Microsofti ka konfirmuar një investim prej të paktën 10 miliardë dollarësh në inteligjencën artificiale, të njohur si ChatGPT, pas disa javësh thashetheme për këtë marrëveshje kolosale financiare, shkruan New York Times.
Edhe pse Microsoft nuk e konfirmoi shifrën e saktë, në një deklaratë për shtyp ata njoftuan se partneriteti mes dy kompanive do të zgjatet.
Ky investim i fundit është faza e tretë e angazhimit financiar të Microsoftit ndaj kësaj kompanie. Shefi i Microsoftit, Satya Nadella, ka thënë se qasja në inteligjencën artificiale do të përmirësohet ndjeshëm.
“Në fazën tjetër të partneritetit tonë, zhvilluesit dhe organizatat në të gjithë industritë do të kenë qasje në platformën më të mirë të AI, modelet dhe zinxhirin e mjeteve për të ndërtuar dhe ekzekutuar aplikacionet e tyre”, ka thënë Nadella.
ChatGPT është një chatbot i lëshuar në fund të vitit të kaluar nga OpenAI, një kompani e themeluar fillimisht nga Elon Musk dhe Sam Altman. Ky mjet revolucionar raportoi një milion përdorues në fillim të dhjetorit pasi ishte aktiv për rreth një javë.
Microsoft do të vazhdojë të jetë ofruesi ekskluziv për OpenAI dhe do të drejtojë punën e re kërkimore mbi shërbimet API. Vlen të përmendet se Microsofti tashmë ka investuar në OpenAI në fazat e mëparshme. Kishte një investim fillestar prej 1 miliard dollarësh në ‘startup-in’ me bazë në San Francisco në vitin 2019. Që atëherë, Microsoft ka investuar në heshtje 2 miliardë dollarë të tjera në kompani, sipas burimeve të industrisë.
Sipas një raporti të fundit në New York Times, Microsoft po mbështetet në pozicionin e fortë financiar dhe fuqinë e mjeteve të AI të krijuara nga OpenAI për të qenë në ballë të inteligjencës artificiale gjeneruese. Kjo i referohet teknologjisë që mund të gjenerojë tekst, foto, postime në mediat sociale dhe media të tjera nga raportet me tekst të shkurtër.
© KOHA. Të gjitha të drejtat janë të rezervuara.
