Samsungu nuk duket të jetë specifikisht i lidhur me emërtimin Galaxy Fold, kështu që ai me siguri nuk do të jetë emërtimi i telefonit të ardhshëm të palosshëm të kompanisë. Sipas informuesit Ice Universe, telefoni i ardhshëm fleksibil i Samsungut do të emërtohet Galaxy Z Flip, dhe jo Fold 2 ose Bloom (siç u sugjerua kohët e fundit), raporton Engadget.
Natyrisht, edhe pse bëhet fjalë për një informues të besueshëm, informacioni duhet të merret me një dozë rezerve, ndërsa Ice Universe thekson se logoja që u publikua me lajmin e paraqet një model, shkruan KOHA Ditore. Gjithsesi, emri Galaxy Z Flip do të kishte kuptim pasi që bëhet fjalë për një telefon të palosshëm i cili paloset përgjatë boshtit "Z".
Telefoni pritet të prezantohet së bashku me serinë e ardhshme Galaxy S (S20), përpara Mobile World Congress në shkurt. Tani për tani dihet pak për vetë pajisjen, por pritet një kamerë punch-hole, një lexues ekstern për gjurmë të gishtave dhe një ekran i vogël ekstern për njoftime.