VV: Britania ripërsëriti qëndrimin kundër ndryshimit të kufijve

VV: Britania ripërsëriti qëndrimin kundër ndryshimit të kufijve

17 July 2019 11:47

Kryetari i Lëvizjes Vetëvendosje, Albin Kurti, i shoqëruar nga drejtuesi i Grupit Parlamentar, Glauk Konjufca dhe deputetet Saranda Bogujevci dhe Fitore Pacolli, pritën në takim delegacionin nga Mbretëria e Bashkuar të kryesuar nga Drejtori për Ballkanin Perëndimor në Foreign Office, Andrew Page, Susan Laffey, drejtuese e Sektorit të Analistëve, Ambasadori i Mbretërisë së Bashkuar në Kosovë, Ruairi O'Connell, dhe Samuel Paice, Sekretar Politik në Ambasadë.

Në këtë takim, siç njofton Vetëvendosja, Britania ka ripërsëritur qëndrimin kundër iniciativës për ndryshimin e kufijve.

Siç bëhet e ditur në kumtesën për media, në fillim të takimit Kurti e njoftoi Page për zhvillimet e fundit në Kosovë me fokus të veçantë situatën socio-ekonomike, siç thuhet aty, “mungesën e zhvillimit ekonomik, nivelin e lartë të papunësisë sidomos tek gratë dhe të rinjtë, nevojën për reformim të sistemit të drejtësisë dhe nevojën shumë të madhe të lidhjes së sistemit edukativ me ekonominë”.

“Në anën tjetër, Page tregoi interesimin e Mbretërisë së Bashkuar për t'i ndihmuar Kosovës në fushën e zhvillimit ekonomik përmes përkrahjes së ndërmarrësisë tek të rinjtë me interes të veçantë në fushën e shkencave kompjuterike dhe dixhitalizimit si dhe për të krijuar mundësi për të rinjtë që ata të mos largohen nga vendi. Po ashtu, Page njoftoi për dyfishimin e fondeve që ndanë Mbretëria e Bashkuar për rajonin e Ballkanit Perëndimor dhe dyfishimin e ekspertëve për të ndihmuar në luftimin e korrupsionit dhe krimit të organizuar e krimit kibernetik”, thuhet në komunikatë.

Ndër çështjet tjera për të cilat u diskutua, njofton Vetëvendosja, ishte Procesi i Berlinit, të arriturat dhe fushat ku duhet fokusuar në të ardhmen.

“Kurti sugjeroi se Procesi i Berlinit duhet të iniciojë një fond për zhvillim ekonomik të ngjashëm për Ballkanin siç ishte Plani i Marshallit për Evropën me fokus të veçantë në qytetet e ndara”, thuhet në kumtesë.

Sa i përket dialogut më Serbinë, thuhet në njoftimin e Vetëvendosjes, “Page ripërsëriti qëndrimin e Mbretërisë së Bashkuar e cila është kundër iniciativës për ndryshimin e kufijve”.

“Ndërsa, Kurti ritheksoi qëndrimin e Lëvizjes Vetëvendosje për një dialog të hapur nga poshtë-lartë për zhvillim si mënyrë për integrim e përparim”, përfundon komunikata.

Image

© KOHA. Të gjitha të drejtat janë të rezervuara.

Komentet

Shto koment

Të ngjashme