Vështrime

Borë në Sarajevë

Shkrimtari i madh turk Orhan Pamuk ka vizituar kryeqytetin e Bosnjë-Hercegovinës - për disa arsye: për të parë një shfaqje që bazohet në një roman të tij (regjisori është me origjinë shqiptare), për të vizituar një muze lufte dhe për të thënë disa fjalë për padishahun Rexhep Taip Erdoan.

Vitin e kaluar dështoi vizita e Orhan Pamukut në Sarajevë. Më parë autoritetet e kryeqytetit të Bosnjë-Hercegovinës kishin vendosur që shkrimtarin e famshëm turk ta shpallnin qytetar nderi. Pak kohë pasi lajmi u bë publik, ceremonia dhe vendimi u anuluan me gjasë për shkak të presionit politik nga Partia e Aksionit Demokratik (SDA), partia kryesore e boshnjakëve, e cila frikësohej se nderimi i Pamukut në Sarajevë do ta zemëronte sulltanin Rexhep Taip Erdoan në Stamboll. Pamuk është kritik i ashpër i regjimit të Erdoanit. Laureati i çmimit Nobel thotë se në Turqi nuk ka liri të shprehjes: “Ne me shpejtësi të madhe po lëvizim nga shteti ligjor drejt një regjimi të terrorit”.