Mijëra tifozë ishin të pranishëm në stadiumin “Camp Nou” për të mirëpritur Xavi Hernandezin si trajnerin e ri të Barcelonës të hënën, duke shpresuar se ai mund të kthejë fatin e klubit pas një fillimi të zymtë të sezonit të parë pa Lionel Messin.
Xavi, i cili lulëzoi në skuadrën e Barcelonës për disa vite kur sulmuesi i Paris Saint-Germainit, Messi ishte gjithashtu në të njëjtin ekip, u prezantua zyrtarisht në një pritje që zakonisht ofrohet vetëm për lojtarët kryesorë. Mbështetësit brohorisnin emrin e tij dhe valëvitnin flamujt e klubit në tribuna. 41-vjeçari Xavi, i cili ka nënshkruar një kontratë deri në qershor të vitit 2024, u kthye dhe me dorë i dërgoi puthje turmës, pasi hyri në fushë përkrah presidentit të klubit, Joan Laportas.
“Jam shumë i emocionuar”, u tha Xavi tifozëve. “Ne jemi klubi më i mirë në botë dhe do të punojmë shumë për të qenë të suksesshëm. Barça nuk mund të jetë e kënaqur me barazime apo humbje. Ne duhet të fitojmë çdo ndeshje”.
Ai tha se është i prekur nga pritja madhështore dhe ka brohoritur bashkë me turmën, ndërsa në fushë gjatë prezantimit të tij kanë qenë edhe disa nga të afërmit e tij.
“Ne kemi nevojë për ju”, u tha Xavi tifozëve. “Sidomos në momentet e këqija. Jemi në një situatë të vështirë si klub. Ne kemi nevojë për ju më shumë se kurrë”
Edhe
Xavi dëshiron që tifozët të ndihen krenarë
Xavi u angazhua javën e kaluar për të zëvendësuar Ronald Koemanin, i cili nuk mundi të udhëhiqte skuadrën këtë sezon në një prej krizave më të këqija të historisë brenda dhe jashtë fushës. Ai e merr përsipër klubin në vendin e nëntë në La Liga dhe të dytin në grupin e Ligës së Kampionëve. Xavi kthehet në një klub të zhytur në vështirësi financiare, gjen një skuadër të varfëruar nga lëndimet, duke luftuar me lojtarët e rinj dhe nënshkrimet e reja të padëshmuara.
“Është një ëndërr e realizuar”, tha Xavi për faqen e Barcelonës më herët të hënën. “E di që klubi po kalon një moment të vështirë, por ndihem sikur jam i përgatitur”.
Ansu Fati dhe Eric Garcia janë lojtarët e fundit që i shtohen listës së lëndimeve të klubit, duke iu bashkuar Sergio Agueros dhe Gerard Piques. Xavi përballet me një orar të vështirë, ku ndeshja e tij e parë në krye është derbi i ligës kundër Espanyolit që luhet më 20 nëntor në “Camp Nou”.
Klubi më pas pret Benfican në një ndeshje që mund të vendosë fatin e Barçës në Champions, garë në të cilin nuk ka dështuar të kalojë fazën e grupeve në gati dy dekada. Ndeshjet e ardhshme të Barcelonës janë në Villarreali, Real Betisi dhe Bayerni. Xavi do të udhëheqë skuadrën në stërvitje për herë të parë të martën, megjithëse shumica e lojtarëve kryesorë të ekipit do të jenë në detyrë ndërkombëtare.
Edhe
Xavi largohet i dëshpëruar, puna e tij nuk u vlerësua sa duhet
Barcelona ishte drejtuar nga trajneri i përkohshëm Sergi Barjuan, i cili tashmë është rikthyer në krye të ekipit B. Në tre ndeshjet nën komandën e tij, Barcelona e mposhti Dynamo Kievin (1:0) dhe barazoi me Alavesin (1:1) e Celta Vigon (3:3). Xavi luajti për Barcelonën deri në vitin 2015, duke e ndihmuar klubin të fitonte 25 trofe, përfshirë katër Liga të Kampionëve dhe tetë liga spanjolle në 17 sezone.
Ai ishte gjithashtu kyç në ecurinë e titujve të Spanjës kur triumfoi në Kupën e Botës (2010) dhe Kampionatin Evropian (2008, 2012). Ai ka qenë në Al-Sadd qëkur u largua nga Barcelona, fillimisht si lojtar dhe më pas si trajner. Xavi u largua nga Al-Saddi duke e lënë në krye të ligës së Katarit pas nëntë ndeshjeve. Ai e refuzoi mundësinë e tij të parë për të udhëhequr Barcelonën në janar të vitit 2020 pasi Ernesto Valverde u shkarkua në mes të sezonit.
