Shabiu: Nxitja e dhunës e urrejtjes ndaj personave LGBTIQ+ nis në Kuvendit të Kosovës
Drejtoresha ekzekutive e Nismës së të Rinjve për të Drejta të Njeriut në Kosovë (YIHR), Marigona Shabiu, ka thënë se është shqetësuese se si nxitja e diskriminimit në Kosovë rrjedh nga Kuvendi, vend i cili, sipas saj, duhet t’i përfaqësojë qytetarët pa asnjë dallim.
“Çka është shumë shqetësuese për neve si aktivistë, aktivistë të organizatave të cilët punojmë në këtë fushë edhe anojmë në avancimin e pozitës të personave LGBTI në Kosovë, është që kjo gjuhë e urrejtjes, kjo nxitje e një diskriminimi edhe më të madh edhe stigmatizimi edhe më të madh për personat LGBTI në Kosovë rrjedh edhe prej Kuvendit, i cili duhet t’i përfaqësojë të gjithë qytetaret pa dallim, pa dallim orientimi seksual, pa dallim orientimi identiteti gjinor”, ka theksuar Shabiu, në emisionin “Tempus” në KTV.
Ajo ka thënë se janë konsultuar me avokatë të ndryshëm që të gjejnë zgjidhje për të sfiduar imunitetin e deputetëve, të cilët kanë përdorur gjuhë të papranueshme në seancën e marsit të vitit kaluar, ku ishte diskutuar edhe draftkodi civil.
“Kemi parë seancën e vitit të kaluar të marsit, ku është diskutuar edhe draftkodi civil edhe prej disa deputetëve fatkeqësisht ka pas një gjuhë mjaft të papranueshme, mjaft të shqetësuese edhe normalisht që për shkak që deputetët kanë imunitet ne deri tash nuk kemi gjet një formë, një mënyrë për me sfiduar imunitetin e tyre. Mirëpo, jemi duke punuar, duke u konsultuar me avokatë të ndryshëm që të shohim se si mund ta, akoma edhe pse kanë kaluar më shumë se 1 vjet si mund ta sfidojmë imunitetin e tyre si deputetë, për shkak që ne mendojmë që një gjuhë e tillë nuk duhet tolerohet prej qytetareve të zakonshëm e aq më pak një gjuhë e tillë nuk duhet të tolerohet kur vjen prej përfaqësuesve të popullit”, është shprehur Shabiu.
