Matoshi në Stamboll: Mjedisi sfidë për rajonin

Matoshi në Stamboll: Mjedisi sfidë për rajonin

29 March 2019 16:38

Në hapje të konferencës ndërkombëtare për mjedisin “IREMCON III” në Stamboll të Turqisë, ministri i Mjedisit dhe Planifikimit Hapësinor, Fatmir Matoshi ka ftuar vendet e rajonit për bashkëpunim në çështjet mjedisore, dhe e ka vlerësuar mjedisin si sfidë të përbashkët të të gjithë rajonit.

“Secili nga ne ballafaqohet me sfida e probleme të ndryshme, nuk do të dëshiroja që politika të na ndajë në çështjet që ndërlidhen me mjedisin. Vendi im ka dalë nga një luftë vetëm njëzet vite më parë, tani ne festuam 11 vjet pavarësi, si shtet i ri u ballafaquam me rindërtimin e vendit të shkatërruar nga lufta, dhe për këtë arsye çështjet emergjente që kishim mund të na kenë lënë paksa mbrapa në çështjet mjedisore”, është shprehur Matoshi, bëhet e ditur përmes një komunikate për media.

Ai më tutje ka shtuar se, “megjithatë jam i lumtur që tashmë mjedisi është prioritet për vendin, kemi përfaruar legjislacionin tonë me BE-në, kemi ndërmarrë hapa konkret për mbrojtjen e mjedisit dhe po vazhdojmë përditë e më tepër ta bëjmë këtë gjë. Vetëm vitin e kaluar ne arritëm të pastrojmë mbi 900 deponi ilegale të mbeturinave, dhe mbi 30.000 mijë tonë mbeturina përgjatë fushatës për pastrimin e planetit. Për dy vite me radhë ne nga Kosova do të koordinojmë fushatën globale për pastrimin e tokës, dhe ky është një vlerësim i lartë për një vend që ka vetëm 11 vjet pavarësi”.

Ai ka kërkuar bashkëpunim rajonal.

“Nuk pres që rajoni ynë të ketë mjedis të shëndoshë për të jetuar, të kryej detyrat e tij kundër ngrohjes globale dhe të arrijë standardet e BE-së, nëse nuk punojmë bashkë si shtete të gjithë në rajon”, tha Matoshi

Në këtë konferencë marrin pjesë përfaqësues të lartë të shumë vendeve të botës, si dhe organizata të ndryshme mjedisore.

© KOHA. Të gjitha të drejtat janë të rezervuara.

Komentet

Shto koment

Të ngjashme