Haxhiu: S’do ta kemi të vështirë të dakordohemi me LDK-në për dialogun me Serbinë

23 October 2019 23:33
00:03

Albulena Haxhiu ka thënë se beson që nuk do ta kenë të vështirë të dakordohen me LDK-në për dialogun me Serbinë.

“Me LDK-në kemi pasur bashkëpunim shumë të mirë si opozitë. Besojmë se do ta kemi të lehtë edhe tani të merremi me dialogun. Nuk shoh që ka ndonjë vështirësi për t’u marrë vesh për dialogun, për sa kohë që marrëveshja për ‘Zajednicën’ është rrëzuar nga Kushtetuesja. Përgjegjësia për dialogun i takon Qeverisë. Ne do të kemi bashkërendim me Kuvendin. Kushtetuesja e ka theksuar qartë se cili është roli i Presidentit, por ish-kryeministri Haradinaj theksonte se unë nuk merrem me çështje të tilla, dhe këtë ia la në dorë presidentit Thaçi. Nuk shoh që kemi ndonjë obligim kushtetues që të dakordohemi me presidentin për dialogun me Serbinë”, tha ajo.

Ajo tha tutje se do të rishqyrtohen të gjitha marrëveshjet e nënshkruara me Serbinë.

Sipas saj, masa e reciprocitetit do ta zëvendësojë tarifën 100% ndaj mallrave serbe.

23:59

Haxhiu: Nisma nuk po reagon për shkak të votave nga Serbia, por se po i rrezikohet kalimi i pragut

Albulena Haxhiu nga Vetëvendosje ka thënë se reagimi i Nismës Socialdemokrate për pranimin e votave të ardhura nga Serbia nuk është për shkak të fenomenit, por për shkak të frikës se s’do ta arrijnë të kalojnë pragun zgjedhor.

Në Interaktiv të KTV-së, Haxhiu ka thënë se kjo parti është dashur të reagonte qysh moti për “kontrabandim të votave”.

Sot Nisma tërhoqi komisionerët e vet kur në Qendrën e Numërimit dhe Rezultateve u dërguan votat nga Serbia të ardhura në zarfe. Koalicioni Nisma-AKR-PD, që është në “teh” të pragut zgjedhor prej 5 për qind, e quajti të paligjshëm vendimin për numërim të këtyre votave.

“Veprimet e tyre sot do të doja t’i shihja qysh moti. Kur VV-ja e kundërshtonte Listën Serbe këta bashkëpunonin me ta. Edhe më 2017 ishim i vetmi subjekt që e kundërshtuam sepse gjithmonë vinin ashtu të kontrabanduara, e sot dalin. S’e kanë për Serbinë, por sepse rritet pragu e këta bien më poshtë”, ka thënë ajo.

Edhe Haxhiu ka thënë se votat e ardhura nga Serbia nuk duhet të numërohen, e të lihen jashtë ato të ardhura nga diaspora, që kanë arritur me vonesë edhe pse ishin nisur brenda afateve ligjore.

“Mërgata jonë i ka dorëzuar me afat, por arritën me vonesë për shkak të falimentimit të një kompanie e procedura tjera. Votat e tyre duhet të verifikohen sa më parë. I bëj thirrje KQZ-së që nesër menjëherë të marrin vendim për verifikimin e mërgatës. Këta pranuan votat që kanë ardhur në mënyrë të parregullt”, ka shtuar ajo.

Për procesin e rinumërimit, Haxhiu ka thënë se ka pasur përpjekje të vazhdueshme që Nisma të kalojë pragun.

“Qytetarëve po u duket se po bëhet qëllimshëm, por unë kam vërejtur se ka pasur manipulime të votave të kandidatëve. Kjo s’ka ndodhur në LVV. Kur ka probleme të tilla, ne s’mund të themi që të mos rinumërohen. Për këtë arsye s’e kemi kundërshtuar procesin e rinumërimit. Por, problemet janë të kësaj natyre. Ka pasur një përpjekje të vazhdueshme që Nisma të kalojë pragun, por me zor nuk kalohet pragu, sepse kështu ka menduar qytetari i Kosovës. Kjo ka treguar se është ndëshkuar puna e Nismës. Nuk kanë vendosur rastësisht qytetarët që të mos e votojnë Nismën”, ka shtuar ajo për këtë parti.

