Gecaj: LDK s’është kundër taksës, Qeveria pa koordinim me SHBA-në

Zogiani: Koalicioni qeverisës paska pasur marrëveshje që presidenti ta udhëheqë dialogun

29 January 2019 20:31
21:31

Avni Zogiani nga Vetëvendosje ka deklaruar se ky koalicion qeverisës paska pasur marrëveshje me presidentin që ta udhëheqë dialogun me Serbinë.

Në Rubikon të KTV-së ai ka thënë se shteti nuk përfaqësohet me ekip gjithëpërfshirës, por në mënyra të tjera.

“Qysh në fillim ky koalicion paska pasur marrëveshje që presidenti me udhëheq këtë proces të dialogut e kryeministri me improvizuar një ekip negociator. Shteti përfaqësohet në mënyra tjera e jo me ekip gjithëpërfshirës. Pse Serbia nuk ka pasur kurrë ekip po gjithë me një person. A doni me u ndal veç te taksa? Duhet me u nis prej marrjes përgjegjësisë së kryeministrit", ka thënë Zogiani.

Ai ka shtuar se kryeministri duhet me marrë përgjegjësi në këtë proces.

Sipas Zogianit, marrëveshja e hartuar nga kryeministri Haradinaj u shpërnda në gjuhë angleze meqë u shkrua nga konsulentë, siç tha ai, që nuk e kanë kryer as shkollën.

“Ju keni qit në tavolinë gjithçka, aty ju e keni shti në negociata Kosovën. E keni marrë një dokument ku i diskutoni të gjitha fushat. Kosova nuk shkon më lart se ai dokument. Ai dokument është shpërnda në anglisht sepse nuk është bërë nga qeveria e Kosovës por nga konsulentë”, ka thënë ai.

21:20

Gecaj: Mosdhënia e vizës amerikane kryeministrit tregon lëkundjen e marrëdhënieve me SHBA-në

Këshilltari juridik i kryeministrit Haradinaj, Selim Selimi në Rubikon të KTV-së ka qartësuar letrën e të parit të qeverisë.

Sipas Selimit nga Bashkimi Evropian kërkohen paratë e marrëveshjes së energjisë dhe vizat. E nga Shtetet e Bashkuara, sipas tij, kërkohet garanca ndaj Serbisë.

“E kanë thënë publikisht se i kemi plotësuar kushtet, atëherë po i duam vizat. Haradinaj ka kërkuar garancën nga SHBA-ja ndaj Serbisë. Garanca ndaj BE-së është se i kemi plotësuar kushtet, por i duam paratë për marrëveshjen me energjinë dhe vizat”, ka thënë Selimi.

Derisa Matoshi ka deklaruar se letra e presidentit amerikan, Donald Trump dhe kumtesa e ambasadorit Kosnett më shumë ka obligime për Beogradin se sa për Kosovën.

“Ju po e shihni vetëm një anë të medalje, ambasadori nuk ka dhënë ultimatum”, ka thënë Matoshi.

Përball tij, Gecaj ia përmendi Matoshit mos dhënien e vizës kryeministrit Haradinajt si rezultat lëkundjes së marrëdhënieve me Shtetet e Bashkuara.

"Vetë fakti që nuk i jepet viza kryeministrit është ofenduese për të gjithë ne. Si s'është ofenduese, ai është i pari i shtetit tonë, nuk mundet të shkojë në Shtetet e Bashkuara. Është shumë substanciale", ka thënë ai.

20:57

Matoshi: Letra e Haradinajt rithekson garancitë mbi të cilat Kosova është shtet

Këshilltari i kryeministrit Haradinaj, Halil Matoshi i është kundërpërgjigjur Bajram Gecajt duke i thënë se letra e Haradinajt për vendet e Quintit nuk është ultimatum, por vetëm rithekson garancitë mbi të cilat Kosova është shpallur shtet.

“Nëse në atë letër ka diçka ultimative atëherë ose unë ose Gecaj nuk dimë shkrim e lexim. Në letrën e kryeministrit ritheksohen garancitë se në dialog nuk flitet për statusin, për kufijtë, për ndërrim, ndarje apo shkëmbim. Me këtë letër shteteve të Quintit u është thënë se këto çështje që po kërkon Serbia me i rikthyer, janë tashmë të mbyllura”, ka thënë Matoshi në Rubikon të KTV-së.

