3 perditesime
00:20

Beqiri kritikon VV-në, por e sheh si opsion të parë për koalicion paszgjedhor

Ndonëse ka pranuar se kanë shumë dallime, Ismet Beqiri i LDK-së ka thënë se Vetëvendosjen e shohin si opsion të parë për koalicion paszgjedhor.

Ai ka thënë se i vetmi opsion që e përjashton LDK-ja është bashkëpunimi me PDK-në.

Beqiri ka thënë se VV-ja po bën “lojëra e konspiracione me deklarimet se LDK-ja do të bashkëpunojë me PDK-në". Sipas tij, kjo "për shkak të frikës nga zgjedhjet”.

“Me këtë kartë VV-ja s’mund ta mposhtë LDK-në, sikur as PDK-ja me sloganin e luftës kundër korrupsionit. Ajo është sikur të thonë myslimanët që bie Bajrami në Ramazan. Sikur tash ora 24:00 të themi është ditë. Është hipokrizi që s’do ta gëlltisin qytetarët”, ka shtuar ai.

Beqiri ka thënë se nëse VV-ja vazhdon ta akuzojë LDK-në, “ne duhet të mbrohemi”. Këtu ka përmendur “djegien e institucioneve e mosnjohjen e simboleve si sinjale që s’janë parti serioze”.

Por Beqiri ka thënë se LDK-ja i lë të gjitha këto anash, për të bashkëpunuar për qeverisje.

“Idenë për bashkëpunim me VV-në s’e kemi hedhur poshtë, përkundër qëndrimeve që i kanë. Kemi vetëm një subjekt që s’e marrim parasysh, PDK-në. Opsioni i parë është VV-ja. Pastaj të shohim sa mund të përafrohemi, por gjithmonë po them që mos të marrim parasysh vetëm koalicionin me PDK-në. E kemi mësuar të mos thuhet ‘kurrë mos thuaj kurrë’, por kur e thotë një organ i partisë tash bën t’i thuhet kurrë. Kësaj radhe jam i bindur se anëtarësia jonë na ka falur dhe më s’na falë. Elektorati duhet të jetë i bindur se të gjitha tjerat janë spekulime”, ka thënë ai.

Beqiri ka thënë se sondazhet e nxjerrin LDK-në në vend të parë e se VV-ja e PDK-ja garojnë për vendin e dytë.

Për kandidatin e VV-së për kryeministër Albin Kurti, Beqiri ka thënë se “i bën mirë për shëndet që ka nisur të qeshet nga pak”. Ai ka komentuar edhe deklarimet e Kurtit se Kosova s’ka kombëtare në futboll, por përfaqësuese. Këto i ka quajtur “pallavra”.

Ka thënë se nëse LDK-ja merr pushtetin stadiumin kombëtar do ta bëjë në Bërnicë, ndërsa për lagjen “Kodrën e Trimave” ku është kryetar i degës së LDK-së, ka porositur partitë tjera “të harrojnë se bëjnë gjë”.

23:53

Beqiri: Tash është ndryshe, me asnjë kusht s’hyjmë në koalicion me PDK-në

I shumëkritikuari për ndryshim qëndrimesh për bashkëpunim me PDK-në, Ismet Beqiri i LDK-së ka thënë se tash situata është ndryshe dhe “me asnjë kusht s’do të ketë koalicion paszgjedor LDK-PDK”.

Në Interaktiv të KTV-së, ai ka thënë se në të shkuarën kishte qenë kundër bashkëpunimeve me PDK-në, por kishte respektuar vendimin e partisë.

Për zgjedhjet e 6 tetorit, Beqiri ka thënë se janë situatë tjetër “sepse tash partia ka vendosur se s’do të ketë koalicion as para e as pas zgjedhjeve”.

