Vetëvendosje me parulla denoncuese: Gratë nuk mund të izolohen e përjashtohen

Vetëvendosje me parulla denoncuese: Gratë nuk mund të izolohen e përjashtohen

02 March 2019 18:51

Lëvizja Vetëvendosje ka denoncuar dhunën, e shfrytëzimin që u bëhet grave në Kosovë përmes disa grafiteve që ka bërë në Prishtinë.

Vetëvendosje thotë se situata e grave në vendin tonë, dallon prej situatës së gjithsecilit grup shoqëror dhe kjo për disa arsye.

“Së pari, ato nuk janë një shumë numerike lehtësisht të izolueshme, por përbëjnë gjysmën e popullsisë. Së dyti, roli i tyre në shoqërinë tonë është themelor dhe i pazëvendësueshëm. Dhe së treti, me gjithë rëndësinë që kanë për shoqërinë dhe jetën në këtë vend ato janë më të margjinalizuarat në rolet e tyre ekonomike e politike. Sot kemi gra amvise që punojnë e mbajnë një familje prej më shumë se pesë anëtaresh, e që për këtë punën të shumëfishtë, nga shteti fillojnë të kompensohet tek në moshën 65 vjeçare me një shumë simbolike, kjo është e papranueshme”, thotë VV, transmeton Koha.net.

Sipas Vetëvendosjes situata e grave është e dallueshme nga ajo e secilit grupi tjetër shoqëror edhe për një arsye që tek së fundi ka filluar të marrë më shumë vëmendje e që lidhet me dhunën që ushtrohet ndaj tyre.

“1496 raste të viktimave të dhunës i kemi vetëm brenda një viti, e këtu sa e sa thirrje të tjera e raste të raportuara – thirrje të humbura që e lënë mbrapa atë shifër. Nga shteti dhe institucionet vendore përveç se nuk kemi ndonjë masë, kemi edhe përpjekje aktive për mbylljen e strehimoreve për gra, nën arsyetimin e disa faturave të energjisë apo ndonjë shërbimi tjetër. Pra, një faturë të pambarimtë për to. Kjo është e palejueshme”, thotë Vetëvendosje.

Më tutje thuhet se në këtë situatë ku secili ka një peshë të veten, aktivistët dhe aktivistet e Lëvizjes Vetëvendosje vendosën ta përcjellin një kumtim të vjetër, të shkruar nga njëra prej aktivisteve që e shtruan përvojën e parë të barazisë mes një transformimi shoqëror dhe politik, Roza Luksemburgu, e cila kishte thënë se “kush nuk lëvizë nuk ndien prangat”.

“Po nuk lëvizëm bashkarish, si burra ashtu edhe gra, drejt një situate ku ka më shumë barazi e drejtësi shoqërore, atëherë do ngecim për kohë të gjatë në këtë qetësi të prangave që nuk bëjnë zë - as për faturat që na ngarkohen, e as për borxhet që kemi”, thotë Vetëvendosje.

© KOHA. Të gjitha të drejtat janë të rezervuara.

Komentet

Shto koment

Të ngjashme