Agjencia Japoneze e Energjisë Atomike (JAEA) dhe Mitsubishi Heavy Industries Ltd kanë vendosur të bashkëpunojnë me Shtetet e Bashkuara dhe kompaninë sipërmarrëse të Bill Gates për të ndërtuar një reaktor bërthamor të teknologjisë së lartë në Wyoming.
Palët do të nënshkruajnë një marrëveshje në janar që JAEA dhe Mitsubishi Heavy Industries të ofrojnë mbështetje teknike dhe të dhëna nga reaktorët e avancuar të Japonisë, raporton “UKTimenews”.
Sipas burimeve të të përditshmes “Yomiuri”, TerraPower, një sipërmarrje e avancuar e energjisë bërthamore e themeluar nga Gates, është vendosur të hapë fabrikën e saj Natrium në Wyoming në vitin 2028. Qeveria e SHBA do të sigurojë fonde për të mbuluar gjysmën e projektit prej katër miliardë dollarësh.
Siç raportohet, Terrapower kishte eksploruar fillimisht perspektivën e ndërtimit të një centrali bërthamor eksperimental me China National Nuclear Corp, në pronësi shtetërore, derisa u detyrua të kërkonte partnerë të rinj pasi administrata e Donald Trump kufizoi marrëveshjet bërthamore me Kinën.
Shtetet e Bashkuara kanë konkurruar me Kinën dhe Rusinë, të cilat gjithashtu shpresojnë të ndërtojnë dhe eksportojnë reaktorë të avancuar.
Japonia, nga ana tjetër, ka një histori jo të mirë të çaktivizimit të reaktorit të saj të avancuar të prototipit Monju në vitin 2016, një projekt që kushtoi 8.5 miliardë dollarë, por dha pak rezultate.
Objekti Monju pati aksidente e shkelje rregullatore që nga konceptimi i tij dhe u mbyll pas mosbesimit publik ndaj energjisë bërthamore pas katastrofës bërthamore të Fukushimës në 2011.
