(AP) – Prodhuesi i ChatGPT po përpiqet ta frenojë reputacionin e tij si makinë mashtrimi me një mjet të ri që mund t’i ndihmojë mësimdhënësit të zbulojnë nëse studenti apo një inteligjencë artificiale i ka shkruar detyrat e shtëpisë.
Klasifikuesi i ri i tekstit i inteligjencës artificiale i lansuar nga OpenAI pason një diskutim javor në shkolla dhe kolegje mbi frikën se aftësia e ChatGPT-së për të shkruar pothuajse çdo gjë me komandë mund të nxisë pandershmëri akademike dhe të pengoje të mësuarit.
OpenAI ka paralajmëruar se mjeti i tij i ri – si të tjerët tashmë në dispozicion - nuk është i pagabueshëm. Metoda për zbulimin e tekstit të shkruar me AI është “e papërsosur dhe ndonjëherë do të jetë edhe e gabuar”, ka theksuar Jan Leike, kreu i ekipit të shtrirjes së OpenAI, i ngarkuar për t’i bërë sistemet e tij më të sigurta.
“Kjo është arsyeja pse nuk duhet të mbështetemi vetëm aty kur merren vendime”, ka thënë Leike.
Adoleshentët dhe studentët e kolegjeve ishin në mesin e miliona njerëzve që filluan të eksperimentojnë me ChatGPT pasi ai nisi më 30 nëntor si një aplikacion falas në faqen e internetit të OpenAI. Dhe teksa shumë të tjerë gjetën mënyra për ta përdorur atë në mënyrë më kreative dhe të padëmshme, lehtësia me të cilën ai mund t’u përgjigjej pyetjeve të testit dhe të ndihmonte në detyra të tjera krijoi panik në mesin e mësimdhënësve.
Në kohën kur shkollat u hapën për vitin e ri, New York City, Los Angeles dhe rrethe të tjera të mëdha të shkollave publike filluan ta bllokojnë përdorimin e tij në klasa dhe në pajisjet shkollore.
Distrikti i Shkollave Publike të Seattle-it fillimisht bllokoi ChatGPT në të gjitha pajisjet shkollore në dhjetor, por më pas hapi qasjen për edukatorët që duan ta përdorin atë si mjet mësimor, ka treguar Tim Robinson, zëdhënësi i distriktit.
“Ne nuk mund të përballojmë injorimin e këtij sistemi”, ka thënë Robinson.
Distrikti po diskuton gjithashtu për zgjerimin e mundshëm të përdorimit të ChatGPT në klasa për t’i lejuar mësuesit ta përdorin atë për t’i trajnuar studentët që të jenë mendimtarë më të mirë kritikë dhe për t’i lejuar studentët të përdorin aplikacionin si “mësues personal” ose për të ndihmuar në gjenerimin e ideve të reja kur punojnë në një detyrë, ka shpjeguar Robinson.
Rrethet shkollore anembanë vendit thonë se po shohin që biseda rreth ChatGPT do të evoluojë shumë shpejt.
“Reagimi fillestar ishte ‘O Zot, si do ta frenojmë valën e gjithë mashtrimit që do të ndodhë me ChatGPT’”, ka bërë të ditur Devin Page, specialist i teknologjisë me Distriktin e Shkollës Publike të Qarkut Calvert në Maryland. Tani ka një kuptim në rritje se “kjo është e ardhmja” dhe bllokimi i tij nuk është zgjidhja.
“Unë mendoj se do të tregoheshim naivë nëse nuk do të ishim të vetëdijshëm për rreziqet që paraqet ky mjet, por gjithashtu nuk do t’u shërbenim studentëve tanë nëse i ndalojmë ata dhe ne ta përdorim atë me gjithë fuqinë e tij të mundshme”, ka thënë Page, i cili mendon se rrethet, si ai i tij, përfundimisht do ta zhbllokojnë ChatGPT, veçanërisht pasi shërbimi i zbulimit të kompanisë të jetë në funksion.
OpenAI i ka bërë të ditura kufizimet e mjetit të tij të zbulimit në një postim në blog, mirëpo ka theksuar se përveç frenimit të plagjiaturës, mund të ndihmojë në zbulimin e fushatave të automatizuara të dezinformimit dhe keqpërdorime të tjera të AI-së për t’i imituar njerëzit.
Sa më i gjatë të jetë një pasazh teksti, aq më i mirë është mjeti në zbulimin nëse një AI ose një njeri ka shkruar diçka. Shkruani çdo tekst - një ese për pranimet në kolegj, ose një analizë letrare - dhe mjeti do ta etiketojë atë si “shumë e pamundur, e pamundur, e paqartë nëse është, ndoshta, apo e mundshme” gjatë gjenerimit.
Por njësoj si vetë ChatGPT, i cili u trajnua në një gamë të madhe librash, gazetash dhe shkrimesh në internet të digjitalizuara, por shpesh me vetëbesim nxjerr gënjeshtra ose marrëzi, nuk është e lehtë të interpretosh se si doli me një rezultat.
“Ne nuk e dimë në thelb se çfarë lloj modeli i kushton vëmendje, ose si funksionon brenda”, ka thënë Leike. “Në të vërtetë nuk mund të themi shumë në këtë pikë se si funksionon klasifikuesi”.
Institucionet e arsimit të lartë në mbarë botën gjithashtu kanë filluar të debatojnë për përdorimin e përgjegjshëm të teknologjisë AI. Sciences Po, një nga universitetet më prestigjioze të Francës, e ka ndaluar përdorimin e tij dhe paralajmëroi se kushdo që gjendet duke përdorur në mënyrë të fshehtë ChatGPT dhe mjete të tjera të AI-së për të prodhuar punë me shkrim ose me gojë mund të ndalohet nga Sciences Po dhe institucione të tjera.
Në përgjigje të reagimit, OpenAI ka njoftuar se ka punuar për disa javë për të krijuar udhëzime të reja për t’i ndihmuar mësimdhënësit.
“Ashtu si shumë teknologji të tjera, mund të ndodhë që një distrikt të vendosë se është e papërshtatshme për t’u përdorur në klasat e tyre”, ka theksuar studiuesi i politikave OpenAI, Lama Ahmad. “Ne nuk i shtyjmë ata në një mënyrë apo në një tjetër. Ne thjesht duam t’u japim atyre informacionin që ata kanë nevojë për të qenë në gjendje të marrin vendimet e duhura për ta”.
Është rol jashtëzakonisht publik për startup-in e San Franciskos të orientuar drejt kërkimit, tani i mbështetur nga miliarda dollarë investime nga partneri i tij, Microsoft dhe duke u përballur me interes në rritje nga publiku dhe qeveritë.
Ministri i ekonomisë digjitale të Francës, Jean-Nowl Barrot u takua kohët e fundit në Kaliforni me drejtuesit e OpenAI-së, duke përfshirë themeluesin Sam Altman, dhe një javë më vonë i tha një auditori në Forumin Ekonomik Botëror në Davos, Zvicër se ai ishte optimist për teknologjinë. Por ministri i qeverisë – ish-profesor në Institutin e Teknologjisë në Massachusetts dhe shkollën franceze të biznesit HEC në Paris – ka thënë se ka gjithashtu pyetje të vështira etike që duhet të adresohen.
Përktheu: Blerta Haxhiu
