Arbëri

Ideja për korrigjim kufijsh s’është e Thaçit por e Serbisë, thotë Krasniqi

Descriptive Text

Kryetari i Këshillit Kombëtar të Nismës Socialdemokrate, Jakup Krasniqi, thotë se transformimi i plotë i FSK-së në Ushtri, varet nga shumë faktorë porse do kohë edhe për shkak të fuqisë financiare.

Krasniqi, në “Intervistën e Javës” në Koha.net thotë se pa konsensus kombëtar procesi i dialogut me Serbinë nuk do të duhej të fillonte, por ka pak shpresa që të arrihet ky konsensus, pasi sipas tij, gjuha e komunikimit mes partive politike është jo bashkëpunuese. Thotë se Lidhja Demokratike e Kosovës dhe Lëvizja Vetëvendosje, nuk e kanë hallin e konsensusit sa e kanë hallin e pushtetit e jo aq të shtetit.

E për rolin e presidentit Hashim Thaçi në bisedime, Krasniqi thotë se për të as që është dashur të flitet. Kur flet për idenë e korrigjimit të kufijve, thotë se s’është fare ide e Thaçit por është ide serbe.

Krasniqi thotë se Kuvendi i Kosovës, ka një krizë në funksionimin e tij, e nga kjo gjendje mund ta shpëtojë Partia Socialdemokrate, e cila kujtojmë se është parti opozitare.

Nëse vendi shkon në zgjedhje, Krasniqi thotë se Nisma është e gatshme. Tani për tani, ata janë të përcaktuar e të vendosur që të shkojnë të vetëm në zgjedhje.

E për aktivizimin e Gjykatës Speciale, thotë se është kundër ashtu siç ka qenë qysh nga koha e Raportit të Dick Martyt. Krijimi i saj thotë se është vetëm sukses i politikës së Beogradit dhe i shërbëtorëve të tij në Kosovë që i janë gëzuar shumë kësaj gjykate.

Përmbyllja e procesit të transformimit të FSK-së në Ushtri, do të bëhet me aleatët tanë

Koha.net: Z.Krasniqi, nisim këtë bisedë me Ushtrinë e Kosovës. U miratua pako e ligjeve me të cilat ndryshohet roli i FSK-së në Ushtri. Si mendoni se do të shkojë tutje transformimi në Ushtri? A prisni të zgjasë ky transformim 10 vjet siç po flitet dhe, a është kohë e gjatë kjo?

Krasniqi: Ajo që ndodhi dje, më 14 dhjetor 2018 në Kuvendin e Kosovës me miratimin e pakos së ligjeve për transformimin e FSK-së në Ushtri të Republikës së Kosovës është një zhvillim normal i këtij procesi i cili ka filluar më 30 dhjetor 1991 e ka përfunduar më 21/22 qershor 1999. Pastaj kanë filluar fazat e tjera si ajo e shtatorit 1999 (TMK-ja) dhe transformimi i saj pas Pavarësisë në FSK dhe tani i FSK-së në Ushtri të Kosovës. Çështja se sa do të zgjatë deri të përmbyllja e këtij procesi, varet nga shumë faktorë, por natyrshëm ky proces do kohë edhe për shkak të fuqisë financiare, mbase edhe kadrovike të vendit tonë. Koha edhe mund të jetë paksa e gjatë, por vitet po rrjedhin shpejtë. Unë personalisht mendoj se koha deri në përmbyllje duhet të jetë më e shkurtër se sa ishin fazat e tjera të transformimit. Besoj shumë edhe përmbyllja do të bëhet me aleatët me të cilët erdhëm deri këtu. Qytetarëve të Kosovës me këtë u është shtuar një siguri dhe besoj shumë se kjo siguri i është shtuar edhe rajonit tonë, i cili është i njohur si rajon i mbushur me pasiguri.

