Ismaili: Kurti po i përulet “Profesorit” deri në servilosje Foto nga Facebook-u i Albin Kurtit

Ismaili: Kurti po i përulet “Profesorit” deri në servilosje

13 August 2019 15:56

Nënkryetari i PDK-së, Uran Ismaili, njëherësh ministër i Shëndetësisë, ka ironizuar takimin e sotëm të kryetarit të Lëvizjes Vetëvendosje, Albin Kurti me atë të LDK-së, Isa Mustafa.

Përmes një postimi në Facebook ia ka përmendur veprimet që Kurti i bënte kundër Mustafës, në kohën kur ky i fundit ishte kryeministër.

“Albin Kurti paska takuar Isa Mustafën. A thua si ndihen votuesit e VV-së të cilët Albin Kurti i tradhton duke iu lutur Isa Mustafës për partneritet?! Mbështetësit e tij janë tronditur nga fakti se ai e paska quajtur Isa Mystafën “profesor” dhe i paska uruar punë të mbarë dhe shëndet. Sa qesharake dhe sa ironike. Një kohë për të Isa Mustafa nuk ishte “profesor”, por shërbëtor i Rrahman Morinës, Aleksandër Vuçiqit dhe Ivica Daçiqit. Ishte “argat i Serbisë që po e bosnjëzon Kosovën dhe Esat Pashë që po i falë territore Malit të Zi”. Dikur e akuzonte me 72 dosje për krim të organizuar, sot e lajkaton me ofertë për koalicion. Ai tani po e sheh si shpresë njeriun që e akuzonte se “po e zbrazë Kosovën duke e mbytur perspektivën”. Në ditët e tij të arta të huliganizmit nuk i uronte Isa Mustafës punë të mbarë, por rrëzim të mbrapshtë e të dhunshëm. Nuk i uronte shëndet e jetë të gjatë, por qeverisje të shkurtër dhe fund të mjerë duke ia rrezikuar shëndetin me gaz lotsjellës”, ka shkruar Ismaili në Facebook.

LEXO EDHE: Mustafa e Kurti në takim

Ismaili thotë se Kurti, tash po “i përulet “profesorit” deri në servilosje”.

“E gjuante dhe e turpëronte me vezë në shtëpinë e demokracisë, në Kuvendin e Republikës së Kosovës dhe e sulmonte me molotovë në shtëpinë e tij familjare. Albin Kurti e shet veten si të dinjitetshëm e me integritet, por nga frika që të shkojë i vetëm në zgjedhje ai po i përulet “Profesorit” deri në servilosje. Për të prekur pushtetin ai është në gjendje të shndërrohet edhe në vegël të personit që e luftonte me metodat më të pamoralshme dhe më jodemokratike dhe me të cilin nuk e lidhë asnjë princip apo vlerë përpos frika nga PDK-ja dhe lakmia për privilegje. Megjithatë këto aleanca tepër joparimore vetëm se do ta rrisin mbështetjen qytetare për PDK-në. Rrugëtimi ynë drejt rikonfirmimit si forca më e madhe demokratike në vend është i pakthyeshëm. Ne mbesim rruga e vetme për luftimin e korrupsionit, nepotizmit dhe ndërtimit të një shteti që ofron ardhmëri të sigurt për të gjithë qytetarët e tij”, ka përfunduar postimin Ismaili.

© KOHA. Të gjitha të drejtat janë të rezervuara.

Komentet

Besa14/08/2019 15:21

O more Uran, po mundohesh me jua perkujtue senet e keqe a?

Shto koment

Të ngjashme