Vështrime

Rasti i viktimës Elizabeta Hasani: fshirja e emrit të saj është gabim, pothuaj krim

Në mars të vitit 1999 regjimi kriminal i Serbisë hodhi një granatë në Tregun e Gjelbër të Mitrovicës. Me atë rast u vranë shtatë njerëz. Gjashtë prej tyre shqiptarë dhe një rome, një vajzë 5-vjeçare. Në pllakën përkujtimore mungon vetëm emri i romes Elizabeta Hasani. Pse? Për shkak se është rome. Dhe për shkak se disa shqiptarë janë racistë ose vetëm qelbësira primitive dhe provinciale. Kjo poshtërsi duhet të korrigjohet sa më shpejt. Emri i Elizabeta Hasanit duhet të jetë në krye të listës së viktimave.

Aktivisti për të drejtat e njeriut, Shkëlzen Gashi, sot zbuloi një skandal, një tmerr: në pllakën që përkujton viktimat e masakrës serbe në mars të vitit 1999 në një treg në Mitrovicë, mungon emri i Elizabeta Hasanit. Pse? Sepse ajo është rome. Vajzë e një komuniteti të shtypur e të margjinalizuar. Pjesëtarët e këtij komuniteti për serbët janë “cigani”, për shqiptarët e Kosovës “magjupë”.