Krasniqi nuk ka shpresë se do të arrihet konsensus mes partive politike për dialogun

Koha.net: Dalim menjëherë në një temë tjetër. Kohëve të fundit janë intensifikuar përpjekjet për arritjen e një konsensusi mes partive politike për dialogun me Serbinë. Keni qenë në krye të Parlamentit kur është nënshkruar marrëveshja për dialog. Çfarë ndryshoi pastaj? Si po e shihni tani gjithë këtë proces? Sipas jush, sa i rëndësishëm është ky konsensus dhe a shihni shpresë për arritjen e këtij konsensusi?

Krasniqi: Duke i analizuar me vëmendje raportet e Kosovës me Serbinë, si raportet e djeshme dhe ato të sotshme, konsensusi në mes partive parlamentare del të jetë më shumë se i domosdoshëm dhe çdo hezitim për ta arritur konsensusin nacional është i dëmshëm. Po, kam qenë Kryetar i Kuvendit kur është biseduar për fillimin e Bisedimeve politike në Bruksel në mes Kosovës e Serbisë si edhe kur është miratuar Marrëveshja e 15 pikave në Kuvendin e Kosovës. Personalisht kam qenë kundër bisedimeve politike dhe kam qenë kundër miratimit të Marrëveshjes së 19 prillit 2013 në Kuvendin e Kosovës. Për faktin se Kosova në Bisedimet e Vjenës e ka bërë kompromisin e madh dhe nuk është dashur të shkoj përtej atij kompromisi as edhe një milimetër. Me Dokumentin e Ahtisarit, komuniteti serb në Kosovë ka fituar të drejta sa edhe shumica shqiptare. As edhe një vend tjetër i rajonit dhe as në ndonjë vend tjetër të Europës, pakicat kombëtare nuk janë akomoduar me kushtetutë e ligje si në Kosovë. Ajo që duhet thënë në këtë situatë, është kjo, pa konsensus kombëtar, ky proces i dialogut nuk duhet të fillonte. Prandaj, nëse dëshirojmë të dalim mirë e të kemi përgjegjësi politike e institucionale, konsensusi është më shumë se i domosdoshëm. Shpresa nuk kam shumë, për faktin se gjuha e komunikimit mes partive politike është jo bashkëpunuese, për të mos thënë dhe armiqësore, gjuha e komunikimit është shumë refuzuese për t’u arritur konsensusi.

Koha.net: Lidhja Demokratike e Kosovës dhe Vetëvendosje kanë rezerva te tyre sepse duan paraprakisht që vendi të shkojë në zgjedhje. Si ju duket kjo kërkesë e tyre, e realizueshme apo përpjekje për të përfituar politikisht nga situata?

Krasniqi: Bindja ime është se këto dy subjekte politike, nuk e kanë hallin e konsensusit sa e kanë hallin e pushtetit e jo aq të shtetit. Për opozitën është edhe normale kërkesa për zgjedhje të reja dhe këtë e kemi parë menjëherë pas zgjedhjeve, por ato duhet ta dinë se si shkohet në zgjedhje. Për të shkuar në zgjedhje të reja opozita duhet që t’i ketë 61 vota në Kuvendin e Kosovës. Madje kush mund të na garantoj se edhe pas zgjedhjeve të mundshme, mund të arrihet konsensusi kombëtar për dialogun? Unë mendoj që konsensusi për dialog duhet të arrihet e lufta për zgjedhje të reja le të vazhdoj, nëse ato, partitë opozitare mund t'ia arrijnë qëllimit. Në një situatë të tillë, këto dy çështje, arritja e konsensusit dhe e zgjedhjeve duhet të dallohen dhe të ndahen si çështje që kërkojnë qasje të ndryshme.

Këmbëngulja e Thaçit që të bisedojë me Serbinë për të gjitha çështjet, tepër e dyshimtë

Koha.net: Në anën tjetër, Partia Demokratike e Kosovës ka kundërshtuar këtë proces, i cili synon që rolin kryesor në dialog t’ia kthejë Kuvendit të Kosovës duke ia minimizuar rolin që tashmë ka marrë presidenti aktual, z. Hashim Thaçi? Cili do të duhej të ishte roli i Presidentit në këtë rast?

