Për incidentin në Rumani ka reaguar edhe FFK-ja

Incidentin e shkaktuar të martën mbrëma në “Arena Nationala” në Bukuresht në ndeshjen kualifikuese të Evropianit ndërmjet Rumanisë dhe Kosovës, e ka dënuar ashpër edhe Federata e Futbollit e Kosovës. 
Huliganët rumunë shpalosën pano anti-Kosovë, e cila ndërpreu ndeshjen për afër një orë. 
“Përmes futbollit ndritim urat ndërmjet popujve, nuk i shembim ato”, ka nisur reagimin e gjatë FFK-ja të mërkurën gjatë ditës. 
“Tifozët e kombëtares së futbollit të Rumanisë, përmes gjuhës së urrejtjes e dëmtimit të imazhit të vetë përmes shprehjeve të tilla dhe sjelljeve jo sportive, kanë denigruar ndeshjen e mbrëmshme të futbollit”, ka shkruar FFK-ja fillimisht. 
Në reagimin e Federatës thuhet se pas incidentit, është kërkuar nga delegati i UEFA-s të evidentohen të gjitha shkeljet që kanë rezultuar me vërjetje ndaj Federatës së Futbollit të Rumanisë dhe është kërkuar që të gjitha shkeljet të procesohen te organet përgatëse të UEFA-së. 
“Incidentet e këtilla nuk duhet përsëritur.

Futbolli vetëm ndërton ura ndërmjet nesh, nuk duhet shembur ato. Falënderojmë edhe një herë të gjithë ata që kanë dënuar incidentin e djeshëm dhe mbështetjen ndaj futbollit.

Presidenti Ademi ka telefonuar organet kompetente për këtë rast dhe ka kërkuar të merren masa, duke përmendur edhe rastin e ndeshjes me Zvicrën për mosdhënien e penalltisë, e poashtu edhe rastin e penalltisë së mundshme me Rumaninë e mosdhënien e kartonit të kuq në rastin e ndërhyrjes ndaj Rrahmanit.

Në këtë drejtim, FFK në kuadër të procedurave ligjore, për të gjitha shkeljet që janë bërë, do të përgatisë edhe komentet e nevojshme dhe do ta dorëzojë padinë në UEFA, si dhe në Gjykatën e Arbitrazhit Sportiv (CAS)”, ka shkruar FFK-ja.