Kryetari i PDK-së, Kadri Veseli, nuk ka pranuar të flasë në lidhje me konkursin për noterë, të cilin e kanë kaluar anëtarë të partisë së tij, familjarë të tyre, por edhe një anëtar i familjes së tij.

Në konferencën për media ku prezantoi Muzaher Shalën si ministër të ri të Inovacionit dhe Ndërmarrësisë, Veseli nuk i është përgjigjur pyetjes së KTV-së për konkursin për noterë.

Derisa foli për ministrin e ri, Veseli tha se do ta vazhdojnë luftën kundër krimit dhe korrupsionit.

“Emërimi i Myzaferit dërgon mesazhin se ne në dekadën e re u japim hapësirën njerëzve të rinj dhe premtues. PDK është e vetmja që jep mundësi reale për të rinjtë. Do të vazhdojmë luftën e pakompromis kundër krimit dhe korrupsionit. Do ta udhëheqim Kosovën suksesshëm në dekadën e re”, ka thënë ai.