Krasniqi: Sigurisht që partitë e koalicionit e kundërshtojnë një kërkesë të tillë, pasi ato e kanë në dorë pushtetin që po e synon opozita. Por, në një situatë të tillë vendimmarrja i takon Kuvendit si organi më i lartë përfaqësues i qytetarëve të Kosovës. Madje këtë e përcakton saktë edhe Kushtetuta jonë. Nëse kemi parasysh, zhvillimin e dialogut që nga viti 2012, bisedimet i ka zhvilluar Qeveria, miratimin e Marrëveshjes së 19 prillit e ka ratifikuar Kuvendi me 86 vota për, asokohe as që është biseduar për rolin e Presidentes, zonjës Atifete Jahjaga. Këtu as që është dashur të flitet për Presidentin si pjesë e dialogut. Kosova është Republikë Parlamentare, me Kuvendin si institucionin më të lartë (rëndësishëm) e vendimmarrës dhe Qeverinë si institucioni më i fuqishëm ekzekutiv. Sipas Kushtetutës, Presidenti është institucion ceremonial dhe duhet që t’i kryej detyrat e tij kushtetuese. Madje, vetë këmbëngulja e Kryetarit Thaçi për të biseduar për të gjitha çështjet që kanë dështuar dy kryeministra (Thaçi e Mustafa) është tepër e dyshimtë!

Ideja për korrigjim kufijsh është ide e Serbisë

Koha.net: Si e vlerësoni idenë e z. Thaçi për “korrigjim të kufirit” me Serbinë? Ai përmend bashkimin e Luginës me Kosovën, ndërsa Serbia aspiron marrjen e veriut të Kosovës. Keni ju ide që ndërlidhen me këto?

Krasniqi: Në rend të parë, “Ideja” nuk është fare e Thaçit. Është ide e vjetër e Serbisë. Babai i kësaj ideje ishte shovinisti serb, Dobrica Qosiq. Pra, deklaratat e z.Thaçi rreth kësaj çështje, nuk duhet të merren fare seriozisht, pasi janë deklarata të papërgjegjshme. Kur kihet parasysh fakti, se ai deklaratat i ka ndryshuar disa herë edhe brenda një dite kjo edhe tregon seriozitetin e tyre?! Janë deklarata që bien ndesh me Deklaratën e Pavarësisë e veçmas me Kushtetutën e Kosovës. Zhvillimi i dialogut kërkon përgjegjësi të nivelit të lartë politik, intelektual e kombëtar.

PSD-ja mund ta shpëtojë Kuvendin nga kriza dhe mund t’ia mundësojë koalicionit qeverisës vazhdimin e qeverisjes

Koha.net: Dalim në një çështje tjetër. Keni qenë për dy mandate kryetar i Kuvendit. Si po udhëhiqet sot ai? A është duke kryer si duhet rolin e madh që e ka si institucion? Nëse jo, çka po e pengon?

Krasniqi: Udhëheqja e Kuvendit nëse merren parasysh dallimet e mëdha politike në mes partive politike të përfaqësuara në Kuvendin e Kosovës është goxha i vështirë. Në një situatë të tillë, Kryetari i Kuvendit do të duhej ta zbatonte më me konsekuencë Rregulloren e Punës së Kuvendit, pasi ajo është Ligj për drejtimin e Kuvendit dhe nuk duhej të varet nga zemërgjerësia e Kryetarit apo drejtuesi i seancës. Udhëheqja e Kuvendit nuk duhet të bëhet as me zemërngushtësi e as me zemërgjerësi, por sipas normave të parapara e të miratuara nga vet Kuvendi. Konsideroj se pengesa kryesore janë raportet gati armiqësore në mes partive politike pjesëmarrëse në Kuvend (pozitë – opozitë). Por, Kuvendi i Kosovës, ka një krizë në funksionimin e tij, nga e cila është goxha vështirë të dilet, sidomos kur kihet parasysh kultura e komunikimit që është instaluar në Kuvend. Ndoshta këtë gjendje mund ta shpëtojë PSD-ja.

Koha.net: Po thoni Partia Socialdemokrate mund ta nxjerrë nga kriza Kuvendin? Pse mendoni kështu, ose çka më konkretisht mendoni me këtë dhe me rolin e PSD-së?

