Tentimi i Gjermanisë për ta fituar medaljen e parë të artë olimpike në turneun e futbollit në konkurrencën e meshkujve, mori fund të mërkurën.
Gjermania barazoi 1:1 kundër Bregut të Fildishtë në ndeshjen e fundit të Grupit D, për të përfunduar e treta me katër pikë dhe për t’u eliminuar nga Lojërat Olimpike. Ndërkohë, Bregu i Fildishtë avancoi në çerekfinale si i dyti në grup me pesë pikë të mbledhura, dy më pak se Brazili që doli i pari.
Bregu i Fildishtë kaloi në epërsi në minutën e 67-të, me autogolin e shënuar nga Benjamin Hendrichs, ndërsa rezultatin përfundimtar e vendosi Eduard Lowen që barazoi shifrat gjashtë minuta më vonë me një gol nga gjuajtja e lirë.
Për Bregun e Fildishtë, kjo është hera e dytë që kualifikohet në gjysmëfinale të turneut olimpik pas vitit 2008. Ndërsa, Gjermania që fitoi medaljen e argjendtë para pesë vjetësh në Rio, u eliminua shumë më herët se sa ishte pritur.
