Gazetarja e KOHËS Valbona Bytyqi, ka theksuar se ekipi i gazetarëve që qëndroi të dielën në Banjskë, ka dëgjuar të shtëna armësh rreth 3 kilometra nga vendi ku ishte stacionuar.
Ajo në emisionin “Tempus” në KTV ka deklaruar se ekipi i KOHËS dhe ekipet tjera të mediave, që nga mëngjesi janë drejtuar në hyrje të fshatit Banjskë, në Komunën e Zveçanit.
“Ekipi i cili ka përcjell në mëngjes gjithë aksionin dhe gjithë zhvillimet që e kanë përcjellë gjatë gjithë ditës, ka arritur të dëgjojë të shtëna që janë zhvilluar vetëm diku rreth 3 kilometra nga vendi ku kanë qenë të stacionuar. Mediat kuptohet që nuk kanë qenë të lejuar të kalojnë në pjesën ku zhvillohej sulmi apo përballja mes Policisë së Kosovës dhe grupit të armatosur. Megjithatë, kanë arritur t’i dëgjojnë nga larg të shtënat me armë nga më të ndryshmet”, ka deklaruar Bytyqi.
Ajo ka theksuar se pasdite situata ishte më e qetë dhe nuk janë dëgjuar të shtëna armësh.
Gazetarja thotë se para disa muajsh deputetja britanike paralajmëroi se armët po futen me ambulancë
Bytyqi ka thënë se para disa muajsh një deputete britanike paralajmëroi se armët po futen me ambulancë.
“Nuk mundem ta konfirmojë nëse lidhet direkt me rastin por para disa muajve ne kemi pasur një deputete britanike e cila ka paralajmëruar ose ka ngre alarmin që autoambulancat që qarkullojnë në veri janë të mbushura me municion dhe të cilat po dërgohen apo këto objektet fetare po shfrytëzohen si strehë e armëve gjë që ndoshta edhe rasti i djeshëm i Banjskës dhe Manastirit të Banjskës mund të konfirmojë diçka të tillë, përkundër faktit që prej KFOR-it kemi pas një konfirmim të tillë apo edhe ndoshta ka pasur një heshtje prej institucioneve të Kosovës me gjithë paralajmërimin e Kryeministrit Kurti se do të shpalosë më shumë detaje”, ka theksuar Bytyqi.
© KOHA. Të gjitha të drejtat janë të rezervuara.
