Qytetarët e Kosovës më shumë u besojnë institucioneve të sigurisë se atyre të drejtësisë

Institucionet e sigurisë vazhdojnë të jenë më të besuarat në Kosovë. Qytetarët e Kosovës u besojnë institucioneve të sigurisë më shumë se atyre të drejtësisë ose atyre qendrore.

Forca e Sigurisë së Kosovës përsëri është radhitur si institucioni më i besueshëm në Kosovë. 77% e të anketuarve janë shprehur se i besojnë FSK-së. Sipas gjetjeve të BKS 2018, Policia e Kosovës (KP) vazhdon të jetë një institucion i besueshëm në sytë e qytetarëve, ku 61% të qytetarëve janë shprehur se i besojnë këtij institucioni. Në anën tjetër, AKI qëndron si institucioni i sigurisë i cili gëzon besimin më të ulët, vetëm 20% e të anketuarve kanë thënë se i besojnë këtij institucioni.

Institucionet e drejtësisë vazhdojnë të kenë besim të ulët të qytetarëve. Qytetarët e Kosovës më shumë i besojnë prokurorisë (31%) se sa gjykatave (27%). Është vërejtur se gratë u besojnë institucioneve të drejtësisë më shumë se burrat.

Institucionet qendrore si Kuvendi i Kosovës dhe Qeveria e Kosovës vazhdojnë të gëzojnë besimin tejet të ulët të qytetarëve. Vetëm 15 % e të anketuarve kanë shprehur besimin e tyre në Kuvendin e Kosovës. Krahas kësaj, Qeveria e Kosovës është radhitur si institucioni më i pabesueshëm për qytetarët e Kosovës. Vetëm 14% e qytetarëve kanë thënë se i besojnë Qeverisë së Kosovës. Në anën tjetër, Barometri ka regjistruar besim më të madh për institucionet lokale ku rreth 40% e qytetarëve janë shprehur se i besojnë këtyre institucioneve.

Sa i përket besimit në institucione ndërkombëtare, besimi i qytetarëve ndaj EULEX-it vazhdon të jetë shumë i ulët krahasuar me KFOR-in. KFOR-i listohet si institucioni i dytë më i besueshëm në këtë edicion të Barometrit ku 68% të respondentëve kanë theksuar se i besojnë këtij institucioni ndërkombëtar.

Barometri nuk ka regjistruar ndonjë ndryshim të madh në rezultate sa i përket lidhshmërisë në mes besimit si dhe zonës së vendbanimit. Po ashtu, nuk është vërejtur ndonjë ndryshim i madh sa i përket regjioneve , përveç në Mitrovicë të Veriut ku besimi në institucione kosovare është dukshëm më i ulët. Ngjashëm edhe tek analizimi i lidhshmërisë së besimit me përkatësi etnike, Kosovarët Serb vazhdojnë të kenë besim të ulët në institucionet e Kosovës.

Përveç matjes se besimit ndaj institucioneve të sigurisë, BKS 2018 ka bërë edhe matjen e perceptimeve të qytetarëve të Kosovës edhe lidhur me kërcënimet kryesore të brendshme dhe të jashtme të sigurisë.

Të anketuarit i shohin korrupsionin, papunësinë, krimin e organizuar si rreziqet më të mëdha të brendshme të Kosovës. Mirëpo, shqetësim i madh është vërejtur edhe për ndarjen e Kosovës si dhe autonominë e veriut. Analizat e kombinuara të Barometrit kanë treguar se të anketuarit në zona rurale janë më të shqetësuar rreth rreziqeve të brendshme të Kosovës se sa të anketuarit në zona urbane. Po ashtu, respondentët Kosovarë Serb ndihen më pak të kërcënuar nga të gjitha rreziqet nacionale të sigurisë se sa respondentët Shqiptar; mirëpo, të dy etnitë shprehën shqetësim të theksuar lidhur me krimin e organizuar.

Perimetri i sigurisë është një element si dhe tregues mjaft interesant i sigurisë publike në Kosovë. Perimetri i sigurisë ka treguar që të anketuarit ndihen më të sigurt në shtëpitë e tyre ose në lagje, krahasuar me fshatin/qytetin ose Kosovën në përgjithësi. Sipas të dhënave të këtij viti, qytetarët e Kosovës ndihen më së sigurti në shtëpi të tyre. 85.5% të anketuarve kanë thënë se ndihen shumë të sigurt në shtëpitë e tyre. Krahas kësaj, 84.9% kanë raportuar se ndihen të sigurt në lagjen e tyre. Nga të dhënat e BKS 2018 është e qartë se ndjenja e sigurisë fillon të zbehet sa më shumë që qytetarët largohen nga ambienti i shtëpisë së tyre, kështu duke u rritur ndjenja e pasigurisë. 78.8% të anketuarve kanë thënë se ndihen shumë të sigurt në fshatin apo qytetin e tyre, ndërsa vetëm 52% të të anketuarve janë shprehur se ndihen të sigurt në Kosovë.

 

 

© KOHA. Të gjitha të drejtat janë të rezervuara.