Haradinaj për Specialen: S’jemi shtet që akomodon interesat e atyre që dje e humbën luftën e sot rrezikojnë paqen Foto: Koha

Haradinaj për Specialen: S’jemi shtet që akomodon interesat e atyre që dje e humbën luftën e sot rrezikojnë paqen

12 December 2018 09:55

Kryeministri Ramush Haradinaj ka reaguar ndaj ftesave që Gjykata Speciale ka filluar t’ua dërgojë ish-ushtarëve të UÇK-së, duke thënë se Kosova nuk është shtet që akomodon interesat e njerëzve që dje humbën luftën e sot rrezikojnë paqen në rajon.

Në një postim në Facebook, Haradinaj ka thënë se Gjykata Speciale është dëshmi se sa larg ka shkruar sakrifica e njerëzve që janë viktima të agresionit.

Ky është postimi i plotë i Haradinajt:

Sakrifica e popullit të Kosovës deri te liria e pavarësia ishte e pashembullt në historinë e re të Europës. Lufta jonë çlirimtare ishte e drejtë dhe e shenjtë dhe kjo është dëshmuar tashmë. Nga ne, janë kërkuar gjithnjë e më shumë sakrifica e përballje me drejtësinë, ndonëse ne ishim viktima të agresionit. Përgjigjja e qytetarëve të Kosovës dhe ish pjesëtarëve të UÇK-së, filtrave të drejtësisë ndërkombëtare ka qenë e menjëhershme dhe pa hezitim

“Përballja jonë me fortunat e kohës është e vërtetë, e prekshme dhe e qëndrueshme, andaj askush mos të mendojë e besojë, se ky shtet është i destinuar dhe i gatshëm vetëm për përshtatje e akomodim të interesave të atyre që dje e humbën luftën, e sot po e rrezikojnë paqen e stabilitetin ne rajon.

Gjykata Speciale, edhe një dëshmi se sa larg ka shkuar sakrifica jonë për një shtet të së drejtës, është edhe një sfidë në rrugën tonë përpara, të cilën së bashku do ta tejkalojmë dhe nga ajo do të dalim më unikë dhe më të fortë.

Siç kemi kaluar shumë vështirësi për të arritur këtu ku jemi, të gjithë duhet ta kuptojnë se si shtet e shoqëri edhe këtë dhembje, pas Tribunalit të Hagës, gjykatave të UNMIK-ut e EULEX-it, do ta kalojmë faqebardhë së bashku, sepse luftëtarët e lirisë gjithmonë ishin të rreshtuar me të drejtën.

Askush nuk ka të drejtë ta turpërojë Kosovën dhe të fshihet, të pengojë apo t’i shmanget drejtësisë. Lufta e UÇK-së ishte e pastër dhe e shenjtë dhe kjo do të dëshmohet fuqishëm gjithnjë e kurdoherë.

Qeveria e Kosovës do t’iu qëndrojë afër luftëtarëve të lirisë të të gjitha etapave dhe është gatshme në çdo kohë të ofrojë ndihmën e nevojshme për mbrojtje juridike.

© KOHA. Të gjitha të drejtat janë të rezervuara.

Komentet

Shto koment

Të ngjashme