Sipas rezultateve preliminare të publikuara nga KQZ-ja, pas numërimit të votave të rregullta, Nisma-AKR-PD kishte 4.96 për qind të votave. Me numërimin e votave të diasporës ky koalicion arriti në 4.99 për qind. KQZ më pas ka vendosur për rinumërimin e më shumë se 830 vendvotimeve. Sipas Nismës, gjatë rinumërimit është dëshmuar se ka pasur keqpërdorim të votave në numërimin e rregullt. Tani ajo thotë se pas rinumërimit të deritashëm ka kaluar pragun.

E pyetur nëse kanë diskutuar për një bashkëpunim të mundshëm me Nismën, nëse kalon pragun, ajo ka thënë se tash nuk mendojnë për partitë që janë nën prag.


Haxhiu ka përsëritur qëndrimin e Vetëvendosjes kundër bashkëpunimit me Listën Serbe që mori shumicën e votave të komunitetit serb.

Ajo ka thënë se Lista Serbe nuk përfaqëson vullnetin e qytetarëve serbë.

“Besoj që duhet të kemi parasysh që Lista Serbe siç e kemi thënë nuk përfaqëson interesat e qytetarëve serbë. Në mbledhjen e KQZ-së kur u certifikuan partitë, ne kemi kontestuar certifikimin e Listës Serbe për shkak të kundërshtimit që ia bën Kosovës. Ishim të vetëm në atë mbledhje dhe i njëjti subjekt ishte certifikuar. Se çfarë përfaqëson dhe çka po ndodh sot me votat e kontrabanduara, nuk përfaqëson vullnetin e qytetarëve serbë. Madje shumë prej tyre që e kanë votuar e bënë këtë sepse ishin në presion, shantazh e të kërcënuar”, ka deklaruar Haxhiu.

Ajo ka thënë se e kuptojnë dispozitën kushtetuese që kërkon “miratim formal” të përfaqësuesve të minoriteteve në Kuvend për përfaqësuesit e tyre në Qeveri.

“E kuptojmë dispozitën kushtetuese, por kemi thënë se për sa kohë kemi serbë që janë pjesë aktive e politikës, që janë të gatshëm të bashkëpunojnë për arsim, shëndetësi, s’mund t’i anashkalojmë e të dalim te Lista Serbe. Kushtetuta kërkon miratimin formal. Për mua s’është miratim me votë. Për t’u votuar qeveria duhen 61 vota. Kushtetuta thotë duhet të kemi miratim. Duhet të pyesim Listën Serbe formalisht a jeni dakord që ky person të jetë ministër. Pak a shumë kjo është ajo që thuhet në Kushtetutë. Por s’mund të anashkalojmë njerëz si Nenad Rashiq, Slobodan Petroviq për të dalë te dikush që s’e pranon Kosovën. Na duhen 61 vota për të votuar qeverinë. VV dhe LDK i përbëjnë 61, ndoshta edhe më shumë vota të deputetëve. S’varemi nga votat e Listës Serbe. Kur s’varet një qeveri nga kjo listë është lajm shumë pozitiv. S’duhet të kemi bashkëpunim e ky subjekt duhet të defaktorizohet”, ka thënë tutje ajo.

23:45

Haxhiu: Më e mira do të ishte ndarja 50-50 e ministrive me LDK-në

Ish-deputetja e Vetëvendosjes, kandidate edhe për një mandat të ri, Albulena Haxhiu, ka thënë se në takimin e sotëm mes zyrtarëve të VV-së dhe të LDK-së janë caktuar afate se kur duhet të përfundojnë takimet e grupeve të ekspertëve.

Në Interaktiv të KTV-së, Haxhiu tha se 7 nëntori pritet të jetë takimi i fundit i këtyre grupeve punuese.

“Sot i kemi vendosur afate vetes, nuk do të vazhdojmë kështu pafund me këto takime, por e kemi strukturuar punën tonë. Të hënën e ardhshme do të mblidhen sërish grupet punuese ku do të flasin për zhvillimin ekonomik. Të enjten e ardhshme flasim për rendin dhe ligjin, e kështu me radhë”.

“7 nëntorin e kemi përmendur si takimin e fundit të këtyre grupeve. Por, para certifikimit të rezultateve zgjedhore s’do ta bëjmë as ne nënshkrimin e marrëveshjes. Marrëveshja mund të nënshkruhet pas certifikimit, dhe ne do të jemi gati deri atëherë”, potencoi Haxhiu.

Ajo tha se nuk është diskutuar në takimin e sotëm për numrin e grave që do të jenë pjesë e qeverisë së re, por tha se kjo është diskutuar në takimin e parë. Sipas saj, përqindja e grave pjesëmarrëse në qeverinë e re mund të shkojë deri në 50%.