Krasniqi: Kur them këtë, kam parasysh faktin se PSD-ja është duke u angazhuar për t’u bërë pjesë e dialogut në bisedimet e mundshme me Serbinë. Dhe nëse ndodhë kjo, nuk ka asnjë pikë dyshimi (edhe pse PSD-ja nuk është pjesë e pozitës), ia mundëson koalicionit qeverisës vazhdimin e qeverisjes dhe kështu eliminohet kriza që në dukje e kishte Kuvendi.

Qeverisja nga Haradinaj - Më mirë mos me qenë nën atë lëkurë

Koha.net: Po sa i përket Qeverisë Haradinaj, çfarë vlerësimi keni? Kohë më parë keni qenë kritik ndaj saj? Çka s’po shkon si duhet apo çfarë duhet të bëjë Qeveria, e që s’është duke e bërë?

Krasniqi: Me këtë përbërje të koalicionit, përgjigjja më e mirë do të ishte të thuhet: “Më mirë mos me qenë nën atë lëkurë”. Gjatë gjithë këtyre viteve, sidomos të Pavarësisë, në shumë drejtime vitale të shtetit janë bërë aq shumë gabime, të cilat është vështirë të vihen në binarë normal të funksionimit pa një konsensus të gjerë kombëtar. E konsensusi në praktikën tonë politike vështirë që do të krijohet, kur kihet parasysh kultura politike që është instaluar që sa vite në politikën e Kosovës. Qeveria në disa segmente të rëndësishëm të shoqërisë duhet të konstatoj gjendjen e vështirë ose krize dhe pastaj t’i merr masat për t’i ndryshuar gjërat. Me vendime të drejta si këto të ditëve të fundit mund të ndryshohet gjendja, por me vazhdimin e vendimeve të kësaj natyre duhet të vazhdohet. E këtu e kam fjalën për shumë segmente publike të rëndësishme për kombin. Nuk kam asnjë dyshim, kombi ynë duhet të ketë përfaqësues më dinjitoz në të gjitha pushtetet, menaxhim profesional e të përgjegjshëm mbi çdo pasuri e veprimtari publike etj. Për këtë duhen njerëz të ditur, njerëz që duan dhe kanë përgjegjësinë e nivelit të lartë politik, intelektual e kombëtar.

Koha.net: Po ministrat nga partia juaj, si po punojnë? Nëse ndalemi veç e veç, arsimi nuk është në nivel të kënaqshëm, ka ende shumë probleme në shtetin e mirëqenies, dhe kemi një taksë 100 për qind për mallra nga Serbia e BeH që bëri bujë?

Krasniqi: Sa i përket ministrive që udhëhiqen nga ministrat tanë, shoh një përpjekje serioze për t’u përballur e zgjidhur problemet e grumbulluara shoqërore dhe për t’u dhënë zgjidhjen e duhur. Sa i përket çështjes së arsimit, është njëra nga çështjet më të ndërlikuara që ka shoqëria jonë, sidomos pas lufte. Problemet e arsimit nuk zgjidhën as brenda një mandati se jo më brenda një a dy vitesh. Pa një vullnet të përgjithshëm kombëtar, problemet e grumbulluara në arsimin nuk mund të zgjidhen kënaqshëm. Ministri Bytyqi është duke u përpjekur maksimalisht të ushtroj me vullnet të madh ndikimin e tij për ndryshim, por nuk është lehtë se problemet janë shtresuar me vite. E sidomos në arsimin e lartë publik e privat, aty ku janë bërë zgjerime të pakontrolluara e pa ndonjë analizë e program të mirëfilltë! Kosova jo vetëm që nuk ka nevojë për kaq shumë universitete publike e private, kjo shumësi jo vetëm që nuk na ka sjellë dije cilësore, por i kanë shtuar analfabetët potencial në Kosovë. Ndërsa sa i përket mirëqenies do të ishte një mrekulli e madhe, mbase mrekulli shekullore po të ndreqej mirëqenia e qytetarëve tanë vetëm me punësimet në administratën e shtetit apo me ndihma sociale. Ministri i Punës dhe i Mirëqenies, z.Reçica është duke punuar në reformimin e ligjësimin në atë ministri, por edhe kjo kërkon kohë e vullnet të shumicës parlamentare. Konsideroj që është duke punuar shumë mirë. Porsa i përket taksës 100% si dhe vendimi që asnjë mall mos të hyj pa e njohur Pavarësinë e Kosovës, pra pa ju referuar Kosovës me emrin kushtetues, janë punët më të mira që janë bërë gjatë gjithë viteve të pavarësisë. Mendoj që kjo taksë duhet mbrohet edhe me kushtin për të shkuar në zgjedhje të reja. Dhe përsëri kushdo që guxon ta ndryshoj ketë taksë ndaj shteteve që kanë disponim armiqësor ndaj Kosovës, bënë atak mbi kushtetutën e vendit të vet. Të gjitha presionet politike e mediatike që i bëhen shtetit tonë për çështjen e taksës, janë në adresë të gabuar dhe në mbrojtje të politikave të gjenocidit dhe të atyre që po e rrezikojnë sigurinë e rajonit. Ministri Shala është mirë duke ju përgjigjur kundërshtarëve të taksës. Por, për të qenë gjërat në rregull, është i domosdoshëm dominimi i politikave socialdemokrate në qeverisjen e vendit.