“Kam qenë edhe atë kohë zë kundër, por partia ka pranuar dhe kam respektuar. E kam kundërshtuar dhe po them ka vendosur partia dhe ka ndodhur si ka ndodhur. Por tash, pos që e kundërshtoj unë, me bindje të plotë them se një e keqe e tillë me asnjë kusht s’mund t’i ndodhë LDK-së më. Ka vendim të partisë që as para e as pas zgjedhjeve s’ka koalicion me PDK-në. S’ka vullnet as nga kryetari Mustafa, e as nga ne. S’besoj as me gisht të dorës mund të numërosh njerëz që janë pro”, ka thënë ai.

23:40

Beqiri: Kundërkandidatët e Osmanit janë të lodhtë, flasin kot

Ismet Beqiri i LDK-së i ka quajtur të lodhtë kundërkandidatët e Vjosa Osmanit për kryeministër të Kosovës.

Ai ka thënë se të gjithë të tjerët janë “të mbështetur për muri dhe flasin kot”.

“I ka kundërshtarët e lodhtë. Janë të lodhtë të gjithë, ndaj saj. Osmani, ka arritur të krijojë një unitet e t’i integrojë ata që për arsye të ndryshme kanë qëndruar anash. Janë shumë elemente që besojmë se ajo do të ketë besimin e qytetarëve të Kosovës, për të krijuar qeveri të respektueshme nga të gjithë, që s’mund të thuhet për qeverinë e shkuar që po i prishte të gjitha”, ka thënë ai.

Beqiri i ka quajtur absurde deklarimet se Osmani s’ka përvojë për të qeverisur me vendin.

“Puna e përvojës është interesante. Ajo është, nëse asgjë, aktive që kur ishte këshilltare e presidentit Sejdiu. Të qenit deputete disa mandate, një grua shumë e votuar, një profesoreshë universiteti e të thuash s’ka përvojë, është absurde. Përvoja tregohet kur e ke rastin. Qytetarët duhet t’ia ofrojnë rastin, për të dëshmuar se edhe të gjitha ato që i ka bërë mirë atje ku ka punuar mund t’i bëjë në qeverinë që do ta udhëheqë ajo. Por kur të mbështeten për muri, diçka duhet të thonë. Po ia fusin kot. Koha do ta dëshmojë. Do të punojmë e jemi të bindur se do t’i fitojmë zgjedhjet”, ka shtuar ai.

Ai ka thënë se Osmani do të jetë e pavarur në marrjen e vendimeve.

“Fakti që është kandidate, dhe e ka pas zotësinë të marrë këtë mbështetje për kandidaturë, s’duhet vënë në dyshim përkushtimin, aftësinë e lirinë e të vepruarit si një kryeministre në interes të vendit. Sigurisht është e kandiduar nga LDK-ja, por tamam puna që LDK-ja t’i bëjë pengesë. Ne bashkë e bëjmë kryeministre të vendit, mund të ketë konsultime, por ajo është e pavarur në kuptimin e dhënies së mendimeve e marrjes së vendimeve”, ka shtuar Beqiri.

23:33

Beqiri: Sot iu dha vula fitores së LDK-së

Ismet Beqiri nga LDK-ja ka thënë se në ditën e parë të fushatës elektorale “i është dhënë vula fitores së partisë së tij”.

Për këtë ai thotë se është bazuar në numrin e madh të pjesëmarrësve në tubimin e parë të LDK-së në sheshin e Prishtinës, të mërkurën.

“S’ka pasur tubim të tillë që nga koha e Ibrahim Rugovës. Veç ai i mblidhte ashtu. Ishte tubim i fitores. Edhe ata që ishin më anash, janë zgjuar. Ka vullnet të madh të të gjitha degëve. Kandidatja jonë, nga pamjet e sotme shihet se do ta marrë kryeministrinë, ka mobilizuar votuesit tonë. I ka paraprirë edhe menaxhimi i mirë i situatës nga Isa Mustafa si kryetar i partisë. Sot i dhanë vulë, apo po përgatitet vula e fitores, ku qytetarët do të dalin më 6 tetor për LDK-në. Janë ngritur në këmbë ushtarët e Ibrahim Rugovës, apo Ushtria e Ibrahim Rugovës. Po vlerësohet ditë e më tepër që t’i thuhet stop të keqes”, ka thënë ai në Interaktiv të KTV-së.