gjithe ky mosreagim sikur eshte bere mallkimi yne nga ndonje fuqi mbinatyrore!!! Ti kurre nuk je humbese, humbes jemi ne qe shikojme keto gjera si dicka normale, jemi mesuar te jetojme me te keqen dhe na duket si asgje!!! TY te uroj suksese te metutjeshme ne jeten tende dhe mos u ndal kurre ne luften tende per dijeni, ndergjegjesi, miresi dhe vlerat tjera qe na bejne te dallojme nga gjallesat tjera, pra te jemi njerëz me plote kuptimin e fjales, Te prifte e mbara

Shto koment

Të ngjashme