Kamberi: Ngjarja në Banjskë, goditje politike për Vuçiqin
Hulumtuesi në Institutin për Politika Sociale “Musine Kokalari”, Belgzim Kamberi, ka thënë se ngjarja e 24 shtatorit në Basnjskë të Zveçanit, ishte goditje politike për presidentin serb, Aleksandar Vuçiq.
“Ia trazon këtë imazhin e politikanit të stabilitetit dhe ia trazon imazhin e politikanit që do t’i normalizojë marrëdhëniet, sepse nëse mbetet mënyra qysh ai i heroizoi ata, ai provoi me bë një lloj distancimi, por megjithatë po i heroizon”, ka deklaruar Kamberi, në emisionin “Tempus” në KTV.
Sipas tij, çështja është se a është Vuçiqi ende personi i cili është pala negociuese edhe personi legjitim për ta ndërtuar normalizimin e marrëdhënieve me Kosovën.
“Mendoj që ngjarja e Banjskës është goditje jashtëzakonisht për të sepse ngjarja e Banjskës ia jep një goditje politike Vuçiqit”, ka theksuar ai.
Kamberi ka deklaruar se rasti ia jep një fitore politike Qeverisë së Kosovës dhe e ka dëmtuar shumë Serbinë sepse sipas tij, deri para Banjskës Kosova ishte keq në kuptimin diplomatik dhe se Banjska e përmbyti situatën.
“Diskutimi është këtu, kjo përfshirja e presidentit Vuçiq sepse nëse i shohim edhe reagimet ndërkombëtare, janë ende të themi të matura. Nuk janë duke thënë se strukturat e Serbisë nuk janë përgjegjëse fare, por në anën tjetër nuk janë duke e goditë presidentin Vuçiq mbase edhe për një arsye tjetër. Nëse nuk e kemi presidentin Vuçiq kë e kemi në Serbi”, është shprehur Kamberi.
