Mali i Zi: Humor në llogari të vetes

“Çari Çaplini ka thënë se “një ditë pa qeshje është ditë e humbur”. Politikanët, ata po përzihen në punën tonë, emisionet më humoristike janë në Kuvendin e Malit të Zi, mbase edhe në kuvendet e Serbisë dhe Bosnjës...”, ka thënë Srgjan Dido Stanojeviq.

“Sigurisht që mua do të më priste Mercedesi para Kuvendit, do të më prisnin dy sekretaresha, do të kisha më shumë shprehje dashurie dhe vëmendje nga gjinia e tjetër, nuk do isha më Pipuni, por do të isha Bred Piti...”, ka thënë Milan Knezheviq - Deputet i Frontit Demokratik.

Qeshja gjithmonë nxitet nga imitimet e politikanëve, të cilët në Malin e Zi janë yjet më të mëdha. Podgoricasi Filip Veshoviqi ka imituar shumë personalitete publike, madje edhe Milo Gjukanoviqin, i cili sundon tash e 30 vjet.

“Ende nuk ka mbaruar numërimi, por janë numëruar rreth 90 për qind të votave dhe me këtë rast dua t’ju informoj se i kemi fituar 145 mijë vota, apo 30 mandate”, kishte thënë Filip Veshoviq.

“Dua t’ju informoj që rezultati i Partisë Demokratike të Socialistëve në këto zgjedhje është rreth 145 mijë vota dhe 30 mandate”, kishte thënë Milo Gjkanoviq, kryetar i Partisë Demokratike të Socialistëve më 30 gusht 2020.

“Ne do të vazhdojmë luftën gjithsesi, ne ende jemi partia më e fortë, do të ketë ndryshime infrastrukturore”, kishte deklaruar Filip Veshoviq.

Dido dhe Miga e kanë karikuar moralin e rrejshëm, ku të gjithë kanë raporte të mira me të gjithë të tjerët, ndërsa prapa shpinës është një rrëfim krejt tjetër.

“E kemi atë qeshjen dëmtuese, e dini, qeshemi prapa shpinës dhe ne u përpoqëm ta nxjerrim atë, që të gjithë të qeshemi ëmbël, qeshja prapa shpinës nuk është e shëndetshme, ndërsa qeshja e shëndetshme e ngre madje edhe imunitetin te njerëzit”, ka thënë Srgjan Dido Stanojeviq.

Janë mahitur edhe në llogari të malazezit të sotëm, i cili me pak punë shpejt arrin sukses të madh.

“Duhet pak të shtiremi, ja ku e ke dosjen, kur të ndal dikush, kur të pyet: “Ku je”, ti thuaji “në projekte jam...”, “... në takim jam, të thërras më vonë...”, “Qao Miga, ku je, a je mirë?”... “Po ngutem vëlla, ja ku jam në takim, në do farë projektesh, po ngutem hajde...”

“Këto janë shoqëri paradoksale. Hipokrizia, lakmia, primitivizmi, marria, mungesa e edukatës, këto janë disa gjëra që ne i prekim dhe ngacmojmë...”, ka thënë Miodrag Miga Manerik.

Me moralin e rrejshëm bën shaka edhe Natasha Gardasheviq, në Instagram dhe Youtube e njohur si Njezvanova.

“Jemi mendjemprehtë, shpejt mendojmë, më duket se malazezi është i programuar ashtu që mendja t’i punojë si Ferrari deri në 100, vetëm se nuk do ta lëvizte veten që të bëjë diçka fizikisht, në gjendje është të sajojë gjithçka. Ky është një farë heroizmi ynë, e në të vërtetë jemi si të gjithë të tjerët”, ka thënë Natasha Gardasheviq.

Natasha me humor flet përmes personazheve të gradave të ndryshme nga shoqëria jonë. Gratë këtu nëpër histori ishin heroina, ndërsa janë detyruar të heshtin dhe durojnë. Të lindin fëmijë, të punojnë dhe t’i mbajnë familjet, ndërsa të gjitha meritat zakonisht u janë përshkruar burrave. Edhe sot vlejnë ende disa raporte të çuditshme, sikur për shembull mes nënës dhe të birit.

“E vërteta më e madhe e malazezit është që gruaja e jetës së tij është nëna. Unë, po të mundja, do të ta lindja, bir – e kjo është esenca e malazezit”, ka thënë Gardasheviq.

“...në Mal të Zi, zakonisht, ku ka fat, e diku edhe më vonë, do të ishte ideale që të hiqet i biri nga gjiri i nënës mes moshës 42 dhe 45 vjeçe...”.

“Nëse nuk do të kaloj tek e gruas, e cila kurrë nuk do të jetë si e nënës, mundet gruaja të jetë si Xhejmi Oliver, por të gatuajë speca të mbushur si nëna, veç nëse gënjejmë...” ka thënë Gardasheviq.

Format tradicionale, patriarkale të sjelljes, duhet ndryshuar. Më së miri ngadalë, me humor...

“E më duhet të çohem e të shkoj të punoj, po hiç bre, pasha jetën nuk shkoj sot, hajde kamerier dy raki dardhe...”.

“Humori në fakt është metodologji e qasjes ndaj njerëzve, afrimit me ta, që njerëzit të mos mbajnë gard, po të hapen, sepse jetojmë në kohë të zymta, kur humori është e vetmja rrugëdalje’, ka shtuar Gardasheviq.