“Nuk e kemi diskutuar sot se sa gra do të jenë në qeveri, por e kemi diskutuar në takimin e parë. Zoti Kurti, por edhe zonja Osmani më duket, patën nënshkruar zotimet e shoqërisë civile për përfshirje të 30% të grave në qeveri. Por, ne do ta rrisim këtë, deri në 50 për qind. Minimumi do të jenë 30%”, tha ish-deputetja e VV-së.

Ajo thotë se nuk është folur për emrat e përveçëm për drejtimin e ministrive, ndërsa tha se ajo vetë është e gatshme të kontribuojë kudo që e kërkon Lëvizja Vetëvendosje.

Sipas saj, LVV-ja nuk ka insistuar në marrjen e ministrive të caktuara, duke potencuar se s’ka një kusht të tillë si ‘o kështu o ndryshe s’bën’.

“Ne ende s’e kemi definuar asnjë ministri. Ende s’janë diskutuar se kush cilën ministri do ta drejtojë, sepse besoj që kjo është përgjegjësi e kryetarëve të partive. Ministria e Drejtësisë dhe e Brendshme lidhen më shumë me Kryeministrin. Ndoshta për këtë arsye i kemi përmendur, por nuk kemi kushtëzuar. Kemi besim të ndërsjellë me LDK-në dhe besoj se do të vazhdojmë kështu”, tha Haxhiu.

Ajo tha se as nga LDK-ja nuk ka pasur kushte për koalicion paszgjedhor, ndërsa ka përmendur faktin e mosarritjes së marrëveshjes për koalicion parazgjedhor.

Sipas saj, ndarja më e mirë e dikastereve do të ishte 50-50, pasi, siç tha ajo, kryeministri nuk hyn në këtë kombinim pasi “LDK-ja nuk na e dha kryeministrinë, por elektorati”.

Ish-deputetja e VV-së tha se secili ministër do ta ketë obligim që t’i raportojë kryeministrit dhe theksoi se kjo s’do të lejojë që të ketë privatizime të ministrive nga partitë e ndryshme politike gjatë qeverisjes së kaluar, të cilat, siç tha ajo, “kanë bërë çfarë kanë dashur në to”.

23:33

Haxhiu: Sot definuam numrin e ministrive dhe zëvendësministrave në qeverinë VV-LDK

Albulena Haxhiu nga Lëvizja Vetëvendosje ka thënë se të mërkurën në takimin e dytë të grupeve punuese të kësaj partie dhe LDK-së, është definuar numri i ministrive dhe zëvendësministrave për qeverisjen e ardhshme.

Ajo ka thënë se dy partitë janë pajtuar që të kenë 12 ministri, e jo më shumë se 30 zëvendësministra në total.

“Që pas 6 tetorit kur përfundoi procesi zgjedhor, jemi angazhuar për të pasur takime me LDK-në, duke u bazuar edhe në rezultatin e zgjedhjeve ku qytetarët dërguan sinjale se cilat subjekte i duan që të qeverisin me vendin. Rezultatet e zgjodhën VV-në fituese, por në përgjithësi opozitën e kaluar. Siç kemi thënë, konsiderojmë se opozita e kaluar duhet të jetë qeverisja e ardhshme. Ka pas takim edhe të krerëve. Janë dakorduar për formimin e grupeve punuese Në dy takimet isha prezente. Pati atmosferë jashtëzakonisht optimiste e pozitive. Sot jemi dakorduar për formatin e qeverisë, strukturën se si do të duket qeveria Kurti, për numrin e ministrive. Sot u definua se do të jenë vetëm 12 ministri. I kemi pasqyruar se si do të duken. S’do të ketë më shumë se 27 ministra, e jo afër 100 sa ishin. Kemi caktuar që të mos ketë më shumë se 30, por numri 27 është përmendur”, ka deklaruar ajo në Interaktiv të KTV-së.

Sipas saj, katër nga ministritë do të jenë “superministri” bazuar në fuzionimin e tyre. Këtu përfshihen Ministria e Punëve të Jashtme, ku tash pritet të hyjë edhe ajo e Integrimeve Evropiane si dhe e Diasporës. Te ajo e Brendshme do të përfshihet ajo e Pushtetit Lokal dhe ajo e Administratës. Haxhiu ka thënë se fuzionim do të ketë edhe te Ministria për Zhvillim Ekonomik.

© KOHA. Të gjitha të drejtat janë të rezervuara.

Komentet

Shto koment

Të ngjashme