Krasniqi: Në zgjedhjet e ardhshme presim fuqizim të madh

Koha.net: Z. Krasniqi, si i ka punët Nisma Socialdemokrate?

Krasniqi: Nëse i kemi parasysh rrethanat e krijimit të NISMËS si parti politike të orientimit socialdemokrat, e them me bindje se është në rrugë të mbarë të organizimit e të zgjerimit. Nuk ka qenë aspak punë e lehtë që të ndahesh nga një parti politike që ishte në pushtet e të mbijetosh politikisht si ka mbijetuar NISMA Socialdemokrate në dy palë zgjedhjet e kaluara. Tani NISMA Socialdemokrate e ka siguruar jetën e saj politike edhe për arsye të parimeve të saja dhe solidaritetit të proklamuar dhe të mbrojtur në Qeverinë e Kosovës. Në zgjedhjet e ardhshme kurdo që do të mbahen ne presim një fuqizim të madh.

Koha.net: Meqë jemi te Nisma, flasim pak për raportet e brendshme. Së fundmi keni thënë se jeni penduar që keni pranuar Milaim Zekën si deputet në partinë tuaj. Çka mund të na thoni më tepër rreth kësaj?

Krasniqi: Jo vetëm raportet e brendshme të NISMËS Socialdemokrate, por NISMA ka raporte të mira komunikimi me të gjitha partitë politike në Kosovë. NISMA Socialdemokrate që të gjitha problemeve shoqërore ju qaset me argumente, me edukatë e kulturë komunikimi dhe debati me të gjitha partitë politike. Kundërshtarët politik nuk i shohim si armiq, por si konkurrent që shpesh edhe duhet biseduar e marrë vendime të përbashkëta në interes të kombit e të shtetit. NISMA, me sugjerimin tim, Milaimit ia ka mundësuar me zemërgjerësi të madhe mundësinë për të qenë në listën e saj, por, ai as njëherë nuk ka qenë pjesë e parimeve tona politike dhe as anëtar i NISMËS. Milaimi nuk mund të rrinë në korniza politike, ketë e kemi ditur me kohë. NISMA mendimet e asnjë anëtari të saj nuk i kontrollon e as imponon, por as nuk mund t’i imponohet mendimi individual i akëcilit njeri. Partinë politike e kuptojmë si një organizatë ku njerëzit hynë e dalin me vullnet. Këtë kulturë e edukim politik po dëshirojmë ta instalojmë në NISMËN Socialdemokrate.

Nëse vendi shkon në zgjedhje, Nisma është përcaktuar të shkojë e vetme

Koha.net: Në bazë të numrave në Kuvend, zgjedhjet e parakohshme duket se janë të pashmangshme. Fillimisht, a e ndani edhe ju këtë mendim, e së dyti a është gati Nisma për zgjedhje?

