Ndonëse Kosova ka anuluar pjesëmarrjen në Samitin e Vishegradit në Pragë, aty është parë ambasadori i Kosovës, Arbër Vllahiu.

Kryeministri i Shqipërisë Edi Rama, ka publikuar një fotografi me kryeministra, por në mesin e tyre është parë edhe Vllahiu.

“Në Pragë me vendet e V4 (Polonia, Hungaria, Çekia, Sllovakia) dhe vendet e Ballkanit Perëndimor - Jo vetëm mbështetje totale nga V4 për çeljen e negociatave të Shqipërisë e Maqedonisë së Veriut me Bashkimin Europian, po edhe një plan veprimi për të realizuar këtë objektiv strategjik”, ka shkruar Rama.

Siç ka raportuar Koha.net, ministri i Jashtëm në detyrë i Kosovës Behgjet Pacolli, në shenjë proteste për deklarimet e presidentit çek se “e urren Kosovën dhe do ta tërheqë njohjen”, njoftoi mospjesëmarrjen e Kosovës në Samitin e Vishegradit në Pragë me kryeministrat e Ballkanit Perëndimor.

Në ndërkohë, kryeministri i dorëhequr Ramush Haradinaj mungesën e Kosovës në këtë Samit e arsyetoi me angazhimet në fushatën për zgjedhjet e parakohshme parlamentare, që do të mbahen më 6 tetor.

Lexo: Haradinaj arsyeton ndryshe mosshkuarjen në Samitin e Pragës

Situatën e bën më të mjegullt prania e ambasadorit të Kosovës në Pragë, Arbër Vllahiu, i cili shihet në një foto bashkë me kryeministrat e iniciativës së Vishegrandit me ata të Ballkanit Perëndimor.

Nuk ka sqarime nga Ministria e Jashtme e Kosovës për pjesëmarrjen e ambasadorit të Kosovës me kryeministrat në këtë Samit.