Është e qartë se vizita e kancelares Merkel në rajon është e karakterit lamtumirës. Shumë gjatë, Qeveria gjermane ka qenë e përfshirë në proceset e Ballkanit Perëndimor, sidomos rreth dialogut Kosovë – Serbi, por edhe rreth anëtarësimit në BE të gjithë rajonit dhe bashkëpunimit rajonal përmes Procesit të Berlinit. E gjithë kjo është arsye e mjaftueshme për vizitën e kancelares Merkel, e cila gjatë viteve ka investuar kapital politik në kërkim të progresit në Ballkan.
Por, pasi kjo është vizitë lamtumirëse, mendoj se nuk duhet së tepërmi të analizohen mesazhet me të cilat Merkel erdhi dhe po përshëndetët. Në fakt, politika e ardhshme e Gjermanisë për Ballkanin do të përcaktohet varësisht nga ajo se çfarë do të prodhojnë zgjedhjet në Gjermani dhe se kush do të jetë kancelar apo kancelare.
Gjithsesi, nuk duhet pritur ndryshim dramatik të politikës së Berlinit fare as për rajonin tonë, por do të jetë krejtësisht normale nëse interesimi i Qeverisë së Gjermanisë do të jetë më i madh apo më i vogël pas largimit të Merkelit. Pyetja më e madhe e cila pret ende përgjigje është se çfarë do të bëhet me Procesin e Berlinit kur kancelarja të shkojë.
Dhe përgjigjen në këtë pyetje nuk mund ta marrim nga zonja Merkel, por nga pasardhësi apo pasardhësja e saj. Nga momenti kur u bë e qartë se Merkel do të largohet, kanë nisur ofertat dhe kalkulimet se çfarë duhet bërë pas saj.
Kështu, në këtë lloj vakumi të krijuar nga largimi i Merkelit, kemi parë tashmë përpjekje për t’u imponuar disa drejtime të reja.
Këtu para se gjithash mendoj për Open Balkan. Siç qëndrojnë gjërat aktualisht, Berlini është kundërshtar i vendosur i këtij projekti – dhe unë nuk do të prisja ndryshime të këtij qëndrimi edhe pas zgjedhjeve në Gjermani.
Pala kosovare, sikurse edhe Bosnjë-Hercegovina dhe Mali i Zi, qysh më herët ka refuzuar për të qenë pjesë e këtij projekti, kryesisht pasi është paralel i Procesit të Berlinit dhe integrimeve evropiane. Por mendoj se nuk është e mjaftueshme të jesh kundër dikujt, por duhet të dalësh me alternativë funksionale.
E kjo mund të arrihet vetëm me miratimin e Bashkimit Evropian dhe lojtarëve të saj kryesorë, sikurse është Berlini. Për këtë, përgjigjen se çfarë do ta kemi të ardhmen nuk kemi mundur ta presim nga vizita e Merkelit. Përgjigjen e saktë për këtë çështje do ta kemi në dispozicion vetëm pas zgjedhjeve në Gjermani. Për këtë, do të ishte mençuri që vizitën e Merkelit ta pranojnë ashtu siç është paralajmëruar gjatë gjithë kohës: si përshëndetëse. Dhe siç është rendi, nga ajo të përshëndetemi.
Disa nga ne, edhe ta falënderojmë për gjithçka ka bërë. Në rastin e Kosovës, merita e saj më e madhe është se tash e 10 vjet, publikisht dhe pa dilema, ia ka shpjeguar Serbisë se anëtarësimi në BE është i pamundur pa njohjen e pavarësisë së Kosovës. E suksesi më i madh i saj është se ka parandaluar planet për ndarjen e Kosovës dhe shkëmbimin e territoreve e popullsisë.
Koment i autorit për gazetën “Oslobodjenje” të Sarajevës, Bosnjë
© KOHA. Të gjitha të drejtat janë të rezervuara.
