Përplasjet e fundjavës nuk ndikojnë në pajtimin e LDK-së e VV-së për arsim e shëndetësi

Valbona Bytyqi 04 November 2019 15:11
19:03

Diskutimet e anëtarëve të Lëvizjes Vetëvendosje dhe Lidhjes Demokratike të Kosovës, lidhur me pozitën e kryeministrit, nuk kanë ndikuar në mbarëvajtjen e takimeve të grupeve punuese.

Madje, sipas Glauk Konjufcës së Vetëvendosjes, prania e nënkryetarit të LDK-së, Lutfi Haziri në takimin e pestë, përkundër deklarimeve të tij, ka qenë kontributdhënëse, raporton KTV.

Konjufca takimin e së hënës, në të cilin është diskutuar për shëndetësi e arsim, e cilësoi si një nga takimet me më së shumti pajtueshmëri mes dy partive.

Temat e mëdha, siç i quajti Galuk Konjufca, si dialogu e politika e jashtme, do të diskutohen në nivelin e liderëve të dy partive

Bisedimet mes dy partive për formimin e qeverisë së re, pritet të përfundojnë brenda 10 ditësh.

17:34

Konjufca: Me LDK-në u pajtuam për shëndetësi e arsim, për 10 ditë i kryejmë negociatat për formimin e Qeverisë

Glauk Konjufca nga Lëvizja Vetëvendosje ka thënë se në takimin e së hënës është arritur pajtim për sektorin e shëndetësisë dhe për arsimin. Pas takimit me LDK-në, Konjufca ka thënë se pret që për dhjetë ditë të kryhen negociatat për formimin e Qeverisë.

Sipas tij, takimi i sotëm ka qenë “me më së shumti pajtueshmëri” mes dy partive politike.

“Sot jemi mbledhur për të biseduar enkas për shëndetësinë dhe për arsimin. Grupet tona më profesionale i shpalosën qëndrimet e secilit subjekt përkatës politik”, ka thënë ai teksa ka shtuar se janë pajtuar në shumicën e pikave për këto dy sektorë.

Ai ka thënë se janë trajtuar nga së paku dhjetë tema thelbësore për shëndetësinë e arsimin.

Konjufca ka shtuar se nënkryetari i LDK-së, Lutfi Haziri, i ka kontribuar “atmosferës së mirë të takimit për arritjen e pajtueshmërisë sonë për këto dy fusha”.

Konjufca ka thënë se nuk është diskutuar për ndarjen e dikastereve.

“Ne ende nuk e kemi caktuar një takim në të cilën do të flitet ndarja e dikastereve. Strategjia jonë negociatore ka qenë pajtueshmëria sa më e madhe, që të fillojmë prej mënyrave në të cilat pajtohemi”, ka shtuar ai.

Konjufca ka treguar se në takimin e ardhshëm do të diskutohet për politikat sociale. Ka thënë se për temat të politikës së jashtme dhe disa tema tjera madhore, diskutimi të bëhet në nivel të krerëve të partive.

Për diskutimet e fundit se LDK-ja e ka vënë në tavolinë postin e kryeministrit, Konjufca ka deklaruar se “është ditur tashmë se kryeministri zgjidhet prej popullit”.

“Sa i përket kryeministrit mendoj që kurrë nuk është kontestuar fakti prej atij momenti kur nuk është arritur marrëveshja ne popullit ua kemi shpjeguar që tash kryeministri zgjidhet prej popullit. Tashmë është e qartë që faktikisht që mandatari për kryeministër do të jetë prej subjektit që ka fituar më së shumti vota. Të gjitha këto që kanë dalë janë forma të shprehjes të cilat as nuk janë diskutuar në këtë takim. Në momentin që dy subjektet politike tona kanë thënë që numri i ministrive do të reduktohet prej 21 deri në 12 ne kemi dikutuar për masat qe do ndërmerren jo për emrat”, ka shtuar Konjufca.

“Mendoj që për 10 ditë do përfundojnë negociatat për formimin e qeverisë së re”, ka thënë ai në fund.

17:29

Përfundon takimi mes LDK-së e VV-së

Ka përfunduar takimi mes grupeve punuese të LDK-së e VV-së.

15:11

Nis takimi mes LDK-së e VV-së

Në selinë e Lidhjes Demokratike të Kosovës ka filluar takimi mes grupeve punuese të kësaj partie dhe të Lëvizjes Vetëvendosje.

Në këtë takim pritet të diskutohet për programin për shëndetësi dhe arsim.

Lajmi plotësohet në vazhdim...

© KOHA. Të gjitha të drejtat janë të rezervuara.

Komentet

Shto koment

Të ngjashme