Me kërkesë të vetë propozuesve është shtyrë për një datë tjetër seanca e jashtëzakonshme e Kuvendit, e thirrur për shqyrtimin e skandaleve në diplomacinë kosovare, raporton KTV.

Avdullah Hoti në emër të LDK-së ka thënë se propozojnë që kjo seancë të shtyhet meqë nuk janë të pranishëm as kryeministri dhe as ministri i Punëve të Jashtme. Ai ka thënë se për datën duhet të vendosë Kryesia në mbledhjen e saj të radhës. Këtë propozim e mbështeti edhe Memli Krasniqi I PDK-së. Ai tha se seanca mund të mbahet, por vetëm pas datës 20 nëntor, datë kjo kur do të jetë edhe votimi për anëtarësimin e Kosovës në Interpol.

Albulena Haxhiu nga Vetëvendosje e ka quajtur të papërgjegjshme qeverinë e cila, përkundër faktit se prej 10 ditësh e ka ditur datën e seancës, ata prapë nuk iu përgjigjen. Ajo tha se qytetarët duhet të dinë të vërtetën për gjithçka që ndodhë në politikën e jashtme, derisa shtoi se do të duhet të diskutohet edhe për marrëdhënien e re që po synon të ndërtojë presidenti Hashim Thaçi me Rusinë e Serbinë. Ajo ka kritikuar kryeministrin sesi sot mblodhi Këshillin Ndërministror, ndërsa nuk erdhi në seancë plenare.

Kritik ndaj kryeministrit ka qenë edhe Dardan Sejdiu nga PSD-ja që tha se nëse kryeministri është në Kosovë, atëherë vendi ku do të duhej të ishte ai është salla plenare. Edhe PSD-ja e ka mbështetur që seanca të caktohet nga Kryesia.

Ahmet Isufi i AAK-së ndërkaq tha se qysh në mbledhjen e Kryesisë ka qenë e ditur kërkesa e kryeministrit dhe ministrit të Jashtëm që të shtyhet kjo seancë, por opozita ka insistuar që kjo të mbahet pikërisht 4 ditë para votimit për anëtarësimin e Kosovës në Interpol.

Edhe Bilall Sherifi nga Nisma e ka mbështetur shtyrjen e seancës derisa ka thënë se Nisma do të jetë gjithmonë në seancë për të diskutuar për të mirat e të këqijat e diplomacisë kosovare.\Valmira Saraçi Sahatçiu.

Shtyhet seanca e jashtëzakonshme e Kuvendit të Kosovës

Me shumicë votash të deputetëve të pranishëm u shty seanca e jashtëzakonshme e Kuvendit, në të cilën duhej të shqyrtohej politika e jashtme e vendit, e cilësuar nga ata që kishin kërkuar mbajtjen e saj- si skandaloze dhe me shumë dështime.

Kujtojmë se ministri i Jashtëm, Behgjet Pacolli, dje, pas njoftimit për mbajtjen e kësaj seance të jashtëzakonshme, të kërkuar nga 42 deputetë, të cilën do të debatojë për politikën e jashtme të Kosovës, bëri të ditur se do të mungojë për arsye të një agjende tjetër, pjesëmarrjes në mbledhjen e Asamblesë së Përgjithshme të Interpolit, që nisë në Dubai me 18 nëntor dhe zgjat deri më 21 të këtij muaji, transmeton koha.net.

Në këtë mbledhje në rend të ditës do të jetë dhe pranimi i Kosovës në Interpol.

Nis seanca e Kuvendit, deputetët kërkojnë shtyrjen

Ndonse seanca e jashtëzakonshme e thirrur e kuvendit të kosovës që duhej të shqyrtonte, siç ishte formuluar e vetmja pik e ditës për të, për skandalet në politikën e jashtme, duket se nuk do të mbahet meqë mungon ministri i Jashtëm, Behgjet Pacolli, si dhe kryeministri Ramush Haradinaj.

Përfaqësuesit e grupeve parlamentare të cilët u deklaruan deri tash rreth rendit të ditës kërkuan që seanca të shtyhet për një ditë tjetër, kur në të do të marrin pjesë edhe protagonistët e kësaj pike të rendit të ditës.

Sot seanca e jashtëzakonshme e Kuvendit për politikën e jashtme, por Pacolli mungon

Zyra për media dhe marrëdhënie me publikun njoftoi dje se për sot, më 16 nëntor, është thirrur seanca e e jashtëzakonshme e Kuvendit të Kosovës, sipas kërkesës së 42 deputetëve.

Për këtë seancë, që është paralajmëruar të nisë nga ora dhjetë, është paraparë vetëm një pikë e rendit të ditës:

1.Debat parlamentar sipas kërkesës së 42 deputetëve për mbajtjen e seancës së jashtëzakonshme lidhur me dështimet dhe skandalet në politikën e jashtme të Republikës së Kosovës.

Mirëpo mbrëmë ministri i Jashtëm i vendit, Behgjet Pacolli njoftoi se nuk do të jetë i pranishëm në këtë seancë, meqë ka agjendë tjetër, e cila nuk mund të shtyhet. Bëhet fjalë për mbledhjen e Asamblesë së Përgjithshme të Interpolit, që nis më 18 dhe vazhdon deri më 21 nëntor në Dubai, në të cilën është në rend të ditës edhe pranimi i Kosovës në këtë organizatë. Siç u shpreh ministri Pacolli, ai nuk ka fuqi që të ndryshojë kohën e mbajtjes së kësaj mbledhjeje, aq të rëndësishme për Kosovën.

Për pasojë dhe pa praninë e tij vështirë të mbahet kjo seancë sot. Por, mbetet të pritet ora dhjetë kur ajo duhet të fillojë ose të kuptohet se nuk do te mbahet.