Ibishi: Armatimi tregon se sulmi dhe furnizimi vjen nga Serbia

Njohës i çështjeve të sigurisë Nuredin Ibishi, në emisionin “Tempus” në KTV, ka deklaruar se armatimi i cili është sekuestruar në zonën e Banjskës tregon se sulmi dhe furnizimi vjen nga Serbia.

“Tash mbas dy akteve terroriste në Serbi, e dini rastin e vrasjeve masive çfarë ndodhi në Serbi kanë filluar masat e gjithmbarshme, kanë filluar njësitet speciale për mbikëqyrje në shkolla edhe dorëzim të armatimit, ndërsa ky armatim po futet për akte terroriste, kryengritje për operacione hibride në Kosovë. Pra, kjo është direkt prej Serbisë, nuk ka tjetër. Gjithë ky arsenal, a është e mundshme, o njerëz kuptoni, aty po hyjnë kamionët dhe shumë tregtarë të Kosovës që nuk kanë dashtë të identifikohen, përpara janë furnizuar prej atij kufiri poroz”, ka deklaruar Ibishi.

Njohësi i çështjeve të sigurisë ka theksuar se arsenali i cili u konfiskua në veri ishte për një kryengritje.

“Ishte i gjithë arsenali ushtarak për një kryengritje, nuk po flasim për një akt terrorist të kufizuar, për një serb, po për një operacion luftarak. Çështje tjetër, janë gjetur edhe dokumente”, ka deklaruar ai.

Ibishi ka thënë se i gjithë ai arsenal i armëve nuk është futur përnjëherë në Kosovë, por është dashur kohë.

“A është e mundshme gjithë ky arsenal? Po, është e mundshme se kjo nuk është bërë përnjëherë, kjo me kohë është bërë deponimi në këto baza i këtij arsenali. Kjo është një pjesë, e keni pa edhe vetë, kjo është e frikshme”, është shprehur ai.

Njohësi i çështjeve të sigurisë Nuredin Ibishi, ka theksuar se lokacioni i Banjskës ishte zgjedhur qëllimshëm nga grupi kriminal, për shkak të afërsisë së kufirit me fshatrat e Novi Pazarit.

“Pse është zgjedh mu Banjska, përafërsisht është sikur një zorrë qorre e ndarë nga aksi rrugor magjistrale që shpie nga Zveçani në drejtim të Leposaviqit edhe afërsia e kufirit me fshatrat e Pazarit të Ri”, ka theksuar Ibishi, në emisionin “Tempus” në KTV.

Sipas tij, rol ka luajtur edhe relievi tokësor që është mundësuar edhe futja e mjeteve të blinduara.

“Është zgjedh si pikë strategjike ajo ndërhyrje në kuptimin e asaj që nëse nuk dështon ai operacion i tyre që realisht tu pas parasysh përgatitjen e tyre, mundësinë e performancës ne kemi minimal viktima, kemi vetëm një të vrarë dhe një të plagosur dhe një të lënduar”, ka deklaruar ai.

Ndërsa, reagimi i Policisë së Kosovës sipas Ibishit ka qenë jashtëzakonisht i mirë.

“Ne në veriun e Kosovës asnjëherë nuk kemi pasur më tepër kontroll edhe situatën nën mbikëqyrje në aspektin e sigurisë, pra nuk kem pas shumë prezencë të ekstremistëve”, ka shtuar Ibishi.

Po ashtu ai ka thënë se veprime të tilla duhet të priten edhe në të ardhmen pasi që sipas tij ata nuk do ta lënë vetëm kaq.

“Edhe përfundimisht që Policia e Kosovës ka kryer detyrën mirë falë profesionalizimit edhe ka arrit që ta mposht t’i kundërpërgjigjet edhe një formë ta shpartallojë grupin edhe mbizotërojë edhe të konfiskojë të gjitha ato mjete dhe një formë t’ia dalë”, ka thënë Ibishi.

© KOHA. Të gjitha të drejtat janë të rezervuara.