Kërkohet arrest shtëpiak për 11 gratë që u kthyen nga Siria, avokatet thonë se ato janë penduar

Luljeta Beselica Luljeta Beselica 23 April 2019 19:23

Nga qendra ku po mbahen në Vranidoll, së paku 11 gra të kthyera nga Siria javën e kaluar, janë paraqitur të martën para Gjykatës Themelore në Prishtinë.

Prokurorja Fikrije Fejzullahu ka propozuar masën e arrestit shtëpiak për to, pasi që dyshohen për organizim dhe pjesëmarrje në grupe terroriste në Siri.

Avokatet mbrojtëse të tyre, të gjitha gra, kanë thënë se klientet janë penduar për veprimet e tyre, duke shtuar se kanë qenë viktima të bashkëshortëve të tyre, raporton KTV.

Të tjera të dyshuara pritet të paraqiten në gjykatë, të mërkurën.

Të premten, janë kthyer 110 kosovarë nga Siria, në mesin e tyre 74 fëmijë

Tashmë katër burrave u është caktuar masa e paraburgimit për pjesëmarrje në grup terrorist dhe në ushtri apo polici të huaj.

Institucionet e Kosovës kanë bërë të ditur se në zonën e konfliktit në Siri, vazhdojnë të jenë 30 luftëtarë kosovarë, 49 gra dhe 8 fëmijë.

© KOHA. Të gjitha të drejtat janë të rezervuara.

Komentet

Shto koment

Të ngjashme