PDK s’përmend serbët, krenohet me “fitoren” ndaj partive shqiptare në veri

PDK s’përmend serbët, krenohet me “fitoren” ndaj partive shqiptare në veri

19 May 2019 19:59

Partia Demokratike e Kosovës pas mbylljes së vendvotimeve në katër komunat në veri të Kosovës, ku sot pati zgjedhje të jashtëzakonshme ka thënë se ka dalë fituese në mesin e partive shqiptare.

Duke mos përmendur fare partitë politike serbe, kjo parti ka thënë se është në epërsi të lartë ndaj partive tjera shqiptare. Kujtojmë se në zgjedhjet në veri kandiduan tri parti: PDK, Vetëvendosje dhe Lista Serbe.

“Zgjedhjet për kryetarin e komunës, në katër komunat e veriut, të mbajtura sot, me kandidatët e saj, Gonxhe Çaushi për Mitrovicë të Veriut, Shaqir Hetemi për Leposaviq, Hysen Mehmeti për Zubin Potok dhe Ilir Peci për Zveçan, nga informatat e deritashme kanë shënuar fitore kundrejt kandidatëve tjerë shqiptarë. Sipas informatave të para nga komisionarët, procesi zgjedhor në disa vendvotime, dëshmon epërsi të lartë të Partisë Demokratike të Kosovës, kundrejt partive tjera shqiptare”, ka thënë PDK-ja përmes një njoftimi për media.

Më pas PDK-ja ka treguar rezultatet që thotë se kanë dalë pas zgjedhjeve të sotme:

Kështu, në fshatin Lipë të Zveçanit, kandidati i PDK-së për kreun e komunës, Ilir Peci ka fituar 82 vota, kundrejt Vetëvendosjes, 5 vota.

Ndërsa në Zveçan, numri total i votave për PDK-në është 117, ndërsa Vetëvendosje ka marrë në koalicion me të gjitha partitë, 55 vota.

Ndërsa në Leposaviq, ku kandidat është Shaqir Hetemi, PDK-së, ka fituar 110 vota, kundrejt 62 votave.

Ndërsa në vendvotimin Kodra e Minatorëve, po ashtu, prinë kandidatja e PDK-së, Gonxhe Çaushi, 100 kundrejt 95. Në lagjen 7 Shtatori, Znj. Çaushi ka fituar 109 vota, kundrejt 33 votave të Vetëvendosjes dhe partive tjera në koalicion me të.

Në Zubin Potok, kandidati i PDK-së, për kreun e kësaj komune, Hysen Mehmeti, ka fituar 112 vota, kundrejt 98 votave të krejt partive shqiptare bashkë.

© KOHA. Të gjitha të drejtat janë të rezervuara.

Komentet

Shto koment

Të ngjashme