Hasani: Përfaqësuesi serb në qeveri vetëm me pëlqimin e Listës Serbe

Hasani: Përfaqësuesi serb në qeveri vetëm me pëlqimin e Listës Serbe

Fitim Gashi Fitim Gashi 08 October 2019 13:42

Albin Kurti, kryetar i Vetëvendosjes, para dhe pas fitores në zgjedhjet e 6 tetorit ka deklaruar se pos PDK-së në opozitë dëshiron ta çojë edhe Listën Serbe.

Kjo parti ka dalë sërish subjekti kryesor te komuniteti serb, dhe sipas njohësve të Kushtetutës nuk mund të nxirret jashtë lojës edhe tek krijimi qeverisë.

Lista Serbe deri tash ka marrë 52613 vota apo 6.64 për qind, pas numërimit të 99.25 për qind të votave.

Ish-kryetari i Gjykatës Kushtetuese, Enver Hasani, ka thënë se Kurti nuk mund të vendosë për fatin e serbëve të Kosovës, të qytetarëve të saj të komunitetit pakicë. Sipas tij, Kushtetuta e Kosovës është e qartë në këtë aspekt dhe parashikon dy situata.

“E para është situata kur ministrat serbë propozohen nga përbërja e deputetëve të Kuvendit dhe në këtë rast kërkohet konsultimi me Listën Serbe si fituese e zgjedhjeve. Situata e dytë është kur ministrat që propozohen janë jashtë përbërjes së Kuvendit, dhe në këtë rast kërkohet vendim formal i Listës Serbe”, ka theksuar Hasani për Kohën Ditore. “Siç shihet, në Kushtetutë nuk ka asnjë mundësi që shumica të vendosë për fatin e pakicës. Kjo është cilësi themelore e demokracisë kushtetuese kosovare që quhet ‘demokraci konsociacionale’ dhe sanksionohet me nenin 96 pika 5 të Kushtetutës”.

Neni të cilit i referohet Hasani thotë: “Nëse caktohen kandidatë jashtë deputetëve të Kuvendit të Kosovës, për këta ministra e zëvendësministra kërkohet miratimi formal i shumicës së deputetëve të Kuvendit, të cilët u përkasin partive, koalicioneve, nismave qytetare dhe kandidatëve të pavarur, të cilët janë deklaruar se përfaqësojnë komunitetin në fjalë”.

Por në qeverisjet e kaluara ka ndodhur që ministrat e Listës Serbe të shkarkohen dhe të bëhet emërimi i të tjerëve pa miratimin formal të këtij subjekti. Sipas Hasanit, për shkarkim nuk kërkohet miratimi formal i komuniteteve dhe se ky është një proces politik që matet me kritere politike të balancës së forcave politike.

“Mirëpo sërish emërimin e ministrit të ri nga radha e serbëve të Kosovës duhet ta marrë nga Lista Serbe dhe nuk mund të emërojë askënd tjetër në emër të komunitetit serb që nuk ka miratimin e atyre partive apo koleksioneve serbe që kanë fituar votat e tyre mbi pesë për qind të votave serbe”, ka thënë ai.

Rezultatet preliminare e nxjerrin fituese Listën Serbe, në mesin e partive serbe, ndërkaq është forca e katërt politike në nivel vendi. Ky subjekt ka shënuar rritje krahasuar me zgjedhjet e kaluara të mbajtura në vitin 2017. Derisa atë vit subjekti që mbështetet nga Beogradi zyrtar kishte fituar rreth 35 mijë vota, tani ka marrë mbi 52 mijë vota.

Ndërkaq, SLS-ja e Slobodan Petroviqit ka fituar 1 mijë e 910 vota, Partia e Serbëve të Kosovës e udhëhequr nga Aleksandër Jabllanoviq ka fituar 789 vota, kurse Nenad Rashiq i Koalicionit “Liria” ka fituar 719 vota.

Gazetën Koha Ditore mund ta lexoni edhe online. Këtu mund të gjeni sqarimin se si mund të abonoheni.

© KOHA. Të gjitha të drejtat janë të rezervuara.

Komentet

Arbeni 08/10/2019 14:49

Ky njeri sikurse i perfaqeson interesat e serbeve e jo te shqiptareve....zedhensi i Vucicit!! Edhe sa per informate..... kushtetuta thote “te serbeve” e jo te listes serbe. Ja ka nzane bishtin me der keti tipit...

Shqiptarii08/10/2019 14:00

Po " i nderuar" po, qashtu eshte! Por Kushtetuta e njef nje gje te tille vetem ne kuader te shtetesise se Kosoves e jo edhe ate grupim qe punon kunder saj! Komplet Lista Serbe ta mohon shtetin e Kosoves dhe kjo perben shkelje te kushtetutes! Prandaj sado i madh te jet ky grupim, Kushtetuta e vendit nuk ju ofron mbrojtje, edhe pastaj institucionet e vendit duhet eliminu keta horra dhe jo te perkrdhelen e te arsyetohen se Kushtetuta thot keshtu apo ashtu. Nuk mundesh me u thirr ne kushtetute vetem se kur ty ta ka endja, se Kushtetuta nuk i njef dhe nuk i amniston forcat antikushtetuese pavaresisht se sa te medha jane ato dhe kend e perfaqesojne! E sidomos nje Liste Serbe qe te gjith e dime se si u be dhe si u forcu dhe kend e perfaqeson.

Shto koment

Të ngjashme