Njësoj si metalet e çmuara si ari, monedhat virtuale po i rezistojnë më mirë tregjeve të destabilizuara në kohën e pandemisë së koronavirusit. Monedha virtuale "bitkoin" po vazhdon tendencën rritëse duke iu afruar pragut 10 mijë dollarë për njësi.
Tregu i kriptovalutave i është rikthyer periudhës së parakoronavirusit, duke performuar më mirë se çdo bursë tradicionale në këtë periudhë pandemie.
Të enjten, vlera e monedhës virtuale, bitkoin, u rrit me gati 20 për qind apo me 1,200 dollarë shtesë brenda ditës, në 9,469 dollarë.
Rezerva e përgjithshme valutore digjitale po ashtu u vlerësua plot 35 miliardë dollarë më shumë.
E shprehur në lekë shqiptarë, një monedhe e tillë aktualisht tregtohet me mbi 1 milionë lekë të rinj.
Krahasuar me fundin e marsit, vlera e bitkoinit qëndron rreth 30 për qind më lart, në kohën kur asetet e zakonshme si nafta bruto po përjetojnë pikiatat më të thella historike, apo kur frika e koronavirusit ka zhbërë fitimet në tregjet financiare.
Ekspertët e fushës tregojnë se zhvillimet e fundit i atribuohen politikave monetare të bankës qendrore amerikane për të mbajtur në zero normën bazë të interesit deri sa ekonomia të dalë nga recesioni.
Një tjetër faktor është përgjysmimi i pritshëm i shpërblimit për prodhuesit dhe sasinë e bitkoineve në treg.
Kjo praktikë pritet të zbatohet nga data 12 maj për katër vitet e ardhshme, si masë për të mbajtur nën kontroll inflacionin e monedhës digjitale.
Shumë investitorë po i blejnë tani monedhat me shpresën se vlera e tyre do të rritet në të ardhmen veçanërisht në kohën e trazirave gjeopolitike.
