Limaj: Ndalimi i pjesëtarëve të FSK-së ka për qëllim të frikësojë serbët e integruar
Foto ilustrim
13:44
Limaj: Ndalimi i pjesëtarëve të FSK-së ka për qëllim të frikësojë serbët e integruar
Kryetari i Nismës Socialdemokrate, Fatmir Limaj, njëherësh zëvendëskryeministër në qeverinë e Kosovës, ka reaguar në lidhje me ndalimin e dy pjesëtareve të FSK-së nga komuniteti serb në Jarinjë.
Limaj ka thënë se ky veprim, por edhe veprime tjera të orkestruara kohëve të fundit nga ana e komuniteti serb kanë për qëllim frikësimin e serbëve të integruar në institucionet e Kosovës.
“Është shqetësues lajmi për ndalimin e dy pjesëtareve të Forcës së Sigurisë së Kosovës nga komuniteti serb në vendkalimin kufitar në Jarinje. Ky veprim dhe veprime të tjera të orkestruara ditët e fundit nga autoritetet serbe, kanë për qëllim frikësimin e serbëve të integruar në institucionet e Kosovës”, ka thënë Limaj.
Limaj, që është edhe bashkëdrejtues i Ekipit Shtetëror të Kosovës në dialogun me Serbinë, ka thënë se kjo “duhet t'i ndalë provokimet njëherë e përgjithmonë dhe sjelljen e saj të mbrapshtë”.
11:26
Kosova fton BE-në që të reagojë menjëherë pas ndalimit në Serbi të pjesëtarëve serbë të FSK-së
Shefi i diplomacisë kosovare, Behgjet Pacolli, ka dënuar ashpër ndalesën e dy pjesëtarëve serbë të FSK-së, në kufirin mes Kosovës e Serbisë në Jarinjë.
Ai ka ftuar BE-në që të reagojë menjëherë ndaj këtij lajmi.
“Sapo u informova se dy pjesëtarë të Forcës së Sigurisë nga Komuniteti serb janë ndaluar nga policia serbe. Dënoj në mënyrën më të fuqishme frikësimin e serbëve të Kosovës nga autoritet e Beogradit, kërcënime këto ndaj tyre për t’i bojkotuar Institucionet e Kosovës”, ka thënë Pacolli, përcjell Koha.net. “Ftoj BE-në që të reagojë menjëherë”, ka shtuar më tej.
10:30
Serbia ndalon dy pjesëtarë boshnjakë të FSK-së, Haradinaj e quan persekutim çnjerëzor
Kreu i ekzekutivit në vend, Ramush Hardinaj, e ka quajtur persekutim çnjerëzor ndalimin e dy pjesëtarëve të komunitetit boshnjak të FSK-së, sot në vendkalimin kufitar në Jarinjë, që fillimisht u raportua se ishin serbë.
“Në vazhdën e presioneve dhe persekutimeve çnjerëzore ndaj pjesëtarëve serbë të FSK-së, sot në vendkalimin kufitar shtetëror në Jarinjë, nga autoritetet serbe janë ndaluar Alen dhe Anel Ujkanoviq”, ka thënë Haradinaj, përcjell Koha.net.
Kryeministri ka thënë se ndalimi i tyre është tërësisht i papranueshëm dhe kërkojmë lirimin e menjëhershëm të tyre.
“Rastet si ky, popullit të Kosovës i kujtojnë kohën dhe regjimin e Millosheviqit, i cili si duket ende jeton tek fqinji ynë verior”, ka thënë ai.
