Kryeredaktorja e Grupit KOHA, Brikenda Rexhepi, në emisionin “Tempus” në KTV ka thënë se me lindjen e mediave online, është rrezikuar ruajtja e privatësisë.
“Ajo që ka ndodhur kohëve të fundit në Kosovë, në krejt botën është lindja e këtyre mediave online të shumta, të portaleve, pastaj të rrjeteve sociale ku me çka edhe po rrezikohet ky standardi i ruajtjes së privatësisë dhe pavarësisë”, ka thënë Rexhepi.
Ajo ka theksuar se në skenën mediale, jo vetëm në Kosovë, por në përgjithësi në botë, ka shumë hapësirë dhe sipas saj në vendin tonë, duhet të punohet më shumë për të ruajtur privatësinë e njerëzve.
“Kemi raste domethënë ku nuk mbulohen fytyrat, dalin emrat e viktimave, ku njerëzit e dyshuar për kryerjen e krimeve apo veprave të kundërligjshme ju dalin emrat pa u cekur që janë të dyshuar”, ka thënë Rexhepi.
Raportimi për “sëmundjen” e një banori të BBVK-së, Rexhepi: Shkelje e të gjitha neneve etike e ligjore
Kryeredaktorja në Grupin KOHA, ka thënë se publikimi në një medium për kinse sëmundjen e njërit nga banorët në “Big Brother VIP Kosova” është shkelje e të gjitha neneve etike dhe ligjore.
“Për këtë rast kam dëgjuar, sepse është bërë e madhe, kjo nuk është vetëm shkelje e privatësisë kjo është shkelje e shumë neneve të Kodit të Etikës së Mediave të Shkruara edhe është shkelje e disa parimeve bazike aq të thjeshta dhe logjike, që domethënë nuk ka nevojë për ndonjë analizë kushedi sa profesionale për t’u ditur që u bë shkelje”, ka thënë Rexhepi.
Sipas saj, të dhënat shëndetësore të asnjë personi nuk duhet të bëhen publike është apo s’është e vërtetë.
Ajo shtoi se pastaj doli që personit në fjalë as nuk i është bërë testi, e po ashtu tha se tani burimet po kërkojnë falje.
“Domethënë aq ka shkelje banale këtu, nuk po di, ndoshta duhet të jetë një rast studimi deri në çfarë niveli ka rënë etika e gazetarisë në vendin tonë” , ka deklaruar ajo.
© KOHA. Të gjitha të drejtat janë të rezervuara.
