Vajza e Milaim Ramës, e gatshme për debutimin zyrtar te Kosova

Milaim Rama është pionier sa u takon futbollistëve shqiptarë në Zvicër. Ai ka hapur dyert e Përfaqësueses së Zvicrës për lojtarët shqiptarë. Tani vajza e Milaim Ramës po hap i dyert e përfaqësueses. Asaj të Kosovës.

Alketa Rama ka luajtur ndeshjet e para me Përfaqësuesen A të Kosovës, ndonëse është vetëm 18-vjeçare. Në fund të qershorit u aktivizua në dy miqësore ndaj Maqedonisë së Veriut. Në të parën madje ishte startuese.

Tani sulmuesja e Zuerichut është ftuar për herë të parë nga Kosova A për ndeshje zyrtare kualifikuese. Alketa Rama dhe lojtaret e tjera të Kosovës të martën e kanë zhvilluar stërvitjen e parë në prag të ndeshjeve me Armeninë dhe Poloninë. Kosova luan me Armeninë të enjten në “Fadil Vokrri”, ndërsa me Poloninë luan në udhëtim më 6 shtator. Janë këto ndeshjet e fundit të Kosovës në eliminatoret për Botërorin e vitit të ardhshëm. Pas tetë ndeshjeve, Kosova është e parafundit me katër pikë. Shqipëria është në vendin e katërt me dhjetë pikë, ndërsa Armenia është e gjashta (e fundit) pa pikë. Norvegjia udhëheq në grup me 22 pikë, e përcjellë nga Belgjika me 19 dhe Polonia me 14.

Kosova, sipas të gjitha gjasave, do të përfundojë në vendin e parafundit dhe selektorja Anneli Anderson me shumë mundësi ndaj Armenisë do t’ua japë rastin lojtareve të reja. Njëra prej atyre që e pret rastin është Alketa Rama.

“Po ndihem shumë mirë që jam ftuar për ndeshje zyrtare. Jam e gatshme për të nisur me ndeshje kualifikuese për Kosovën. Vajzat më kanë pritur shumë mirë. Isha e grumbulluar edhe për miqësoret me Maqedoninë e Veriut, ndërsa tani kemi nisur me ushtrime për ndeshjet e fundit të këtij cikli eliminator”, ka theksuar Alketa Rama.

Ajo luan për Zuerichun U21 në kategorinë e dytë zvicerane. Thotë se po zhvillohet mirë si lojtare dhe se e pret rastin tek ekipi i parë i Zuerichut. Alketa ka luajtur për U17 e U19 të Kosovës, ndërsa tani është te Përfaqësuesja A.

“Jam e gatshme për ndeshjet që na presin. Shpresoj që të luaj nga fillimi ndaj Armenisë. Por edhe nëse nuk luaj nga fillimi, unë jam e gatshme për ta dhënë më të mirën. Ndaj Maqedonisë kam luajtur dhe i kam treguar trajneres se çka di e çka mundem. Mendoj se jam paraqitur mirë dhe si rezultat i kësaj ka ardhur ftesa për ndeshjet zyrtare”, ka theksuar Alketa Rama. “Sa i takon Zuerichut, jam duke luajtur për ekipin U21 në ligën e dytë. Po luaj rregullisht dhe po e pres rastin edhe në ekipin e parë. Situata ime në klub është e mirë, por të shohim si do të shkojnë gjërat”, ka shtuar Alketa.

Milaim Rama është i pari prej futbollistëve shqiptarë që ka luajtur për Zvicrën. Madje ishte edhe në Evropianin e vitit 2004, ku debutoi. Rama ka bërë histori sidomos te Thuni, sa i takon nivelit të klubeve. Ai është shquar si sulmues, ndërsa është respektuar dhe respektohet nga të gjithë.

Në sulm shkëlqimin e kërkon edhe Alketa. Ajo ka bërë hapa të mëdhenj para në karrierë deri më tani, ndërsa grumbullimi për dy ndeshjet e shtatorit është hap tjetër. Paraqitja në fushë dhe shënimi eventual i ndonjë goli do të ishte edhe një hap tjetër për Alketën.

“Këto janë ndeshjet e fundit të këtij cikli. Shpresoj që të stabilizohem në përfaqësuese për ciklin e ardhshëm eliminator”, ka theksuar Alketa Rama.