Ai më tutje ka shtuar gjithashtu se, “Kosova nuk e ka pyet Serbinë kur e ka shpall Pavarësinë, e nuk e pyet as kur me heq e me vendos taksën”.

20:50

Selimi: Haradinaj kishte kërkuar që SHBA-ja të përfshihet në dialog

Këshilltari i kryeministrit Ramush Haradinaj, Selim Selimi në Rubikon të KTV-së ka thënë se ishte kryeministri ai që kishte kërkuar që SHBA-ja të përfshihej në dialog.

Ai thotë se Qeveria është në linjë me SHBA-në.

“Është e domosdoshme që partneriteti me SHBA-në të përkthehet në raport me Serbinë e kjo i bie që ne jemi në të njëjtën vijë me SHBA-në dhe këtë pozicion e themi në letrën e kryeministrit”, ka thënë Selimi.

Ai ka shtuar se ishte kryeministri Haradinaj ai që kishte kërkuar që SHBA-ja të përfshihej në dialog me Serbinë.

"Pikë së pari kryeministri Haradinaj e ka kërkuar SHBA-në në dialogun me Serbinë në takimin që kishte në Bruksel kur Mogherini anuloi konferencën në mënyrë dramatike", ka deklaruar Selimi.

20:31

Gecaj: LDK s’është kundër taksës, Qeveria pa koordinim me SHBA-në

Zyrtari i LDK-së, Bajram Gecaj ka hedhur poshtë deklaratat se LDK-ja është kundër taksës ndaj produkteve të Serbisë.

Në Rubikon të KTV-së ai ka thënë se nuk ka individ në Kosovë që nuk i pëlqyer taksa, megjithatë thekson se ajo është vënë pa pasur një koordinim me SHBA-në.

“Të gjithëve na ka pëlqyer taksa, s’mendoj se ka individ ose parti në Kosovë që janë kundër saj. Megjithatë nuk duhet të harrojmë se Kosova nuk është projekt vetëm i yni, por edhe i miqve tanë. Shihet qartë që s’ka pas koordinim me rastin e taksës me SHBA-në. E keni parë që Serbisë çdo herë i ka sjellë vetëm probleme bashkëpunimi me Rusinë, megjithatë prapë së prapë gjithmonë është koordinuar me Rusinë”, ka thënë Gecaj.

Ai më tutje ka shtuar se letra e Haradinajt drejtuar vendeve të Quintit është ultimatum.

“Letra e kryeministrit është ultimatum. Ajo iu jep atyre ultimatum se si duhet të sillen në mënyrë që ne të heqim taksën. Kur u ngrit së pari taksa zyrtarë të Brukselit na thanë se ‘eci liberalizimi’ pas kësaj takse. Pasojat nga kjo mund të jenë të këqija. SHBA-ja ka thënë se do të ndalë ndihmën për FSK-në dhe duhet ta dimë se s’mund të bëhej ushtria pa këtë shtet”, ka thënë ai.

Gecaj ka shtuar gjithashtu se, “tani duhet të shkojmë në zgjedhje sepse ku shtet është në një kaos të madh”.

Ushtria, sipas Gecajt, do të bëhej edhe nëse do të ishte apo jo Haradinaj në Qeveri.

“Puna e ushtrisë është nisur shumë më herët. Edhe në Qeverinë Mustafa sepse ne, ndryshe nga kjo qeveri, jemi koordinuar me miqtë ndërkombëtarë. Taksa e Ushtria janë dy çështjet populliste me të cilat kjo qeveri ka filluar tashmë fushatën”, u shpreh ai.

© KOHA. Të gjitha të drejtat janë të rezervuara.

Komentet

Doda30/01/2019 21:05

"Edhe sikur oksigjeni te mvarej nga Serbia mbas gjith asaj qe i kan ber popullit shqipeter serbet nuk do ta konsumoja".Vetedija shum e ulet shoki se perndryshe shum kollaj kishte me qen.Sta blej edhe fal me ma dhanun!!!.Sa i perket partive politike n Kosove mir njeren e mshoji tjetres,parti hajnash.

Shto koment

Të ngjashme