Krasniqi: Edhe pse numrat jo gjithherë janë përcaktues në qeverisjen e një vendi dhe këtu kam parasysh numrat e qeverisjes në legjislaturën e kaluar që i kishte koalicioni i kaluar, por edhe mund të shkohet në zgjedhje nëse shumica parlamentare vendos për to. Pra me mocionin e mosbesimit, me 61 vota vendi obligohet të shkojë në zgjedhje automatikisht. Pra nëse opozita i bën 61 deputetë që votojnë për mocionin e tyre për mosbesim ndaj qeverisë, vendi mund të shkoj në zgjedhje. NISMA është e përgatitur që të shkoj në zgjedhje në cilindo afatin që mund të mbahen ato, qofshin të rregullta apo të parakohshme, por edhe të jashtëzakonshme. Ne nuk jemi ithtarë të vazhdimit më çdo kusht të krizave institucionale! Jemi për çdo formë të zgjedhjeve, kur ato mbahen në interes të qytetarëve.

Koha.net: Në rast të zgjedhjeve, si do shkojë Nisma? E vetme apo në listë të përbashkët me ndonjë parti tjetër?

Krasniqi: Tani për tani jemi të përcaktuar e të vendosur që të shkojmë të vetëm në zgjedhje, por rrethanat mund të imponojnë edhe ndonjë zgjidhje tjetër, kuptohet nëse është interesi i vendit. Personalisht jam për shkuarje në zgjedhje me ofertën tonë socialdemokrate pa asnjë përzierje ideologjike.

Koha.net: Në zgjedhjet e kaluara fillimisht u bashkuat me AAK-në e më pas edhe me PDK-në? Kur reflektoni sot, si e vlerësoni atë vendim, si të qëlluar apo si të gabueshëm?

Krasniqi: Rrethanat qenë të tilla. Ishim në koalicion me AAK-në, refuzimi i postit të Kryeministrit ishte i vështirë për z. Ramush Haradinaj. Ishte ndikues edhe formimi i koalicioneve të tjera parazgjedhore. Duke e njohur skenën politike në tridhjetë vitet e fundit edhe me ndonjë koalicion tjetër, qytetari ynë nuk do të kishte fat tjetër nga ky që e ka. I duhet kohë vendit tonë deri te krijimi i partive politike në kuptimin më të mirë të fjalës. Shkurt, pluralizmi politik në Kosovë ka nisur tërthor që në vitet e ’90.

Gjykata Speciale është sukses i politikës së Beogradit dhe shërbëtorëve të tij në Kosovë

Koha.net: Më lejoni të hapim një çështje jo shumë të këndshme. Gjykata Speciale duket se është aktivizuar. Rrustem Mustafa, i njohur si Komandant Remi, tashmë është i ftuari i parë për intervistim, e pas tij janë ftuar edhe shumë të tjerë. Si e parashikoni fundin e këtij procesi në përgjithësi?

Krasniqi: Personalisht që nga koha e Raportit të Dick Martyt kam qenë kundër një Gjykate të tillë, e sidomos kam qenë kundër akuzës fantome të trafikimit të organeve e cila ka qenë e shpifur dhe një gënjeshtër “demokratike” me kokë e këmbë në Beograd! Nëse kihet parasysh raporti i përmendur, për situatën e re të krijuar, më duket sa ka shumë politikë (ndërhyrje politike). Për mua krijimi i kësaj gjykate është sukses i politikës së Beogradit dhe i shërbëtorëve të tij në Kosovë që i janë gëzuar shumë asaj gjykate. Rasti i Rrustem Mustafës është tregues se Gjykata Speciale, gjithsesi është duke ecur në gjurmët e UNMIK-ut. Kështu e pat filluar edhe gjykata e Administrimit Ndërkombëtar në Kosovë. Fundi, do të jetë si i gjykimeve paraprake, “mali do të pjell një mi”! Megjithatë, mendoj se drejtësisë në cilëndo cilësi nuk duhet t’i ikë askush.

Koha.net: A mendoni se mund të sjellë shkundje në skenën politike e shoqërore intensifikimi i akuzave nga Specialja?