“Sa isha duke menduar ku mund të dal, është e premte, kur më ra më mend, nuk mundem askund, pandemi është, në ora shtatë duhet me hy në shtëpi, çka të dal... më bie në mend sot është Black Friday, janë ato uljet e mëdha, nuk do blesh online, këtë mundesh me ba kur të duash, ky është rasti ideal që të shkosh aty mes mija njerëzve, aty s’ka koronë...”

Njezvanova thotë se më e rëndësishmja është që të mos mashtrojmë veten dhe tjerët.

“Neve, përmes historisë dhe tregimeve, na është lënë amanet që të paraqitemi më të mirë sesa që jemi dhe kjo është një barrë e madhe, është peshë, mundim që na lodh në një mënyrë krejt të gabuar, të gjitha ato kualitete që në esencë i kemi ne i shpenzojmë në diç që nuk do të duhej. Askund në botë njerëzit e varfër nuk paraqiten si të pasur dhe pasanikë, siç është rasti në Mal të Zi, dhe kjo është e gabuar, mos gënjeni”, ka thënë Gardasheviq.

Për paradokset malazeze flet edhe stand-up komiku i ri, Andrija Dabanoviq.

“Njerëzve u vijnë më qesharake mahitë në llogari të veten, kështu që ata mund të identifikohen me vetveten, për atë që ata nuk duan të flasin, por kur e shohin se dikush tjetër e flet, atëherë u duket qesharake dhe më së shpeshti këto janë marrëdhëniet ndërnjerëzore, më së shumti mes burrave dhe grave, po ashtu komplekset, mangësitë, të gjithë ne e kemi zor të flasim për këto, por nëse kemi një qasje pozitive, nëse arrijmë të nxjerrim diç njerëzve kjo u duket simpatike dhe e bukur, me rëndësi është që të jetë autentike dhe të kemi pasion për këtë, stand-up komedia është banale ta shpjegoj, nëse na ka ndodhur një situatë dhe ju e rrëfeni me të njëjtin vrull para shokut, pastaj para vëllait dhe motrës, ky është stand-up...”, ka thënë Andrija Dabanoviq.

Andrija thotë se njerëzit qeshen me të njëjtat gjëra në Podgoricë dhe në Beograd, Zagreb, apo Split... Njerëzve në rajon theksi ynë u duket interesant, por vetëm në fillim.

“Mendojnë për malazezin se është dy metra i lartë, se është pak më i plotë, se është dembel dhe egocentrik, kur unë dal ata veç nisin të qeshen, sepse nuk është kjo ajo që e kanë paramenduar, ai është një lloj stereotipi”, ka thënë ajo.

Një nga temat shpeshherë të përdorura është dembelia e malazezve.

“Mali i Zi më 2016 ia ka shitur gjithë inventarin e vet ushtarak - 3-4 aeroplanë - Kroacisë. Tash ne i paguajmë kroatët që ata ta kontrollojnë hapësirën ajrore mbi Malin e Zi...”

“...Mbi gjithë këtë Mal të Zi, nuk kemi mundur që vetë ta kontrollojmë... Po e paramendoj, atje në Zagreb nga ndonjë ndërtesë e madhe e kontrollojnë dhe çka do të bëjmë nëse hyjmë prapë në luftë, me çka do t’i gjuajmë?”, ka thënë Dabanoviq.

Andrija i bën njerëzit të qeshen edhe jashtë kufijve të Malit të Zi. Është paraqitur në tubimin e humoristëve të Evropës Juglindore në Budapest.

“Aty kam rrëfyer për hungarezët dhe qytetet e tyre, që kanë emra që është zor t’i thuash dhe që janë shumë të mirë për pasworda xxxxxxx, por vërtet ekzistojnë - yyyyyyyy, zzzzzzzz - i kam shikuar në Google, i kam mësuar përmendësh”, ka thënë ajo.

“Xxxxxxxx... Faleminderit, unë jam Andrija Dabanoviq. Shihemi...”.

Në kohën e virusit korona, njerëzit kanë nevojë për zbavitje të mirë.

“Njerëzit e kanë qejf komedinë, ndërsa ne komikët nuk kemi pasur rast të punojmë 7-8-9-10 muaj dhe kam ndierë që njerëzit nuk duan të dëgjojnë rrëfimin për koronën, sepse jemi helmuar me këtë dhe ju vjen mirë kur flasim për gjëra të tjera dhe shpesh njerëzit thonë: “E tash ke material”, por nuk kam material, nuk dua të flas për këtë, më afrohen njerëzit e thonë: “Na keni zhvendosur pakëz nga përditshmëria” - sepse përveç koronës, përveç politikës, jeta zhvillohet”, ka thënë ajo.

Ndërsa qeshja është nevojë njerëzore pa të cilën nuk kalojnë as situatat më të rënda në jetë.

“Me rëndësi është që edhe këto gjërat negative që na vijnë t’i shohim në mënyrë pozitive, sepse vetëm ashtu mund të mbijetojmë në çfarëdo. Dhe të mahitemi me mikun, fqinjin? Natyrisht, edhe në llogari tonën, së pari në llogari tonën, që të mund të mahitemi edhe në llogari të tjetërkujt”, shton ajo.

© KOHA. Të gjitha të drejtat janë të rezervuara.