Vështrime

Amnistimi i Milosheviqit

Mohuesit e krimeve serbe në Kosovë, si puna e Vuçiqit dhe Daçiqit, janë me fat, sepse në Prishtinë kanë një garniturë politike e institucionale që ka ndihmuar botën gati të harrojë se çfarë ndodhi pranverën e vitit 1999, dhe me vite të tëra para asaj pranvere

Kur më 27 maj 1999, Tribunali i Hagës për Krime Lufte të kryera në -ish Jugosllavi njoftoi se kundër presidentit të Jugosllavisë së atëhershme, Slobodan Milosheviq, dhe katër zyrtarëve të tjerë të lartë të Jugosllavisë dhe Serbisë është ngritur aktakuza për krime lufte të kryera në Kosovë, e ardhmja e Kosovës u përcaktua: pas kësaj, nuk kishte më asnjë shans që Kosova të kthehet nën sundimin e Beogradit.

Fakti që një instancë e lartë juridike, një gjykatë e themeluar nga OKB-ja, që udhëhiqej nga ligjet ndërkombëtare, e ngriti një aktakuzë ndaj zyrtarëve të një shteti për krimet që kanë kryer ndaj një popullate të tërë vetëm për shkak se i takonin një kombi tjetër, ishte momenti kur edhe përkrahësit e Serbisë në botë e pranuan se Kosova nuk ka si të kthehet në gjendjen e mëparshme.