Krasniqi: Gjykata Speciale mund të ketë ndikimin e vet goxha të madh në jetën politike në Kosovë. Tek e fundit, për këtë shkundje politike është formuar kjo gjykatë kryekreje politike. Gjykata Speciale, pa asnjë dyshim, Kosovën e ka qitur në bankën e të akuzuarit për krime lufte?! Unë nuk besoj që vendi ynë e meriton këtë trajtim! Këtë e shoh si një padrejtësi të madhe që po ju bëhet qytetarëve të Kosovës. Për disa vite, Bota do të flas e shkruaj për krimet e pretenduara të pjesëtareve të Ushtrisë Çlirimtare të Kosovës?! Turp i madh më duket! Krimet e gjenocidi i Serbisë do të harrohen. Këtë gjykatë nuk duhet parë ngushtë, as me inat e as me gëzim. Tani nuk na ka mbetur tjetër veç të presim e të shohim! Me duart tona e kemi krijuar?! Nuk dyshoj, dikush e ka rastin për shkëlqim atdhetar e dikush tjetër turpërim e mjerim të skajshëm!

Koha.net: Flasim pak edhe për çështjen e veteranëve. Së fundmi Prokuroria Speciale e dorëzoi në Gjykatë të plotësuar akuzën që në publik është e njohur si “Veteranët”, në drejtim të veprës penale “keqpërdorim i pozitës e autoritet zyrtar”. Çka mund të na thoni për këtë, apo si i vlerësoni procedurat që po rrjedhin? Keni qenë zëdhënës i UÇK-së dhe nuk do t’ju kenë munguar të dhënat për numrin e luftëtarëve. Sa mund të ketë qenë ai numër, sipas jush?

Krasniqi: Për këtë çështje e kam thënë mendimin tim. Edhe tani mund të them se ky problem është krijuar nga politika e papërgjegjshme, e të cilin duhet që ta zgjedh politika e përgjegjshme. Por, krejt çështja është, a do të kemi politikë të përgjegjshme? Pra, këtë problem më së paku mund ta zgjedh Sistemi aktual i Drejtësisë, i cili veç që është i politizuar (i ndikuar politikisht), është i paaftë, jo profesional dhe jo funksional. Por, edhe të ishte krejt në rregull, nuk është punë e gjyqësorit kjo çështje, kryekreje është e politikës, e vendimit të drejtë politik. Për numrin kanë folur Komandantet e ndryshëm, ai numër është më real. Gabimi është bërë te mos definimi i saktë se çka duhet kuptuar- ushtar veteran. Kështu, si dikush po e kupton veteranët, veteranë kanë qenë të gjithë qytetarët e Kosovës që i kanë jetuar ditët e luftës në Kosovë. Që të gjithë ata që e përjetuan luftën meritojnë respekt dhe jetë të dinjitetshme e mirëqenie në Republikën e Kosovës. Kështu si po sillemi, si politikë e qytetarë më shumë gjasa kemi që ta falimentojmë shtetin e krijuar me flijime të shumta sesa ta ndërtojmë shtetin e se drejtës.

Koha.net: Krejt në fund, keni lënë mandatin e deputetit, a jeni pishman për këtë vendim dhe a mendoni që t’i ktheheni jetës aktive në politikbërje?

Krasniqi: Nuk jam pishman, se asnjë vendim që kam marrë në jetën time politike nuk e kam marrë pa e peshuar mirë e mirë paraprakisht, por kur e kam marrë një vendim sado i vështirë që ka qenë, kthim prapa nuk kam bërë. Kam ecur përpara duke qenë i bindur se rruga e lirisë me hezitime, pritje, durim e pishmanllëk nuk bëhet. Pra e kam matë më shumë se sa tri herë, bash ashtu siç thotë një urti e popullit tonë. Në politikë vazhdoj të jem aktiv, një aktivitet që ma lejon mosha, por nuk do të garoj për pozita politike personale. Vetëm ndonjë ndryshim i madh në skenën politike në Kosovë, ndoshta më detyron ta ndryshoj këtë që sapo e thash! Ndonëse Kosovës nuk i dëshiroj ndryshime të pa pritshme!