4 perditesime
11:20

Avokati i ish-këshilltarit të Veselit, fjalën hyrëse të prokurores Hajdari e quan “pamflet politik”

Avokati Kujtim Kërveshi, që e përfaqëson ish-këshilltarin e Kadri Veselit, Nijazi Kryeziun, ka thënë se ndjenë keqardhje se ku ka rënë Prokuroria Speciale.

“Kam obligim moral që të ju them se nuk ndihem i ofenduar prej fjalës hyrëse të prokurores. Ndoshta do të ndihesha i ofenduar prej dikujt që kisha mujt me pranu ofendimin, ama bash mu hiç nuk më vjen mirë që Prokuroria Speciale ka ranë në këtë nivel prej kur e kam themeluar këtë prokurori”, ka thënë ai.

Fjalimin e Hajdarit e ka cilësuar “pamflet politik”.

“Fjalimi i prokurores është pamflet politik. Ka munguar vetëm një kongres me duartrokitje të gjata”,ka thënë Kërveshi.

10:55

Avokati i Beqajt: Drejtësia është çfarë është në Kosovë për fajin e prokurores Hajdari dhe të shefave të saj

Avokati i ish-ministrit Besim Beqaj, Besnik Berisha, e ka përgëzuar trupin gjykues për durimin “të dëgjojë përralla dhe insinuata të prokurorisë”, por tha se “kam obligim etik dhe ligjor të theksoj që nëse gjendja e drejtësisë nuk është ajo çfarë duhet të ishte, është për fajin e kësaj prokuroreje këtu e deri të shefat e saj”.

“Fyerja që i bëhet avokatisë tregon dështimin e tyre. Kur të duan ua tregojmë ku kanë dështuar, qysh kanë dështuar, ku janë punësuar, qysh janë punësuar e qysh janë shkolluar”, ka thënë Berisha.

10:50

Avokati i Grabovcit thotë se Prokuroria Speciale ka shkelur ligjin në rastin “Pronto”

Avokati Florent Latifaj që e përfaqëson të akuzuarin Adem Grrabovci, ka thënë se në fund të kësaj procedure do të vërtetohet vetëm një gjë, që Prokuroria Speciale e ka shkelur ligjin në këtë rast.

Latifaj ka thënë se provat që janë përmendur në aktakuzë kanë qenë objekt i hetimit më herët dhe për këtë çështje ka pasur aktvendim për pushimin e hetimit. E sipas tij, proceduralisht provat e tilla nuk mund të përdorën sërish.

“Kjo mund të shihet edhe tek Komentari i Kodit të Procedurës Penale, tek neni 61 për çështjet res judicata (v.j çështje e gjykuar me parë) duhet ta këtë parasysh edhe prokurori edhe gjyqtari që të mos e trajtojë”, ka thënë Latifi.

Ai ka thënë se prokurorja Hajdari i ka bërë këtij trupi gjykues presion.

“Në fjalën hyrëse prokurorja e shtetit jo pa qëllim përmendi dy raste të cilat janë pjesë e procesverbalit tanimë. Në njërin nga rastet jam informuar që ky trup gjykues ka vendosur për pafajësinë e një zyrtari, të cilin e ka vërtetuar Apeli por që tash Supremja paska marrë vendim tjetër. Këtë nuk mundem me kuptu ndryshe pos si presion ndaj jush”, ka thënë ai.

Sipas Latifit, fjala hyrëse e Hajdarit është bërë në këtë mënyrë për një arsye. Sipas tij, kur një prokurore shërbehet me terme politike e të mediave, dëshmon që nuk ka prova, dhe sipas tij kur nuk ka prova mbahen fjalime të tilla për të arsyetuar dështimin e vet.

10:05

Rasti “Pronto”, prokurorja Hajdari “fajëson” gjykatën për krijim të sistemit të pandëshkueshmërisë

Është tensionuar seanca në rastin “Pronto”. Prokurorja Drita Hajdari në mënyrë indirekte ka “fajësuar” gjykatën.

Hajdari, që e përfaqëson këtë rast, ka thënë se të akuzuarit e rastit “Pronto” kanë krijuar sistem të pandeshkueshmërisë, raporton “Koha Ditore”.

Ka përmendur rastin e lirimit të Salih Mekaj dhe të Emin Beqirit.

Të dy këto raste, Gjykata Supreme ka konstatuar se dy shkallët e gjykatës i kanë liruar të pafajshëm në mënyrë të jashtëligjshme.

Hajdari në fjalën hyrëse ka thënë se “kanceri i papunësimit” përhapet çdo ditë e me shumë. Ajo ka folur për gjendjen ekonomike. Ka folur për stacionet e autobusëve të mbushur me punëtorë, për numrin e madh të të papunëve në Kosovë.

Megjithatë, kryetari i trupit gjykues ia ka ndërprerë fjalën duke i kërkuar që t’i prezantojë vetëm provat.

Hajdari ka thënë se “Pronto” ka dëshmuar se gjatë proceseve të punësimit në Kosovë, gjithçka duket që është ligjore por se prapavija është krejt tjetër.

“Kush janë njerëzit nga hija, nga prapaskena…. Janë ata që i shohim shpesh në publik, duken mirë, vishën me rroba të bukura”, ka thënë ajo.

Pas kësaj, të akuzuarit e rastit “Pronto” kanë reaguar.

Ka reaguar edhe kryetari i trupit gjykues, Shashivar Hoti. I ka thënë Hajdarit që të prezantojë provat.

Sërish Hajdari ka vazhduar fjalën duke folur në mënyrë indirekte për epilogun që mund ta këtë ky rast.

Sërish Hoti ia ka tërhequr vërejtjen duke i kërkuar të prezantojë provat.

Hajdari në mënyrë indirekte ka folur edhe për krerët e PDK-së, por se ka thënë se nuk kanë gjetur prova për ata persona që 11 të akuzuarit i kanë takuar e u janë referuar si “shef”, “i madh”.

09:07

Pritet të nis shqyrtimi gjyqësor i rastit “Pronto”

Pas konfirmimit të aktakuzës nga Gjykata e Apelit, sot pritet të nisë shqyrtimi gjyqësor në rastin ‘Pronto’, raporton Koha Ditore.

Seanca ende nuk ka filluar.

Protagonisti i kësaj afere, ish-deputeti I PDK, Adem Grabovci, ish-ministri i Inovacionit, Besim Beqaj dhe ish-këshilltari i Kryetarit të Kuvendit, Nijazi Kryeziu janë të pranishëm në sallë.